Pulelulu 8 Ma'asi, 2017

TEUT 5:27-33 ; 17:11,20 ; 18:17 ; 28:14 ; SIOS 1:7 ; SA 81:8,13 ; AIS 48:18

Teutalonome 5:27-33

"27‘Unu‘unu atu koe, ‘o tali ‘a e me‘a kehekehe ‘oku folofola‘aki mai ‘e Sihova ko hotau ‘Otua, pea ke ‘a‘au mai kiate kimautolu ‘a e ngaahi me‘a ‘e fakahā kiate koe ‘e Sihova ko hotau ‘Otua; pea te mau fanongo fie fanongo, ‘o fai ki ai. 28Pea na‘e ongo‘i ‘e Sihova ‘a e le‘o ‘o ho‘omou ngaahi lea ‘i ho‘omou fai kiate au, pea ne folofola mai, Kuo u ongo‘i ‘a e le‘o ‘o e lea ‘a e kakai ni, ‘a ia kuo nau fai kiate koe: ‘oku lelei kotoa ‘a e lea kuo nau fai. 29Pehēange mai kuo pehē honau loto ma‘u pē, ke nau ‘apasia kiate au, mo tauhi ‘eku ngaahi fekau, koe‘uhi ke nau tu‘umālie mo ‘enau fānau foki, ‘o ta‘engata! 30‘Alu ‘o tala kiate kinautolu, Mou foki ki homou ngaahi tēniti. 31Ka ko koe, ke ke tu‘u heni, ‘o taka ofi kiate au, pea te u ‘a‘au kiate koe ‘a e ngaahi tu‘utu‘uni mo lao mo konisitūtone, ‘a ia te ke ako‘i kiate kinautolu, ke nau fai ‘i he fonua ‘oku ou foaki kiate kinautolu ke ma‘u. 32Ko ia ke mou tokanga ke fai ‘o fakatatau ki he tu‘utu‘uni ‘a Sihova ko homou ‘Otua kiate kimautolu: ‘e ‘ikai te mou afe ki he to‘omata‘u pe ko e to‘ohema. 33Ko e hala kotoa kuo tu‘utu‘uni ‘e Sihova ko homou ‘Otua ma‘amoutolu, te mou fou ai; koe‘uhi ke mou mo‘ui, pea ke mou tu‘umālie, pea ke lahi homou ngaahi ‘aho ‘i he fonua te mou ma‘u."

Teutalonome 17:11,20

"11te ke fai ‘o fakatatau ki he lao te nau ako atu, mo e fakamaau te nau tala: ‘e ‘ikai te ke afe mei he tu‘utu‘uni te nau fakahā kiate koe, ki he to‘omata‘u pe ki he to‘ohema. 20ke ‘oua na‘a hiki hono loto, ‘o ne ta‘etoka‘i hono kāinga, pea ke ‘oua te ne afe mei he tu‘utu‘uni ki to‘omata‘u pe to‘ohema; koe‘uhiā ke ne fakalahi hono ngaahi ‘aho ‘i hono pule‘anga, ‘e ia mo ‘ene fānau, ‘i he lotolotonga ‘o ‘Isileli"

Teutalonome 18:17

"Pea na'e folofola ‘a Sihova kiate au, ‘Oku lelei ‘a e lea kuo nau fai."

Teutalonome 28:14

"14‘o ‘ikai te ke momo‘i afe mei he ngaahi me‘a ‘oku ou tu‘utu‘uni atu he ‘aho ni ki he to‘omata‘u pe ko e to‘ohema, he muimui ‘otua kehe mo tauhi ki ai."

Siosiua 1:7

"7Kehe pē ke ke lototo‘a, mo ke tu‘u kalikali ‘aupito, ‘o tokanga ke fai ki hono kotoa ‘o e lao, ‘a ia na‘e tu‘utu‘uni atu ‘e Mōsese ko ‘eku sevāniti: ‘oua te ke afe mei ai ki he to‘omata‘u pe ki he to‘ohema, koe‘uhi ke ke fai fakapotopoto ‘i he me‘a kotoa pē te ke ‘alu ki ai."

Saame 81:8,13

"8“Fanongo mai ‘e hoku kakai ka u fakamo‘oni atu: ‘Isileli ē, taumaiā ke ke fakaongo kiate au! 13‘Amusia ange ‘e au ke tokanga hoku kakai kiate au, ‘O fou ‘a ‘Isileli ‘i he hala ‘o‘oku!"

