Tu'apulelulu 2 Fepueli, 2017

TEUT 4:44-49 ; 2:36 ; 3:29 ; NOM 21:26

Teutalonome 4:44-49

"44Pea ko eni ‘a e lao na‘e fokotu‘u ‘e Mōsese ‘i he ‘ao ‘o ha‘a ‘Isileli: 45ko e ngaahi fakamo‘oni eni, mo e ngaahi fekau, mo e ngaahi kupu‘i konisitūtone na‘e lea‘aki ‘e Mōsese ki ha‘a ‘Isileli ‘i he‘enau hū mai mei ‘Isipite, 46‘i he kauvai ko ē ‘o Soatani, ‘i he talalo ‘o e mo‘unga, ‘o hanga ki Pete-peoli, ‘i he fonua ‘o Sīhoni ko e Tu‘i ‘Āmoli, ‘a ia na‘e nofo ‘i Hesiponi, ‘a ia na‘e taa‘i ‘e Mōsese mo ha‘a ‘Isileli ‘i he‘enau hū mai mei ‘Isipite: 47pea nau puke hono fonua, mo e fonua ‘o ‘Oki ko e Tu‘i Pēsani: ko e ongo tu‘i ia ‘o e kau ‘Āmoli na‘e nofo ‘i he feitu‘u ‘o Soatani ki he hopo‘anga la‘a; 48mei ‘Aloeli, ‘a ia ‘oku ‘i he kau tele‘a ‘o ‘Alanoni, ‘o a‘u ki he mo‘unga ko Sioni (ko Heamoni ia), 49mo e ‘Alapā kotoa ki he hahake ‘o Soatani, ‘o a‘u ki he tahi ‘o e ‘Alapā, ko e talalo ‘o e ngaahi lauua ‘o Pīsika."

Teutalonome 2:36

"36Mei ‘Aloeli, ‘a ia ‘oku ‘i he kau tele‘a ‘o ‘Alanoni, mo e kolo ‘oku ‘i he tele‘a, ‘o a‘u ki Kiliati, na‘e ‘ikai ha kolo na‘e mā‘olunga fau kiate kitautolu; ko Sihova ko hotau ‘Otua na‘a ne tuku mai kotoa ‘i hotau ‘ao"

Teutalonome 3:29

"29Ko ia na‘a tau nofo ‘i he vaha‘a mo‘unga ‘i he hāngai ki Pete-peoli."

Nomipa 21:26

"26He ko Hesiponi ko e kolo ‘o Sīponi ko e Tu‘i ‘Āmoli, ‘a ia kuo ne tau mo e tu‘i mu‘a ‘o Moape, pea kuo ne to‘o meiate ia hono fonua kotoa, ‘o a‘u ki ‘Alanoni."

Ko e laó ni ʻoku lave ia ki he ngaahi fekau fakaikiiki ʻi he Vahe 5-26. Ko e lao, ʻoku ʻuhinga ia ʻo fakatefito ʻi he akonaki. ʻO tuku mai ʻe he ʻOtuá ʻa e hala ʻo e maʻoniʻoní, maʻa hono kakai kovinanite. Ko e lao ni, ʻoku tatau pe ia, mo e lao naʻe ʻoange ki he ʻuluaki toʻutangata, ʻi Moʻunga Sainai. ʻIa Teutalonome, ko hono toe ʻomi tuʻo ua ʻo e lao kia kinautolu, te nau ngaueʻi ʻa e fonuá, he ko e toʻutangata foʻou. Ko e fonua ʻo Sihoní ko e tuʻi ʻAmoli, mo e fonua ʻo Oki, ko e tuʻi Pesani, kuo maʻu nimā ia ʻe ʻIsileli, ʻa e ongo fonua ko iá ʻi he hahake ʻo Soatani, pea ʻi he taimi ʻoku nau teuteu atu ke nau kolosi, ʻi he vaitafe Soatani ke hū ki Kenani. Pea fai leva ʻe Mosese hono akonakiʻi ʻa ʻIsileli, heʻene fiemaʻu kinautolu, ke nau talangofua fakalukufua ki he ngaahi fekau ni. ʻE anga fēfē ʻetau fai hotau fatongiá, ʻo kapau ʻoku ʻikai ke tau ʻilo ha meʻa ki ai?

Naʻa ne fokotuʻutuʻu ʻa e lao ʻi muʻa ʻiate kinautolu, ko e tuʻutuʻu ia te nau ngāueʻaki, pea ko e hala ia te nau ʻalu ai, pea ko e sioʻata ia, te nau sioʻaki honau mata fakaenatula, ʻo nau sio ki he lao haohaoa ni ʻo e taʻuʻatāina. Ko e lao ʻa e ʻOtua ʻoku totonu, pea tonu mo lelei, mo fakamaama, ʻo kapau heʻikai fakakuihi kitautolu ʻe Setane, ʻaki ʻetau lau pē ʻetau ngaahi meʻa ʻatautolu pe, ʻoku tau manako ai, ʻo taki ʻe hotau kakanó pea faingataʻa kia kitautolu ke talangofua ki he ngaahi fekaú. Ka ʻi heʻetau langa hake ʻia Kalaisi, ko hotau fauniteni ʻaki ʻa e tui falala ki hono taʻataʻa mo toho mei heʻene moʻuí ʻaki ʻa e tōtōivi ʻi he lotú, mo ʻene poto, malohi, mo ʻEne kelesi, pea ke hoko kotoa eni ko e mafai ia hotau ngaahi laumalie. ʻOku totonu ke tau tukuingata ke mahino hotau tuʻunga, ko e kau angahala pea foaki kakato kitautolu ʻi he tui falala kia Kalaisi, pea te tau afuhia ʻi heʻene kelesi, ʻi heʻetau foaki kakato kitautolu kiate ia, ʻa e meʻa ʻoku tau maʻu, mo e meʻa ʻoku tau fai, ʻio, ki ai tokotaha pe ʻoku pule, ʻoku ʻikai ke tau kau ai, pea te tau ʻinasi ʻi he koloa fakalaumalie ʻo hulu atu ʻi he kau ʻIsilelí.