Siosiua 2:8-13
"8Pea ‘i he te‘eki ke na tākoto ke mohe, na‘e ‘alu hake ‘a e fefine ki he tu‘a fale, ‘o ne pehē ki he ongo tangata. 9‘Oku ou ‘ilo kuo foaki ‘e Sihova ‘a e fonua ni kiate kimoutolu, pea kuo tō homou ngeia kiate kimautolu, pea kuo vai ‘a e loto ‘o e kakai kotoa pē ‘o e fonua ni koe‘uhi ko kimoutolu. 10He kuo mau fanongo ki he fakamātu‘u ‘e Sihova ‘a e Tahi kulokula ‘i homou ‘ao ‘i ho‘omou hū mai mei ‘Isipite; pea mo e me‘a na‘a mou fai ki he ongo tu‘i ‘Āmoli ‘i he kauvai ko ē ‘o Soatani, ‘a Sīhoni mo ‘Oki, ‘a ia ne mou faka‘auha. 11Pea ‘i he‘emau fanongo ki ai, na‘e vai homau loto, pea na‘e ‘ikai kei ha loto ‘o ha taha koe‘uhi ko kimoutolu: he ko homou ‘Otua ko Sihova ko ia ‘oku ‘Otua ‘i langi ‘i ‘olunga, pea ki māmani ‘i lalo. 12Pea ko eni ke mo fuakava mai mu‘a ‘ia Sihova, ko e me‘a ‘i he‘eku fai ‘ofa kiate kimoua, ko ia te mo fai ‘ofa ‘e kimoua foki ki he fale ‘o ‘eku tamai, mo tuku mai ha fakamo‘oni pau: 13pea te mo fakamo‘ui ‘eku tamai, mo ‘eku fa‘ē, mo hoku ngaahi tuonga‘ane, mo hoku ngaahi tokoua, mo ia kotoa pē ‘oku nau ma‘u, pea te mo fakahaofi ‘emau mo‘ui mei he mate."
‘Ekisoto 14:21
"21Pea mafao atu ‘e Mōsese hono nima ki tahi, pea na‘e fakatafe atu ‘e Sihova ‘a e tahi ‘aki ‘a e matangi mālohi mei hahake ‘i he pō ko ia kotoa, ‘o ne fakamātu‘u ‘a e tahi, pea na‘e tu‘usi ‘a e tahi."
'Ekisoto 23:27
"27Te u tuku atu hoku ngeia ke mu‘omu‘a ‘iate koe, pea te u have‘i ‘a e kakai fua pē te ke a‘u ki ai, pea te u ngaohi ho ngaahi fili kotoa pē ke sītu‘a kiate koe."
Nomipa 21:24,34,35
"24pea taa‘i ia ‘e ‘Isileli ‘aki ‘a e mata ‘o e heletā, ‘o ne puke hono fonua mei ‘Alanoni ‘o a‘u ki Siapoki mo e kau ‘Āmoni: he na‘e kaukaua fau ‘a e kau‘āfonua ‘o ha‘a ‘Āmoni. 34Pea folofola ‘a Sihova kia Mōsese, ‘Oua ‘e manavahē kiate ia, he kuo u tuku ki ho nima ‘a ia mo hono kakai kotoa mo hono fonua: pea te ke fai kiate ia ‘o hangē ko ho‘o fai kia Sīhoni ko e Tu‘i ‘Āmoli na‘e nofo ‘i Hesiponi. 35Pea nau taa‘i ia mo hono ngaahi foha mo hono kakai kotoa, ‘o ‘ikai te nau tuku hano toko taha ke hao; pea nau ma‘u hono fonua."
2 Samiuela 20:11
"11Pea ne pehē, Kapau ‘e mālohi fau ‘a Sīlia kiate au, pea te ke tokoni mai: pea kapau ‘e mālohi fau ‘a ha‘a ‘Āmoni kiate koe, pea te u ‘alu atu ke tokoni koe."
1 Timote 5:8
"8Ka ‘oka ai ha taha ‘oku ‘ikai tokanga ki hono kāinga, kae‘uma‘ā hono fāmili, ‘oku ne faka‘ikai‘i ‘ene lotu, ‘io, ‘oku ne kovi ange ‘i ha hīteni."
KO E KOVINANITE ʻA LEHAPI MO E ONGO ASIASÍ. Naʻe kamata ʻe Lehapi ʻa hono fakafuakava ʻa e ongo asiasí ʻo ne fakamatala ki he ongo asiasí ʻa ʻenau fanongo ki he ngāue fakaofo kuo fai ʻe he ʻOtuá maʻa ʻIsileli pea pehē ki Kenaní, pea kuo hoko ia ke vai ai honau ngaahi lotó. Kaekehe, ʻoku ʻikai ha tangata ke ne lava ʻo tuʻu ʻaki hano lotolahi pe ko hano malohi he ʻoku lava noa pe ʻe he ʻOtuá ʻo fakavaivaiʻi ʻa e ʻatamaí mo e sinó fakatouʻosi. Pea ʻoku ʻikai ha mafai ʻo e filí ke ne tuʻu ʻaki ki he ʻOtua ʻo ʻIsileli, pea ke fakafefeka honau ngaahi lotó ke fakafepaki ki he ʻOtuá.
ʻOku tau tokangaʻi ʻi heni ʻa e tui ʻa Lehapí pea mo hono fuá. He kuo ne fanongo ki he ngaahi mana kuo fai ʻe he ʻOtuá maʻa ʻIsilelí pea mo e ngaahi palomesi kuo ne fai kiate kinautolú pea pehē ki he tete ʻa e kakai kehe ʻo e fonuá, he naʻa ne taki ʻi he tui kia Sihova. Ko e ʻOtua moʻoni pe ia ʻe taha ʻi langi mo māmani, pea ko ʻIsileli pe taha ʻokú ne tali ʻenau kau lotú. Pea naʻá ne tui foki, ko ʻene ngaahi palomesí kuopau ia ke fakakakato, pea ko ʻene ngaahi fakamaná ʻe hoko ia pea ʻoku ʻikai ha founga ia ʻe fai ai ha hola, ka ko e fai fakalelei kiate ia, pea mo e manako taha pe mo hono kakaí. Ko e ʻulungaanga ʻo Lehapí naʻá ne fakamoʻoni ʻokú ne maʻu ʻa e tui moʻoni fakaʻOtuá Pea ne fakahaaʻi ʻene tuí ʻa ʻene fehokotaki mo e kau Kenaní pea mo ʻene ʻofa ki he kakai ʻa e ʻOtuá pea naʻe ʻikai ke ne kole ha toe meʻa kehe ka ke fakahaofi ʻa hono kāingá ki he ongo matakí. Pea ko ʻene fuakava molumalu ia kia Sihova. Ko e Lehapi ko ení hili ʻa e fuʻu fakalakalaka moʻui ʻi heʻene tuí ʻo ne hoko ai pe ko ha pilinisesi ʻi ʻIsileli ko e uaifi ʻo Salemone, ko e taha ia ʻo e tukufakaholo ʻo Kalaisí (Mt 1:5). He ko kinautolu ʻoku nau tonunga ʻenau tauhi kia Kalaisí mo faingataʻaʻia maʻama, heʻikai ngata pe ʻi heʻene maluʻi kinautolú ka te ne fai kia kinautolu ʻo hulu atu ʻi he meʻa ʻoku nau kolea, pea mo fakakaukau ki ai. Kāinga, ʻofa moʻoni, mo falala ki he ʻOtua ʻia Kalaisi, pea ʻe ʻaʻau hono tapuakí.
No comments:
Post a Comment