Tusite 15 'Akosi, 2017

Teutalo 33:18,19; Sen 49:13-15, Saame 4:5; ‘Ais 2:3

Teutalonome 33:18,19

"18Pea ‘ia Sepulone na‘a ne pehē,

Hākahaka ‘a Sepulone ‘i ho‘o ‘alu ki tu‘a

Pea ‘i ho‘o nofo tēniti, ‘e ‘Īsaka.

19Te na ui ‘ani kakai ki he mo‘unga;

Te nau feia ai feilaulau-fakatonuhia:

He te nau misi ‘a e mahu ‘o e ngaahi tahi ē,

Mo e koloa kuo fufū ‘i he ‘one‘one."

Saame 4:5

"5‘Atu ‘a e ngaahi feilaulau fakatonuhia,

Pea tu‘u ho‘omou falala kia Sihova."

KO E TAPUAKI ʻO SEPULONE MO ʻISAKA. Ko Sepulone mo ʻIsaka ko e ongo foha kinaua ʻo Sekope mo Lia. Ko hona ongo tofiʻa ʻi Kenaní naʻá na tuʻu fakataha pē ʻo na kaungaʻapí. Naʻá na nofo nonga pe mo ʻena ngāué. Ko Sepuloné kuopau ke ne fiefia pea ʻe tupu ʻene fiefiá ʻi heʻene ʻalu ki tahí, pea ko Sepuloné naʻe lahi hono ngaahi vaka, mo e ngaahi taulanga ū (sen 49:13). Ko ʻIsaká kuopau ke ne fiefia pe mo ia ʻi hono ngaahi teniti, pea ʻi heʻene fangamanú, pea ko e kau tangata ʻo e matakalí ni naʻa nau fakangatangata kinautolu ʻi heʻenau ngāue ʻi ʻutá, koeʻuhi ʻi he taimi ʻe hou ai ʻa tahí ʻoku fiemalie pe ʻa ʻuta ia, he naʻa nau sio pe ki he lelei ko iá (Sen 49:14,15). He ko e tauhi ʻofa ʻa e ʻOtuá ʻoku kehekehe pe ʻo fakatatau ki hono finangalo ʻa ʻene fokotuʻutuʻu ki he faʻahinga ʻo e tangatá. Ko e niʻihi ke nau nofoʻi ʻa e ngaahi kolo lalahi, pea ko e niʻihi ke nau nofoʻi ʻa e ngaahi kolo ki ʻutá, ko e niʻihi ki he ngaahi matātahí pea koe niʻihi ki he ngaahi motú, pea mo e ngāue kehekehe maʻa ʻenau lelei fakalukufuá. Ko e ʻOtuá ʻoku fokotuʻutuʻu ma ʻenau leleí, pea mo hono langilangí. Pea ke manakoa ʻa e lotu ki he kakai, kae tefito ki he lotu fakakosipeli he ʻahó ni, he ko e palofisai ko eni ʻo Sepuloné ko e sio mamaʻo mai ia ki hono malangaʻi ʻo Kalaisi ʻe heʻene kau ʻapositoló he ʻoku nau nofo matātahi ʻo hanga atu ki he konga ʻo ʻIulope mo ʻAfilika katoa. Pea naʻe kamata pe ʻi he fonua ʻo Sepulone (Mt 4:14,15). Pea ke nau ui ʻa e kakaí ki he moʻunga, ki he puleʻanga ʻo e Misaia ʻa ē ʻoku ui ko e moʻunga ʻo e fale ʻo Sihová (Ais 2:2) ʻa ē ʻe tafe taha ki ai ʻa e kakaí. Pea ko ʻIsaka ʻokú ne talitali ʻi ʻapi te ne ʻai ʻa hono kaungaʻapí ke nau ʻalu hake ki he potu toputapu ʻi he taimi kotoa ki heʻenau ngaahi katonga mamalú. Fakaloua ʻa e ongo matakali ko ení naʻá na tuʻumalie. Ko Sepulone naʻe fakautuutu ʻene mafola ʻaʻana ʻi tahi. Ko ʻIsaka naʻe tatali pe ʻi hono ʻapí ki he koloa ʻoku fūfū ʻi he ʻoneʻone. Ka kuopau kia kitautolu ke tau tauhi mo fakalangilangiʻi ʻa e ʻOtuá ʻaki ʻa e meʻa kotoa pē ʻoku tau maʻu ke mahino kiate ia ʻa ʻetau ʻiloʻi mo houngaʻia ʻi heʻene tokonaki fai manavaʻofá.