Teutalonome 33:6
"6Ke mo‘ui ‘a Lūpeni, ‘o ‘oua ‘e mate;
Pe hoko hono kakai ko e toko si‘i pē."
Senesi 49:3,4
"3Lūpeni, ko koe ko hoku ‘uluaki,
Ko hoku mālohi, mo e fuatapu ‘o hoku ivi,
Mu‘omu‘a he nofo, mu‘omu‘a he angi.
4Lilingofua hangē ko e vai,
‘E ‘ikai te ke ‘uluaki;
He na‘a ke kākā he mohenga ho‘o tamai:
‘Ā, na‘a ke hanga ‘o ‘uli‘i ia.
Na‘a ne ‘alu hake ki hoku fala!"
KO E TAPUAKI ʻO LUPENÍ. Tokangaʻi ʻa e kehekehe ʻa e ngaahi tapuaki naʻe ʻoange ʻe he ʻOtuá ki he matakali taki taha ʻo ʻIsileli. Ki he taha naʻá ne ʻoange ki ai ʻa e leleitahá ʻo e fonuá, naʻe ʻoange ki he taha ʻa e malohi, pea ki he taha ʻa e hao mo e malu. Ko ia ko hono fokotuʻutuʻu ʻo hono tapuakiʻi ʻo e ngaahi matakalí naʻe ʻikai ke nau tatau. Pea ʻoku tala mahino pe mei ai ʻa e fuʻu ʻOtua mohu mo kilukilua ʻoku tau fakafeangai ki ai.
Ko Lupení ko e foha lahitaha ia ʻo Sekopé pea ko e foha lahí ʻoku totonu ke ne maʻu ʻa e ʻinasi loua. Ka ko Lupení naʻe mole ʻa hono langilangi makehe ko iá. ʻI heʻene kei talavou siʻí, ko e tama naʻe puleʻi ngataʻa mo taʻefalalalaʻanga, he naʻe ʻalu ʻe ia ke nofo mo e taha ʻo e kau sinifu ʻa ʻene tamaí. Ko ia ai, naʻe ʻikai lava ʻe Sekope ke ʻoange ʻa e tapuaki ko ia ʻo e foha lahi ki ha foha taʻelangilangiʻia. Naʻe tomuʻa tala pē ʻe Mosese “Ke moʻui ʻa Lupeni….pea hoko hono kakaí ko e tokosiʻi pē”. Ko hono tuʻunga ia ki he kahaʻú ʻo ʻikai ko e tokotaha langilangi. Naʻa nau nofo ʻi he fakahahake ʻo e tahi mate, pea ko e matakali ʻo Lupení ʻe fakamavahe kia kinautolu ia mei he ngaahi matakali kehe ʻo ʻIsileli (Fakam 5:15,16). Ko e matakali ʻo Lupení, Kata, Manase mo ʻAseli naʻe tukuakiʻi kinautolu ʻi he ʻikai ha nima fietokoni ki he toenga ʻo e ngaahi matakalí ʻi he tauʻi ʻo Kenani. Naʻe ʻikai ha ʻuhinga ʻe maʻu ki heʻenau fakafisi ke tokoni ki he toenga ʻo ʻIsileli. Kae mahalo pe ke taʻofi ʻa hono tuli kituʻa ʻa e kau KEnani. Pea naʻe pehé ni. 1. ʻIkai ha falala ia ki he tokoni ʻa e ʻOtuá .2 ʻIkai ke fie feinga. 3. Manavahe ki he fili. 4. Manavahe ʻi he loto taaufehiʻa meia kinautolu naʻa nau fai ʻa e ngāué. Ko e talangataʻá ko eni ʻokú ne fakahaaʻi ʻa e taʻefietukulolo kakato ki he palani ʻa e ʻOtuá, pea mo e siʻi ʻa e tui ki he mafai ʻo e ʻOtuá. ʻOku tau sio ai ki he tukunga pehé ni pe ʻa e lotu ʻa e tangatá, ʻa e faingataʻa ʻa e liʻoa kakato ki he ʻOtuá, tuʻunga ʻi heʻetau tui falala kia Kalaisi.
No comments:
Post a Comment