Teutalonome 34:9-12
"9Pea ko Siosiua ko e foha ‘o Nuni na‘a ne fonu ‘i he laumālie ‘o e poto; he kuo hilifaki nima ki ai ‘a Mōsese: pea na‘e fakaongo kiate ia ‘e ha‘a ‘Isileli, ‘o nau fai ‘o hangē ko e tu‘utu‘uni ‘a Sihova kia Mōsese. 10Pea talu ai kuo ‘ikai tupu ‘i ‘Isileli ha palōfita hangē ko Mōsese, ‘a ia ko ‘ena fe‘iloaki mo Sihova ko e femātaaki 11‘i he ngaahi faka‘ilonga mo mana na‘e fekau ia ‘e Sihova ke fai ‘i ‘Isipite kia Felo, pea ki he‘ene kau tamaio‘eiki, pea ki hono fonua kotoa: 12pea ‘i he ngaahi tā mālohi mo e fu‘u fakangeingei, ‘a ia na‘e feia ‘e Mōsese ‘i he ‘ao ‘o ‘Isileli kātoa."
Teutalonome 5:4
" 4Ko e fefolofolai ‘a Sihova mo kimoutolu ‘i he mo‘unga mei he loto afi ko e femātaaki."
Teutalonome 18:15,18
"15‘E fokotu‘u ‘e Sihova ko ho ‘Otua mei ho lotolotonga, mei ho kāinga, hao palōfita hangē ko au; ko ia pē te mou fanongo ki ai; 16‘o hangē ko ia kotoa na‘a ke kole meia Sihova ko ho ‘Otua ‘i Hōlepi ‘i he ‘aho ‘o e fakataha, ho‘o pehē, ‘Oua ā na‘a ku toe fanongo ki he le‘o ‘o Sihova ko hoku ‘Otua, pea ‘oua ā na‘a ku toe sio ki he afi lahi ni, na‘a ku mate. 17Pea na‘e folofola ‘a Sihova kiate au, ‘Oku lelei ‘a e lea kuo nau fai. 18Te u fokotu‘u ma‘anautolu ha palōfita mei he lotolotonga ‘o honau kāinga hangē ko koe, pea te u ‘ai ‘eku lea ki hono ngutu, pea te ne lea‘aki kiate kinautolu ‘a e me‘a kotoa te u fekau kiate ia."
‘Ekisoto 33:11
"11Pea ko e fefolofolai ‘a e ‘Eiki mo Mōsese na‘e fai ko e femātaaki, ‘o hangē ko e talanoa ‘a ha tangata mo hono kaume‘a. Pea na‘e foki ia ki he ‘apitanga, ka ko hono tauhi ko Siosiua ko e foha ‘o Nuni, ko e talavou, na‘e ‘ikai mahu‘i ia mei he Tēniti."
Nomipa 12:6,8
"6Pea ne folofola ange, Tokanga mai ki he‘eku lea: ka ai ha palōfita ‘iate kimoutolu, ko au Sihova te u faka‘ilo au kiate ia ‘i ha vīsone, te u lea kiate ia ‘i ha misi. 7Taha kehe ‘eku sevāniti ko Mōsese: ko e falala‘anga ia ‘i hoku fale kotoa. 8Ko ‘ema alea mo ia ‘e fai ko e ngutu ki he ngutu, pea ‘i he lea tonu, ‘o ‘ikai ‘i he fakatātā; pea ko e anga totonu ‘o Sihova te ne māta‘i: pea lau ‘e au te mou manavahē ke lau‘i ‘eku sevāniti ko Mōsese."
Nomipa 27:18,23
"18Pea folofola ‘a Sihova kia Mōsese, Pe‘i ‘ave ‘a Siosiua ko e foha ‘o Nuni, ko e tangata ‘oku Laumālie‘ia, pea hilifaki ho nima ki ai; 19pea fokotu‘u ia ‘i he ‘ao ‘o ‘Eliesa ko e taula‘eiki, pea ‘i he ‘ao ‘o e fakataha kotoa; pea fai hono tu‘utu‘uni ke nau sio ki ai. 20Pea te ke tuku kiate ia mei ho lāngilangi, koe‘uhi ke fie ongo ‘a e fakataha kotoa ‘o ha‘a ‘Isileli, 21ka te ne tu‘u ‘i he ‘ao ‘o ‘Eliesa ko e taula‘eiki, ‘a ia te ne huhū ma‘ana kia Sihova ‘aki ‘a e fakatonu faka-‘Ūlimi ko e lea ‘a‘ana te nau hū atu ai, pea ko e lea ‘a‘ana te nau hū mai ai, ‘a ia mo ha‘a ‘Isileli kātoa foki, ‘io, ‘a e fakataha kotoa. 22Pea fai ‘e Mōsese ‘o hangē ko e tu‘utu‘uni ‘a Sihova kiate ia; pea ne ‘ave ‘a Siosiua ‘o fokotu‘u ‘i he ‘ao ‘o ‘Eliesa ko e taula‘eiki, pea ‘i he ‘ao ‘o e fakataha kotoa: 23pea ne hilifaki hono nima kiate ia, ‘o ne fai hono tu‘utu‘uni, hangē ko e folofola ‘a e ‘Eiki na‘e fakafai ‘ia Mōsese."
