Siosiua 1:1-4
"1PEA hili ‘a e pekia ‘a Mōsese ko e Sevāniti ‘a Sihova, na‘e folofola ‘a e ‘Eiki kia Siosiua ko e foha ‘o Nuni, ‘a ia na‘a ne tauhi ‘a Mōsese, ‘o ne pehē. 2Ko Mōsese ko ‘eku Sevāniti kuo pekia; Pea ko eni ke ke tu‘u koe ‘o ‘alu ki he kauvai ‘e taha ‘o Soatani na, ‘a koe mo e kakai ni kātoa, ‘o a‘u ki he fonua ‘a ia ‘oku ou foaki ni kiate kinautolu, ‘io, ki ha‘a ‘Isileli, 3‘Ilonga ha potu ‘e tu‘u ai homou ‘aofiva‘e, kuo u ‘atu ni mo‘omoutolu, ‘o hangē ko e lea na‘a ku fai kia Mōsese. 4Te mou ngata mei he Toafa pea mo Lepanoni ena, ‘o fai atu ki he vaitafe lahi, ‘a ‘Eufaletesi, ko e fonua kotoa ‘o ha‘a Heti, ‘o a‘u ki he tahi lahi ‘i he tō‘anga la‘ā."
Senesi 15:18
"18‘I he taimi ko ia na‘e fai fuakava ‘e Sihova mo ‘Epalame, ‘o pehē, Kuo u ‘atu ki ho hako ‘a e fonua, ko eni, mei he vaitafe ‘o ‘Isipite ‘o a‘u ki he vaitafe lahi ko ‘Eufaletesi"
‘Ekisoto 23:3
"3pea neongo ko e masiva, ‘e ‘ikai te ke ‘ofa kovi ki ai, ‘o kapau ko hano fakamaau."
'Ekisoto 24:13
"13Pea tu‘u hake ‘a Mōsese mo hono tauhi ko Siosiua: pea ‘alu hake ‘a Mōsese ki he mo‘unga ‘o ‘Elohimi"
Teutalonome 1:38
"38Ko Siosiua, foha ‘o Nuni, ‘a ia ‘oku ne fakafe‘ao kiate koe, te ne hū ki ai ‘e ia: ke ke poupou ki ai, he ko ia ia te ne fakatofi‘a‘aki ‘a ‘Isileli."
Teutalonome 11:24
"24‘Ilonga ha potu ‘e tu‘u ai homou ‘aofiva‘e ‘e ‘omoutolu ia: te mou fai mei he Toafa mo Lepanoni, mei he Vaitafe, ‘a e vaitafe ko ‘Eufaletesi"
Teutalonome 34:5
"5Ko ia na‘e pekia ‘i he potu ko ia ‘a Mōsese ko e Sevāniti ‘a Sihova, ‘i he fonua ‘o Moape, ‘i he funga ‘o e folofola tonu ‘a Sihova."
KO SIHOVA NAʻÁ NE FAKANOFO ʻA SIOSIUA KE NE FETONGI ʻA MOSESE. Ko Siosiuá ko e foha ia ʻo Nuni mei he matakali ʻo ʻIfalemí. Naʻe ʻuluaki ui ia ko Hosea (Nom 13:16) ʻoku ʻuhinga ia ko e fakamoʻui, ko ha fakamoʻui kae hili ʻa e talaki naʻe fai ʻe Mosese pea ko e palofisai ʻa e laumalie ke fetongi hono hingoa ko Siosiua, ʻoku ʻuhinga “Te ne fakamoʻui” pe “Ko e fakamoʻui ʻa Sihova” pea ko e akonaki ia ʻa e ʻOtuá ʻi hono fakamoʻui ʻa e kakaí mei he nima honau ngaahi filí mo taki kinautolu mei he ikuná, ki he ikuna ʻi he lotolotonga ʻo e fuʻu kakai kehekehe ʻo e kau Kenaní pea mo tuku kinautolu ki he koloa ʻo e fonua ʻo e talaʻofá.
ʻOku kamata ʻaki ʻa e tohí ni ʻa e hisitolia ʻo e pule mo e puleʻanga ʻo Siosiuá. Ko e langilangi ʻi heni ko hono ʻai kia Siosiua ʻa e ivi lahi ki hono nimá. Ko e akonaki naʻe ʻoange kiate ia ʻaki ʻa e poto taʻengata, mo e lotolahi ʻe he ʻOtuá ʻo e meʻa kotoa pe. Ka e kimuʻa ko Siosiuá ko e tokoni ia ʻo Mosese naʻá ne ʻi ai maʻu pe fakasino ke fai ʻa e tokoni, pea kuo ai ia ki he langilangi kotoa, ko hono fai ʻa e ngāué. Ko hotau ʻEiki ko Sīsuú naʻá ne toʻo ʻe ia ʻa e tuʻunga ʻo e sevanití, pea naʻe hakeakiʻi ʻe he ʻOtuá e fuʻu maʻolunga. Naʻe akoʻi ʻa Siosiua ke fakatokilalo mo fakaongo ki he fekaú. Ko kinautolu ʻoku feʻungataha ke pulé, ko e tokotaha kuo ne ako ke talangofua. He naʻe hoko pe ʻa Mosese ko e faʻifaʻitakiʻanga ʻo ne ʻilo ʻene tokateline mo ʻene toʻonga moʻui, mo ʻene taumuʻa mo ʻene kataki lahi (2 Tim 3:10). Kia Siosiua naʻá ne toʻo ʻa e meʻafua tatau ʻo ne laka he laumalie tatau, pea ʻi he sitepu tatau pea ke fua foki ʻa e ngāue tatau. Pea ko e taipe pe ia ʻo Kalaisi, ke nau ui ia ko e tokoni ʻo Mosese koeʻuhi ke teuʻi ia ʻi he malumalu ʻo e lao, mo fakakakato ʻa e kotoa ʻo e faitotonu ʻo e laó. Ko e taha ʻo e ui makehe ʻo Siosiuá ke ne laka atu ʻi Soatani. Ko e faingataʻa eni ki he tui ʻa Siosiua, ʻoku ʻikai ha hala ke nau ʻalu ai, ʻikai ha vaka, pe hala fakakavakava, ke ʻalu ai ʻa e kakaí, ka ke ne tui falala ki he ʻOtuá, te ne fai ʻa hono fakaava ʻo e halá. Ko Mosese naʻ eʻikai ke ne lava ia ʻe ia (Teut 31:2). “He ʻoku taau mo ʻene ʻafió ke ne taki ki he langilangi ha ngaahi foha tokolahi”. Ko Kalaisi ko e kapiteni ia hotau fakamoʻuí (Hep 2:10). Kāinga Moʻui Foʻou, ko hotau Siosiua eni ʻa Kalaisi, ke fakahū kitautolu ki he Kenani fakalangí. ʻEmeni.
No comments:
Post a Comment