Tu'apulelulu 3 'Akosi, 2017

Teutalonome 32:19-25; 28:22; 29:21; Levit.26:22; Saame 106:40; ʻIsikeli 7:15; Loma 10:19

Teutalonome 32:19-25

"19Pea ‘afio‘i ‘e Sihova, ‘o ne fakalili‘a ki ai,

He ko ‘ene fānau tangata mo fānau fefine kuo nau fai fakamamahi.

20Pea ne folofola,

Te u hanga kehe pē,

Ka u vakai pe te nau iku fēfē:

He ko e to‘utangata fulikivanu ena,

21Kuo nau fakafua‘a‘i au ‘aki ha ‘ata‘i ‘Otua;

Kuo nau fakamamahi au ‘aki ‘enau ngaahi muna:
Ko ia ko au te u fakafua‘a‘i kinautolu ‘aki ha ‘ata‘i kakai;
Ko e pule‘anga vale te u fakamamahi ‘aki.
22He kuo tupu ha afi ‘i he‘eku tuputāmaki,
Pea ‘oku vela ‘o a‘u ki he takele ‘o Hētesi,
Pea ‘oku ne keina ‘a māmani mo hono fua,
Pea ‘oku tutu ai ‘a e tefito ‘o e ngaahi mo‘unga.
23Te u pae atu ‘a e kovi kiate kinautolu:
Te u faka‘osi ki ai ‘eku ngaahi ngahau.
24Ka vaivai ‘i he honge, pea ‘osi‘osi ‘i he mofi,
Mo e faka‘auha kona‘ī‘ī,
Te u toki fekau atu ‘a e nifo ‘o e fanga manu,
Mo e huhu‘a kona ‘o e ngaahi me‘a ‘oku totolo ‘i he efu.
25‘I tu‘a, ‘e fakaeve ‘e he heletā,
Pea fai ‘i loki ‘e he ilifia;
Ko e fatutangata mo e tāupo‘ou fakataha,

Ko e kei huhu mo e ‘ulu hinā."

Teutalonome 28:22
"22‘E taa‘i koe ‘e Sihova ‘aki ‘a e fakalilelila, mo e mofi, mo e kiatolo, mo e me‘a kula, mo e la‘ala‘ā, mo e mahunu, mo e kekena; pea te nau toupili kiate koe kae‘oua ke ke ‘auha."

Teutalonome 29:21

"21Pea ‘e vahe‘i ia ‘e Sihova mei he ngaahi matakali ‘Isileli ke kovi, ‘o tatau mātē mo e ngaahi mala ‘o e kovinānite kuo u tohi ‘i he tohi lao ni."

Levitiko 26:22

"22Pea te u tuku atu ‘a e manu kaivao, ‘a ia te ne fakata‘efanau kimoutolu, mo faka‘auha ho‘omou monumanu, pea fakatoko si‘i kimoutolu; pea ‘e ta‘e‘uhia homou ngaahi hala."

Saame 106:40

"40Toki kakaha ki hona kakai ‘a e tuputāmaki ‘o Sihova,

Pea ne fakalili‘a ki hono tofi‘a."

ʻIsikeli 7:15

"15Ko e heletā ē ‘i tua‘ā, pea ko e mahaki mo e honge ē ‘i loto: ko ia ‘oku ‘i he vao te ne mate ‘i he heletā, pea ko ia ‘oku ‘i he kolo ‘e keina ia ‘e he honge mo e mahaki faka‘auha."

Loma 10:19

"19‘Oua koā. Na‘a kuo ‘ikai lave‘i ‘e ‘Isileli ‘a e me‘a ko ia.

‘Ā, ‘oku lea leva ‘a Mōsese ki ai, ‘o pehē,

Te u fakafua‘a‘i kimoutolu ‘aki ha ‘ata‘i kakai;

Te u fakatupu ho‘omou ‘ita ‘aki ha kakai ta‘e‘atamai."

FAKAMAAUʻI ʻE SIHOVA ʻI HEʻENE FAKALILIʻA IA ʻI ʻISILELI. HILI ʻA E ANGATUʻU ʻA ʻISILELI KI HE ʻOTUÁ ʻoku fakamatala ki ai ʻa e ngaahi veesi kimuʻa, pea ʻoku hoko atu ʻi heni ʻa hono fakapapauʻi ʻo e fakamaau ʻa e ʻOtuá maʻa kinautolú. Naʻá ne fiefia ʻia kinautolu ka ʻi he taimí nit e ne fakaʻikaiʻi kinautolu ʻaki ʻa e fakaliliʻa mo e hanga ke he (v.19,20). ʻOku hanga ʻe he angahalá ʻo ngaohi kitautolu ke fakafehiʻanekina ʻi he fofonga maʻoniʻoni ʻa e ʻOtuá. Ko e ofi ange ʻo ha meʻa hono fakahā ki he ʻOtuá, ko e lahiange ia ʻo e fakaʻauha ʻe ʻanautolu ʻo kapau te nau ʻuliʻi kinautolu ʻaki ʻa e founga angahala (Sa. 106:39,40).

Kuo ne ʻosi ʻoange kia kinautolu ʻa e ngaahi fakaʻilonga ʻa hono lotolotonga, mo hono manako, ka ʻi he taimi kuo ne hiki ʻo fūfū hono fofonga meiate kinautolu v.20. Kuo kamata ʻenau heé, mo ʻikai ke toe ʻi ai ha lelei mo e angafai pe ʻo e koví. Naʻe fai ʻe he ʻOtuá ʻa e meʻa kotoa pe he faingofua mo fakafiefia kia kinautolu, ka ko eni ʻe fai ʻe he ʻOtuá ʻa e meʻa ʻe fakamamahi taha kia kinautolu. Ko e ngaahi tauteá ko e ngaahi tali ia ki he angahala v.21. ʻE tautea kinautolu ʻe he ʻOtuá ʻaki honau ngaahi fili fehiʻanekina, ʻa ē ʻoku ʻikai ke nau taau mo ha hingoa ʻo ha kakai. ʻOku lava noa pē ʻe he ʻOtuá ke ne ngaohi ʻa e meʻangāue vaivaitahá, ke ne fakafepakiʻi ʻa e tokotaha angahala malohitahá ʻo fakatātā ia ʻe Tevita ʻia Kolaiate, he ko e ʻOtá ʻoku pulé he meʻa kotoa pē.

Naʻa ne to kinautolu ʻi ha fonua lelei pea ne toe fakafonu kinautolu ʻi he kotoa ʻo e ngaahi meʻa lelei ka te ne toʻo meia kinautolu ʻa e kotoa ʻo ʻ enau fiemalié, ka ne ʻomi ʻa e ʻauhá kia kinautolu (v.22-25) mo e fakamanavahē. ʻOku ʻikai hā meʻa ke ne taʻofi ʻa e fakamaau ʻa e ʻOtuá ʻi he taimi te nau haʻu ai, ke fakaʻauha ʻa e veve. “Pea te ne tutu kinautolu ʻo aʻu ki he takele ʻo heli. Ko Kalaisi pē ʻa e moʻuiʻanga, mo e haoʻanga.