'Aisea 48:18

" 18Taumaiā na‘a ke tokanga ki he‘eku ngaahi tu‘utu‘uni! Pehē kuo hangē ha vaitafe ho‘o fiemālie, pea ko ho‘o mā‘oni‘oni hangē ko e ngaahi peau 'o e tahi."

Fiemaʻu ha taha, ke tuʻuvahaʻa ʻiate kinautolu ʻIsilelí, pea mo e ʻOtuá, ʻo makatuʻunga ʻi he ʻenau manavaheé. Pea nau pehē kia Mosese, “ʻUnuʻunu atu koe, ʻo tali ʻa e meʻa kehekehe ʻoku folofolaʻaki mai ʻe Sihova ko hotau ʻOtuá”. Naʻa nau tōtō ivi he kole, mei heni ʻo fai atu, ke folofola mai pe ʻa e ʻOtuá kia kinautolu ʻia Mosese, pea ʻaki ha palomesi te nau fanongo ki he meʻa te ne leaʻaki mei he ʻOtua ʻe ia, te nau fai. Naʻa nau tui ko Mosese, ko ha taha ʻe hoko ʻo manakoa ʻi Hevani, pea ko ia pe foki ʻa e tokotaha, ʻe tōnunga kia kinautolu, ka ʻi he taimi foki ʻe taha, naʻa nau muhumuhu kiate ia, pea kimuʻa ange aí, naʻa nau teu ke tolomakaʻi. Ka ʻi he taimi ni, kuo nau ʻatamai lelei ʻi hono hukia malohi kinautolu, ʻe he folofola kuo nau fanongo ki ai ʻi moʻunga. Pea ko e tokotaha, kuo uesia honau konisenisí ʻe he laó, kuo ne maʻu kinautolu ka ʻoku teʻeki ke maʻa, ʻoku teʻeki ai ha moʻoni lelei, ke ne fakamaʻu, mo fai aka ʻiate kinautolu.

Naʻe ongoʻi ʻe he ʻOtuá ʻenau leá, mo ʻenau fakaʻamua ʻa e tokotaha, tuʻu vahaʻa ʻiate kinautolu mo e ʻOtuá, pea pehē mai ʻa e ʻOtuá. ʻOku lelei kotoa ʻa e lea ʻoku nau fai. Ko ʻenau fiema’u ke fakahoko meʻa mei he ʻOtuá, ko Mosese, pea toe pehē ʻe he ʻOtuá. “Pehē ange mai, kuo pehē honau loto maʻu pe, ka nau ʻapasia kiate au”. Ko e fakaʻamu ia ʻa e ʻOtuá, ki māmani katoa, ke tau ʻapasia kiate Ia maʻu pē. Ko e ʻOtua moʻoni, mo tōtōivi ʻo Hevani, ʻoku Ne fiemaʻu ha lelei, mo ha fakamoʻui, ʻo e kau angahala masiva, ʻoku Ne ʻomi ha fakamoʻoni, ʻoku Ne fai pehē, ʻoku Ne ʻomi ʻa e taimi, mo e faingamālie ke fakatomala, pea fai ʻEne meesí, ʻoku Ne fakaafeʻi kitautolu ke fakatomala, mo tatali ki heʻene manavaʻofá. Kuo Ne fekauʻi mai hono ʻAló, ke huhuʻi kitautolu pea fakakatoa ʻa e fakamolemole, mo e moʻuí, naʻa ne palomesi Hono laumalie maʻa kinautolu te nau lotu ki ai, pea ne folofola mo fuakava mai, ʻoku ʻikai ʻaupito ha fiefia ʻe taha, ʻi he ʻauha ʻa e kau angahala. Kaekehe, ʻoku taha pe ʻa e hala ki he fiefiá, ko e maʻoniʻoni, fekumi ki ai ʻaki ʻa e tui kia Sīsū Kalaisi, he ko e tui kia Kalaisi. ʻOku na ō fakataha pe mo e fiemaʻu ko ia ke tohi ʻa e laó ʻi honau lotó, ke fakasiʻisiʻi ʻa e fai honau loto, ʻi honau ʻulungaangá, ka ke nau fai ʻa e meʻa kuo fekau ʻe he ʻOtuá, ke nau faí ʻo ʻikai ha afe ki toʻomataʻu, pe ki toʻohema.