'Aisea 11:2
"2Pea ‘oku nofo hifo ki ai ‘a e Laumālie ‘o Sihova, ‘a e laumālie ‘o e poto mo e ‘ilome‘a, ‘a e laumālie ‘o e fale‘i mo e mafai, ‘a e laumālie ‘o e ‘ilo‘i ‘o Sihova mo e ‘apasia ki ai."
KO HONO FETONGI ʻE SIOSIUA ʻA MOSESE. Ko Siosiua eni hangē ha tangata kuo mateuteu ki he ngāue kuo ui ia ki aí. Naʻe ʻomai ʻe Mosese ʻa ʻIsiilelí ʻo tuku mai ki he kauʻāfonuá ʻo Kenani, pea ne pekia, kae tuku ai kinautolu, ko e ʻuhingá ke mahino ko e laó, ʻoku halaʻatā ke ne fakahaohaoa ha taha (Hep 7:19). ʻOkú ne ʻomai pe ʻa e tangata ki he toafa ʻo e fakahalaʻiaʻi kae ʻikai ki he Kenani ʻo e mālōloó mo e nofo nongá. Ko e langilangi naʻe fetongi ʻe Siosiuá, ko hotau ʻEiki ko Sīsuú. Ko Siosiua hono taipe (pea ko hona hingoá ʻoku tatau pe hona ʻuhingá), koeʻuhi ke ne fai ʻe ia kia kitautolu ʻa e meʻa ko ē naʻe ʻikai lava ʻe he laó ʻo faí, ko ʻene vaivai ki he kakano (Lo 8:3). Pea ʻiate iá ʻi heʻetau tuí ʻoku tau hū ai ki he mālōlō, ko e mālōlō fakalaumalie ʻo e konisenisi mo e mālōlō taʻengata ʻi Hevani. Ko e meʻa ʻe tolu ke fakamahino ʻaki ʻa e ui ko eni ʻo Siosiuá.
1. Naʻe fakafeʻunga ia ʻe he ʻOtuá ki ai. Naʻá ne fonu ʻi he laumalie ʻo e poto. He ko Siosiuá ko e taipe ia ʻo Kalaisí ʻoku fūfū ai, ʻa e koloa poto mo e ʻilo, ʻo fai ʻaki ʻa e ngāue fakalukufua mo e lotolahí.
2. Ko Mosese naʻá ne fai hono nofo fakaʻOtua pea ʻi ai naʻe foaki ai ʻe he ʻOtuá ʻo lahi ʻa e laumalie ʻo e poto, koeʻuhi ko ʻene palani ia ki he puleʻanga ʻo e ʻOtuá naʻe ngāue ʻaʻana, he ko kinautolu ʻoku ngāue ai ʻa e ʻOtuá te ne ngaohi kinautolu ke feʻunga ki he ngāué, pea koeʻuhi naʻe kole ʻe Mosese ʻa eni ki he ʻOtuá ʻi heʻene hilifaki nima kiate ia. ʻI he taimi naʻe mavahe ʻa e lotolotonga fakasino ʻo KAlaisí mei hono siasi, naʻá ne lotu ki he tamaí ke fekauʻi mai ha taukapo, pea naʻe maʻu ʻa e meʻa naʻá ne lotu ki aí.
3. Naʻe fiefia ʻa e kakaí ʻi heʻenau maʻu ia pea nau tukulolo kiate ia. Naʻa ne saiʻia he ʻofa ki he kakaí ko ha fakalotolahi. Pea ne fai meesi ki he kakai, pea ʻi he pekia ʻa Mosesé naʻe ʻikai ke hangē ʻa e kakaí ko ha fanga sipi taʻe ʻi ai haʻanau tauhi.
Ko e hisitolia ʻo Mosesé naʻe tuku ia ʻo tanu ʻi he lautoka ʻo Moapé, pea ko e fakamaʻopoʻopo ia ʻa e vaaʻitaimi ʻa hono puleʻangá, ka ko e hisitolia ʻa hotau Fakamoʻuí, naʻe tuku ia ke ʻafio ʻi he nima toʻomataʻu ʻo e ʻOtua Mafimafi maʻolunga, pea ke tau fakapapauʻi ʻetau tupu fakautuutu ʻi hono puleʻangá mo e melino ʻoku ʻikai hano ngataʻanga, mo talangofua, tonunga mo tuʻumaʻu ʻi heʻene maʻoniʻoní.
No comments:
Post a Comment