Tu'apulelulu 17 'Akosi, 2017

Teutalonome 33:22; Sios 19:47; Fkm 18:27

Teutalonome 33:22

"22Pea ‘ia Tani na‘a ne pehē,

Ko e laione mui ‘a Tani,

‘Oku hopo mai mei Pēsani."

Siosiua 19:47

"47Ka ko e vahe ‘o ha‘a Tani na‘e ‘ikai ke ngata ai, ka na‘e ‘alu atu ‘a ha‘a Tani, ‘o tau mo Lēsemi, ‘o nau hamu ia, ‘o taa‘i ‘aki ‘a e mata ‘o e heletā, ‘o nau ma‘u ia ‘o nofo ai, ‘o nau fakahingoa ‘a Lēsemi ko Tani, ‘o tatau mo e hingoa ‘o honau tupu‘anga ko Tani."

Fakamaau 18:27

"27Ka ka to‘o ‘e kinautolu ‘a e me‘a na‘e ngaohi ‘e Maika, mo e taula‘eiki kuo ne ma‘u, pea nau a‘u ki Laisi, ki ha kakai na‘e nofo nonga mo fakahākonoa; pea nau taa‘i kinautolu ‘aki ‘a e mata ‘o e heletā, pea ko e kolo na‘a nau fakamomofi ‘aki ‘a e afi."

KO E TAPUAKI ʻO TANI. Ko e laione mui ko e fakalea ia ʻo fakatatau ki he tokosiʻi ʻa e matakali ʻo Taní, ko e tofiʻa ʻo haʻa Taní ʻi he fonua naʻá na vaofi pe mo e matakali ʻo Siutá ka ʻi he lautoka ʻi he matātahí. Ko e matakalí ni naʻe ʻikai ke nau malava ke tauhi honau tofiʻa, koeʻuhi ko e fakafili ʻa e kau Filisitiá. Ko ia ai, ko e haʻa Taní ko e ʻaho ʻe taha te nau nofoʻi ʻo aʻu atu ki Pasani, ki he tonga ʻo e Moʻunga Heamaní (Fakam 18). Naʻe fakahoa ʻe Sekope ʻa Tani ko ha ngata, koeʻuhi ko ʻene poto he oló. Ka ko Mosesé ʻoku fakahoa ia ko ha laione, ko ʻene lotolahi mo e lotomaʻu ki ha meʻa ʻoku hoko, ʻokú ne lava ai ʻo tuʻu ʻi he ʻao ʻo ha niʻihi kuó ne maʻu ʻa e ʻulu ʻo ngata mo e loto ʻo e laione. Pea naʻe toe ʻeke fakahoa pe ia ko e laione mui mei Pesani. Ko ha moʻunga naʻe ʻi ai ʻa e fanga laione fakailifia ʻi he taimi ʻoku nau hifo ai ki he ngaahi tokalelei, ʻa ʻenau ngāueʻaki honau ngaahi pesipesi ʻi he ngaahi lautoka. He fakakau eni ki he ngaahi ikuna naʻe fai ʻe Samisoni ʻi he kau Filisitiá he ko Samisoni mei he matakali ko eni ʻo Taní. Pea pehē foki ki he aʻusia naʻe aʻu ki ai ʻa e matakalí ni ʻi heʻenau fakaʻohovaleʻi ʻa e kakai ʻo Laisi ʻo nau maʻu ia ʻekinautolu (Fkm 18:26,27). Naʻe tonu pe ʻa hono tamateʻi ʻe he matakali ʻo Tani ʻa e kakai ʻo Laisí? “ʻIkai”. Naʻe fekau ʻe he ʻOtuá ki ʻIsileli ke nau fakamaʻa mo fakaʻauha ʻa e ngaahi kolo pau pe koeʻuhí ko e ʻaitolí mo e fai angahalá, ka naʻe ʻikai ke kau ai ʻa Laisi ia, he ko hono kakai ʻoʻona naʻa nau nonga pe ʻo kehekehe ia, mo e fetāʻaki ʻoku fai mo e kau Kenaní. Ka ko e matakali ia ʻo Taní naʻe ʻikai ke nau lau ʻa e lao ʻa e ʻOtuá. He ko e lao ʻa e ʻOtuá ʻoku pehē ke fakaʻauha ha kolo ʻoku ʻi ai ʻa e ʻaitolí (teut 13:12-15). Ko e matakali ʻo Taní naʻa nau halaia ʻi he angahalá ni. ʻOku hanga ʻe he talanoá ni ʻo fakahaaʻi mai ko e ngaahi matakali ʻe niʻihi kuo nau hē mamaʻo kinautolu mei he ʻOtuá. Kainga Moʻui Foʻou, tokanga he neongo hono ui kitautolu mo fili ʻia Kalaisi, ka ʻoku kei hē holo pe ʻa e niʻihi ʻi he ngāue ʻa e kakano mo e tokanga māmaní.