Siosiua 2:14-21
"14Pea pehē ‘e he ongo tangata ki he fefine, Ko ‘ema mo‘ui ‘e fetongi ho‘omou mo‘ui, ‘o kapau ‘e ‘ikai te mou fakahā ‘ema me‘a ni; pea ka faifai pea tuku mai ‘e Sihova ‘a e fonua, pea te ma fai kiate koe ‘a e ‘ofa mo e mo‘oni.
15Pea na‘a ne tuku hifo kinaua ‘aki ha maea ‘i he kātupa; he na‘e tu‘u hono fale ‘i he funga ‘a ‘o e kolo, pea na‘a ne nofo ‘i he ‘a. 16Pea ne pehē kiate kinaua, ‘Alu ki he mo‘unga, na‘a ma‘u kimoua ‘e he kau tuli; pea mo toi ai ‘o ‘aho tolu, kae‘oua ke foki mai ‘a e kau tuli, pea hili ia pea mo fai ho‘omo fononga.
17Pea lea kiate ia ‘a e ongo tangata, ‘Oku ma fie ta‘ehalaia ‘i ho‘o fuakava ni, ‘a ia kuo ke fakafuakava‘i ai kimaua. 18Ko eni, ka mau ka omi ki he fonua ni, ko e maea filo kulokula ni te ke fakama‘u ‘i he kātupa, ‘a ia na‘a ke tuku hifo ai kimaua: pea te ke fakataha kiate koe ki fale ‘a ho‘o tamai mo ho‘o fa‘ē, mo ho ngaahi tuonga‘ane, mo e fale kotoa ‘o ho‘o tamai. 19Pea ka ‘ilonga ha taha ‘e ‘alu ki tu‘a ‘i he matapā ‘o ho fale, ‘e ‘i hono ‘ulu ‘o‘ona ‘a hono toto, ka ko kimaua te ma ‘ata‘atā mei ai: ka ‘ilonga ‘a ia ‘oku ‘iate koe ‘i fale, ko hono toto ‘e ‘i homa ‘ulu, ‘o kapau ‘e ala ha taha kiate ia. 20Ka ‘o kapau te ke fakahā ‘ema me‘a ni, te ma ‘ata‘atā ai mei ho‘o fuakava, ‘a ia kuo ke fakafuakava ai kimaua. 21Pea pehē ‘e he fefine, Ke fai pe ‘o hangē ko ia kuo mo lea‘aki. Pea ne tukuange kinaua, pea na ō: pea ne fakama‘u ‘a e maea kulokula ‘i he kātupa."
‘Ekisoto 20:7
"7‘Oua te ke takuanoa ‘a e huafa ‘o Sihova ko ho ‘Otua: he ‘e ‘ikai lau ‘e Sihova ‘oku ta‘ehalaia ia ‘a ia ‘oku ne takuanoa hono huafa."
Fakamaau 1:24
"24Pea na‘e vakai ‘e he asiasi ha tangata ‘oku ne hū mai mei he kolo, pea nau pehē kiate ia, Fakahā mai mu‘a ‘a e hū‘anga ki he kolo, pea te mau fai ‘ofa kiate koe."
Matiu 5:7
"7Monū‘ia ā ka ko kinautolu ‘oku manava‘ofa: he ‘e fai manava‘ofa kiate kinautolu."
Matiu 27:25
"25Pea tali ‘a e kakai kotoa, ‘o nau pehē, Ko hono toto ke ‘eke kiate kimautolu mo ‘emau fānau."
Ngaue 9:25
"25ka ka ‘ave po‘uli ia ‘e he‘ene kau ako, ‘o nau ‘ohifo ‘i he ‘ā, ‘o tukutuku ki lalo ‘i ha kato."
KO E TALI ʻA E ONGO TANGATA ASIASI KIA LEHAPÍ. Ko e palomesi naʻá na fai kia Lehapi “Ka faifai pea tuku mai ʻe Sihova ʻa e fonuá pea te ma fai kiate koe ʻa e ʻofa mo e moʻoní”. Ko e lelei ʻa e ʻOtuá ʻoku toutou fakamatalaʻi ʻa ʻene ʻofá mo e moʻoní (Sa 117:2). Te na hanga ʻo maluʻi ʻa Lehapi mo e kotoa ʻo hono kāingá. 1. Naʻá ne hanga ʻo nonoʻo ʻa e maea valeti ʻi he matapā ʻo hono falé, ke na hifo ai ki lalo, he ko hono falé naʻe tuʻu ʻi he funga ʻā ʻo Selikoó. Ko e fakaʻilonga eni kuo ʻoange ʻe he ongo asiasí ko e fakatokanga heʻikai ha sotia te ne fai ha meʻa ki he falé ni. Pea ʻoku hangē eni ko hono vali toto ʻo e ngaahi pou matapā ʻi ʻIsipite ke fakahaofi ʻa e ngaahi ʻuluaki fohá mei he ʻangelo fakaʻauhá. Pea ko e lanu tatau pe ʻokú ne fakamanatu mai ʻa e malu ʻa e kau tuí ʻi he taʻataʻa Kalaisi ʻi he konisenisí. Fakatouʻosi ʻokú ne toe ui mai ʻetau manatu ki he malu ʻa e tokotaha angahala ʻi he malumalu ʻo e maluʻi ʻa e taʻataʻa fakaleleí mei he houhau mo e malaʻia ʻoku mei he ʻOtuá. Ko e maea tatau pe naʻe ngāueʻaki ʻe Lehapi ke fakahaofi ʻaki ʻa e ongo ʻIsilelí ni, pea naʻá ne ngāueʻaki ke fakahaofi ia. Ko e hā ʻa e meʻa ʻoku tau tauhi mo fakalangilangiʻi ʻaki ʻa e ʻOtuá pea tau ʻamanaki ai ki heʻene tapuakí mo ha fakafiemalie kia kitautolu. 2. Naʻe hanga ʻe Lehapi ʻo ʻomai kotoa ʻa hono kainga ofí ki hono falé ʻo ne tauhi kinautolu ʻi ai. Pea ʻi he taimi ʻe hamu ai ʻa e koló heʻikai ha taha ʻo kinautolu ʻe hū ʻi ha matapā kituʻa pea ke haofakiʻi ʻa hono kāingá ʻo ʻikai ke hanga ʻe Lehapi ʻo fakakehekeheʻi ha taha he naʻa nau tatau pe ʻi heʻene ʻofá, he ko e potu ia kuo fai ki ai ʻa e palomesí pe ahangē ko Noa ki he ʻaʻaké, pea mo Lote ki Soa (Sen 19:22). 3. Naʻá ne tauhi ʻa e faleʻi naʻe fai ʻo ne fai pau ki ai, he ko e aleapau ko e kovinanite ia. Ko kinautolu ʻoku nau ʻi he founga ʻa e ʻOtuá mo honau fatongia ʻoku nau ʻamanaki ki he ʻofa tauhi mai ʻa e ʻOtuá te ne maluʻi kinautolu pea ko kitautolu ʻia Kalaisi.
No comments:
Post a Comment