Tusite 1 'Akosi, 2017

Teutalonome32:7-14; Senesi 11:8; ‘Ekisoto 19:4; Saame 17:8, 81:16; ‘Aisea 58:14; Ngaue 17:26

Teutalonome32:7-14
"7Manatu‘i ‘a e ngaahi ‘aho mu‘a,
Fakakaukau ki he ta‘u ‘o e ngaahi to‘utangata:
Fehu‘i ki ho‘o tamai, pea te ne tala kiate koe;
Ki ho kau mātu‘a, pea te nau lea kiate koe.
8‘I he vahe tofi‘a ‘e ‘Elioni ki he ngaahi pule‘anga,
‘I he‘ene tufaki ‘a e hako‘i tangata,
Na‘a ne hunuki ‘a e kau‘ā ‘o e ngaahi kakai,
‘O fakatatau ki he lau ‘o ha‘a ‘Isileli.
9He ko hono kakai ‘a e ‘inasi ‘o Sihova;
Ko Sēkope ko e kinikini ‘o hono tofi‘a.
10Na‘a ne ‘ilo ia he fonua toafa,
‘I he fonua mamate mo ‘u‘ulu mo lālāfua‘a;
Na‘a ne kāpui ia, na‘a ne nofo‘aki lama,
Na‘a ne tauhi ia hangē hono tama‘imata.
11Hangē ha ‘īkale ‘oku ue‘i hono pununga,

‘O ne puna mo hono fānganga mei ‘olunga
Pehē ‘ene folahi hono kapakau, ‘o kilala ia,
‘I hono funga fulufulu ‘oku ne fua:
12Na‘e taki ia ‘e Sihova toko taha pē,
Pea na‘e ‘ikai ō mo ia ha ‘otua kehe
13Na‘a ne tuku ke ne fakateka ‘ene sāliote
‘I he ngaahi potu mā‘olunga ‘o e fonua,
Pea ne kai ‘a e tupu ‘o e ngoue‘anga;
Pea ne tuku ke ne misi honi mei he makatu‘u,
Mo e lolo mei he maka hangē ha makahunu;
14‘a e pota ‘o e pulu, mo e huhu‘a ‘o e sipi,
Mo e ngako ‘o e fanga lami,
Mo e sipi tangata faka-Pēsani, mo e fanga kosi,
Mo e ‘elito‘i uite;

Pea mei he toto ‘o e kālepi na‘a ke inu uaine."

Senesi 11:8
"8Pea na‘e veteki kinautolu ‘e Sihova mei he potu ko ia ke nofo‘i ‘a e fonua kotoa; pea na‘a nau tuku ‘a e langa ‘o e kolo"

‘Ekisoto 19:4
"4Kuo mou mamata ki he me‘a kuo u fai ki he kau ‘Isipite, mo ‘eku fafa kimoutolu ‘i he funga kapakau‘i ‘īkale, ‘o ‘omi kimoutolu kiate au"

Saame 17:8
"8Ke ke tauhi au ‘o hangē ha tama‘imata
Fufū au ‘i he malu ‘o ho kapakau na."

Saame 81:16
"16Pehē te ne fafanga ia ‘aki ‘a e ‘elito‘i mahoa‘a:
‘Io, ne u fakamākona koe ‘aki ‘a e honi mei he maka."

‘Aisea 58:14
"14Pea te ke toki fakafiefia ‘ia Sihova; pea te u tuku koe ke ke heka ki he ngaahi mā‘olunga ‘o e fonua; pea te u tuku ke ke kai ‘a e ‘inasi ‘o ho‘o kui ko Sēkope: he kuo folofola ki ai ‘a e fofonga ‘o Sihova."

Ngaue 17:26
"26Na‘a ne o‘i foki ‘a e ngaahi fa‘ahinga kakai ‘a ia ‘oku nau tupunga taha kotoa pē, ke nau nofo‘ia ‘a e funga kotoa ‘o māmani; he ne ne fakafuofua ‘a e ngaahi kuonga na‘e tu‘utu‘uni ki he‘enau nofo, mo honau ngaahi kau‘ā"

KO E NGAAHI ME‟A LAHI KUO FAI ʻE HE ʻOTUÁ MAʻA ʻISILELI. Kuo fakafofongaʻi ʻe Mosese ʻa e ʻOtuá, ko e tokotaha ʻofa mo tokoni lahi, ʻo ʻoange ai kia kinautolu ʻa e loto hounga ke nau tokanga mo talangofua pea ʻi he ngaahi veesí ni ʻoku nau ʻomai ʻa e fakatātā makehe ʻa e angaʻofa mo e tokanga ʻa e ʻOtuá kia kinautolú. Pea ke nau ʻeke ki heʻenau ngaahi tamaí mo ʻenau ngaahi mātuʻá (v.7) pea te nau tala kia kinautolu ʻa e angaʻofa ki honau kakai motuʻá, pea te nau fakahaaʻi kia kinautolu ʻa honau ngaahi moʻua ke nau tauhi ofi ki he ngāue ʻa Sihová.

ʻOku ʻi ai ʻa e meʻa ʻe tolu ʻoku hā lahi ʻi heni:

1. Ko e muʻaki hingoa ʻo e fonua ko Kenaní ʻi heni ʻokú ne fakataipe mo fakatātaaʻi ʻa hotau tofiʻa fakahevaní. Ko e ʻOtuá naʻá ne teuteu mo fokotuʻutuʻu honau ngaahi tofiʻá (v.8). Ko e poto ʻo e ʻOtuá naʻá ne fakanofo ʻa e ngaahi kauʻā ʻo e nofo ʻa e tangatá mo fakapapauʻi ʻa e taimi mo e feituʻu ʻo ʻetau nofo ʻi māmaní (Ng 17:26). He ko e poto taʻengata ʻo e ʻOtuá naʻá ne fai ʻa e fokotuʻutuʻu talu mei muʻa (Ng.15:18). Ko e ʻOtuá ʻoku ʻaʻana e palani mei he kamata ki he ngataʻanga, ʻikai ke tau kau ai (Koheleti 3:11).
2. Ko hono ngaohi ʻa ʻIsileli ko ha kakai pea ke nau feʻunga ke hū ki he tofiʻa ko ení ʻi he taimi kuo poloʻi ki ai ʻe he Tamaí. Ko Kenaní ko e fakatātā ʻo e tofiʻa fakahevani mei ʻitaniti naʻe palani mei ai maʻa e kotoa ʻo e ʻIsileli fakalaumalie ʻo e ʻOtuá mo e taimi kotoa ke nau feʻiloaki ki ai (Kol 1:12). “Naʻe ʻilo ia ʻe he ʻOtuá ʻi he fonua momoa” (v.10). Ko e toafa naʻe fakafou mai ai ʻa ʻIsileli ki Kenaní. Ko ʻIsileli ʻoku ui ia ko e siasi ʻi he toafa (Ng 7:38).
3. Naʻe tuku kinautolu ki he fonua lelei. Naʻe tapuakiʻi kinautolu ʻaki ʻenau ikunaʻi honau ngaahi filí (v.13). Ko e fakaʻilonga eni ki hono ikuna ʻe he kau tuí honau ngaahi fili fakalaumalie, ʻa e angahala, mo Setane pea mo māmani, ʻia mo fou ʻia Kalaisi, ʻenau hao mo e ikuna ʻiate ia.