Sapate 13 'Akosi, 2017

Teutalonome 33:12 ; Senesi 44:20

Teutalonome 33:12

"12Pea ‘ia Penisimani na‘a ne pehē,

Ko e pele ‘a Sihova

Te ne nofo ‘iate ia, ‘o loto nonga;

‘Oku ne fakapūlou ia ‘i he ‘aho kotoa,

Pea ne nofo ‘i hono vaha‘a uma."

Senesi 44:20

" 20Pea na‘a mau tali ki he ‘Afiona, ‘Oku ‘i ai ‘emau tamai ko e motu‘a, pea mo ha foha na‘a ne ma‘u kuo ne motu‘a, ko e tamasi‘i, pea kuo pekia hono tokoua, pea ko ia pē toko taha ‘oku toe ‘i he‘ene fa‘ē, pea ‘oku ‘ofa ai ‘e he‘ene tamai. "

KO E TAPUAKIʻI ʻO PENISIMANI. ʻE ʻafio ʻa e ʻOtuá ʻi he lotolotonga ʻo hono ngaahi moʻunga. Ko e temipale naʻe ʻi he matakali ʻo Penisimani. Ko e matakali ʻo Penisimani naʻe maʻu honau tofiʻa ʻo ofi atu ki he moʻunga Saione. Ko ha konga lahi ia ʻo Selusalema pea mo e konga ʻo e temipalé ʻoku tuʻu ia ai. Pea ʻoku fakaʻilongaʻi ʻaki eni ʻa e ʻofa ʻa e ʻEikí kia kinautolu. Ko e feituʻu toputapu ko honau maluʻi, lolotonga ʻoku nau tuʻu ʻo ofi ki ai. ʻOku ʻuʻufi pe kinautolu ʻaki ʻa e maluʻi ʻa e ʻEikí mo hokohoko atu, pea ʻokú ne maʻu pe ʻa e mafai ko honau fakafofonga. Fakatatau pe ki he matakalí ni ʻoku nau pipiki pe kia Siuta, pea ki he famili ʻo Tevita pea mo e hū ki he ʻOtuá. ʻI he taimi ko ē naʻe angatuʻu ai mo takiheeʻi ʻa e matakali ʻe hongofulu ʻo ʻIsilelí. Ko e matakali ia ko eni ʻo Penisimani naʻa nau hoko kinautolu ʻo taʻemavae ʻa ʻenau taha ʻa kinautolu mo e matakali ʻo Siuta. Kaekehe, ko Penisimani, ko e foha ʻofaʻanga eni ʻo Sekope, pea ko e ʻofaʻanga ia ʻo e ʻEikí. Pea naʻe ʻoange ʻe he ʻOtuá ki he matakali ʻo Penisimaní ʻa e fiemalie mo e nonga, mo e malu mo e hao pea te ne fakamalumalu kia kinautolu pea te ne ʻafio ʻi hono vahaʻa umá. Ko e ʻEikí naʻá ne ʻai ʻa e matakali ʻo Penisimaní ʻaki ʻa ʻene maluʻi fakatangata, talu pe ʻene tupu ʻa Penisimani kuo ʻosi palani pe ʻe he ʻOtuá ki he anga ʻo e meʻa te ne hoko ki ai mo hono founga, pea ʻoku kei palani pehē pe ʻa e ʻOtuá ia maʻae tokotaha fakafoʻituitui ʻo aʻu mai ki he ʻahó ni. Fakatokangaʻi ia pea ke vakai pe koe. Naʻe palomesi ʻa Siuta kia Sekope te ne hanga ʻo tauhi hao ʻa Penisimani (Sen 43:9). Ko e taimi ni ko e faingamalie ia ʻo Siuta ke tauhi ʻene palomesi ko ʻenau hoko koē ʻo popula, ko ha tuʻunga faingataʻa ia ka naʻe kei fakapapau ai pe ʻa Siuta ke ne tauhi ʻene lea naʻa ne fai ki heʻene tamaí. Naʻá ne fakahaaʻi ʻa ʻene lotolahi, ke ne fakafua ai pe ʻene palomesí. Naʻá ne tali fatongia pe ʻo ʻuhinga ke kei hoko atu ai pe ʻene palomesí mo e lotolahi naʻe ʻikai ke ne lau haʻane faingataʻa ʻe taha ko haʻane feilaulau. ʻOku fai pehē pe mo Kalaisi ʻi heʻetau tui falala kiate ia pea te ne haofakiʻi koe.