Siosiua 1:5-9
"5‘E ‘ikai lava ‘e ha taha ke tu‘u kiate koe lolotonga ho‘o mo‘ui: hangē ko ‘eku ‘ia Mōsese, ‘e pehē ‘eku ‘iate koe: ‘e ‘ikai te u fakatukuhāusia‘i koe, ‘uma‘ā ha‘aku li‘aki. 6Ke ke lototo‘a ‘o tu‘u kalikali; he ko koe te ke fakahoko ki he kakai ni honau tofi‘a, ‘a e fonua na‘a ku fuakava ai ki he‘enau ngaahi kui ke foaki mo‘onautolu. 7Kehe pē ke ke lototo‘a, mo ke tu‘u kalikali ‘aupito, ‘o tokanga ke fai ki hono kotoa ‘o e lao, ‘a ia na‘e tu‘utu‘uni atu ‘e Mōsese ko ‘eku sevāniti: ‘oua te ke afe mei ai ki he to‘omata‘u pe ki he to‘ohema, koe‘uhi ke ke fai fakapotopoto ‘i he me‘a kotoa pē te ke ‘alu ki ai. 8‘E ‘ikai mahu‘i mei ho ngutu ‘a e tohi lao ko ia, ka te ke fakalaulauloto ki ai ‘i he ‘aho mo e pō, koe‘uhi ke ke tokanga ke fai ‘o hangē ko e me‘a kotoa kuo tohi ai; he te ke toki monū‘ia ‘i he me‘a ‘oku ke fou ai, pea te ke fai fakapotopoto ai. 9‘Ikai kuo u kouna koe? Ke ke lototo‘a, mo tu‘u kalikali; ‘oua te ke manavahē, pea ‘oua te ke tailiili; he ko Sihova ko ho ‘Otua te ne ‘iate koe ‘i he me‘a kotoa ‘oku ke ‘alu ki ai."
‘Ekisoto 3:12
"12Pea ne folofola mai, Koe‘uhi ā te u ‘iate koe; pea ko eni ha‘o fakamo‘oni ko Au ia kuo fekau atu koe: ‘Oka ke ka taki atu ‘a e kakai na mei ‘Isipite, te mou tauhi kia ‘Elohimi ‘i he mo‘unga ko eni."
Nomipa 27:23
" 23pea ne hilifaki hono nima kiate ia, ‘o ne fai hono tu‘utu‘uni, hangē ko e folofola ‘a e ‘Eiki na‘e fakafai ‘ia Mōsese."
Teutalonome 7:21
" 21‘Oua te ke teki kiate kinautolu; he ko Sihova ko ho ‘Otua ‘oku ‘i ho lotolotonga, ko e ‘Otua lahi mo fakailifia."
Teutalonome 31:8,23
"8Pea ko Sihova ko ia ia ‘oku hā‘ele mu‘omu‘a ‘iate koe; te ne ‘iate koe ‘e ia, ‘e ‘ikai te ne fakatukuhāusia‘i koe, ‘uma‘ā ha‘ane li‘aki: ‘oua ‘e manavahē, pea ‘oua ‘e lotosi‘i. 23Pea ne feia ha tu‘utu‘uni kia Siosiua, foha ‘o Nuni, ‘o ne pehē, Ke ke lototo‘a, mo ke tu‘u kalikali: he ko koe te ke fakahū ‘a ha‘a ‘Isileli ki he fonua na‘a ku fuakava ai kiate kinautolu: pea ko au te u ‘iate koe."
‘Aisea 42:2
"2‘E ‘ikai te ne kaila, pea ‘e ‘ikai te ne lea lahi, ‘io, ‘e ‘ikai fanongo ‘e ha taha mei hala ki hono le‘o."
Selemaia 1:8
"8‘Oua te ke manavahē ‘i honau ‘ao; he ‘oku ou ‘iate koe ke fai ho fakahaofi–ko Sihova ia mei he Ta‘ehāmai."
PALOMESI ʻA E ʻOTUÁ KE TOKONIʻI ʻA SIOSIUA. 1. ʻOku totonu ke fakapapauʻi ʻa e lotolotonga ʻo e ʻOtuá ʻoku kau mo e ʻOtuá ʻi he ngāue lahi ko ení kuo ui ia ki ai. “Hangē ko ʻeku ʻia Mosese ʻe pehē ʻeku ʻiate koe”, Ko e hā pe ʻa e meʻa naʻe fai ʻe Mosese, naʻá ne fai ia ʻaki ʻa e lelei ʻo e ʻi ai ʻa e ʻOtuá ʻiate ia. Ko e fakafiemalie lahi ia ke ʻi he kau faifekau mo e kau tui kotoa pe, ʻoku ʻi ai ʻa e kelesi tatau mate ʻoku feʻunga maʻae kakai ʻoku nau takimuʻa ʻiate kinautolu. Ko kinautolu ʻoku nau ʻalu ki ha feituʻu kuo fekauʻi kinautolu ki ai ʻe he ʻOtuá, ke nau maʻu ia kia kinautolu ki he feituʻu ʻoku nau ʻalu ki ai, pea heʻikai ke nau toe fiemaʻu ha meʻa ke fakafaingofua ʻaki mo fakafaingamalieʻi ʻaki ʻa e uí mo e fekau kuo ʻomi, he ko e ʻOtuá ko ho ʻOtua ʻoku ʻiate koe, ko e ʻOtua ia ʻo e mafai kotoa pe. 2. Ko e ʻOtuá ʻoku ʻiate koe heʻikai te ne mahuʻi pe liʻaki ko e ha momeniti. Ko e palomesi ko eni naʻe fai kia Siosiuá kuopau ke fakahoko ia ki he kau tui kotoa pe he ko ia pe ʻoku tala ʻe he ʻapositoló. “Ke taʻemanumanu hoʻomou toʻonga, pea mou fiemalie ʻi he ngaahi meʻa ʻoku mou maʻú ni, he kuo folofola mai ʻe heʻene ʻafio, ʻe ʻikai siʻi teu mahuʻi meiate koe, kaeʻumaʻa haʻaku momoʻi liʻaki koe” (Hep 13:5). Ko e fakahoko ʻo e palomesi ko eni ʻa e ʻapositolo ke fakalotolahiʻi kitautolu ke tau ʻamanaki ki hono fakahoko ʻo ha meʻa kuo ne palomesi ki ai ʻi he Tohitapú kia kitautolu koeʻuhi ko kitautolu ko e kau kalisitiane moʻoni pea ʻoku tau fononga ʻi he ʻalunga ʻo e ʻEiki. 3. Pea ke ne ikunaʻi ʻa e ngaahi fili kotoa pe ʻo ʻIsileli, “ʻE ʻikai lava ha taha ke tuʻu kiate koe” Heʻikai lava ha taha ʻo tuʻu ki he tafaʻaki ʻoku ʻi ai ʻa e ʻOtuá. Kapau ʻokú ne ʻiate kitautolu, ko hai ʻe fakafepaki mai? Ko Siosiua te ne vahevahe ʻa e fonua ko Kenaní ki he kau ʻIsileli, pea ko e fakalotolahi moʻoni ia ʻi he kamata ʻo ʻene ngāue ko eni, he kuopau ke ne sio ki ai haʻane ʻosi, he ʻoku ʻikai ko e ngāue noaʻia. Pea ke fakapapauʻi ia ʻi he meʻa kotoa pe ʻo e lao ʻa e ʻOtuá, pea ke ʻai ia ko hono pule, he te ne fakalaulauloto kiai ʻi he ʻaho pea mo e po. Ko hotau ui ia ʻia Kalaisi, ko ia hotau pule foʻou he moʻuí ni, he kuo mate ʻa angahala ia.
No comments:
Post a Comment