Pulelulu 1 Ma'asi, 2017

TEUT 4:41-43 ; 19:4 ; NOM 35:6 ; SIOS 20:8

Teutalonome 4:41-43

"41Na‘e toki vahe‘i ‘e Mōsese ha kolo ‘e tolu ‘i he kauvai ‘o Soatani ki he hopo‘anga la‘a; 42ke hola ki ai ‘a e fakapō kuo ne tāmate‘i ha taha ‘i he fāinoa, ka na‘e ‘ikai te ne fehi‘a ki ai mu‘a; koe‘uhi ka hola ‘e ia ki ha taha ‘o e ngaahi kolo ko ia, pea mo‘ui: 43‘a Pēseli ‘i he toafa, ‘i he Misoa, ma‘a ha‘a Lūpeni; pea mo Lemoti ‘i Kiliati ma‘a ha‘a Kata; pea mo Kōlani ‘i Pēsani ma‘a ha‘a Manase."

Teutalonome 19:4

"4Pea ko e anga eni ‘o e fakapō ‘a ia te ne hola ki ai ‘o mo‘ui: ko ia te ne taa‘i hono kaungā‘api ‘i he fāinoa, ka na‘e ‘ikai te ne fehi‘a ki ai ‘i mu‘a."

Nomipa 35:6

"6Pea ko e ngaahi kolo te nau ‘atu ki he kau Līvai–ko e ono‘i kolo hūfanga, ‘a ia te mou tuku ke hola ki ai ‘a e fakapō, pea te mou fakalahi ‘aki ha kolo ‘e fāngofulu mā ua kehe."

Siosiua 20:8

"8Pea ‘i Tu‘a-Soatani fe‘unga mo Sielikō, ‘i hahake, na‘a nau tuku ‘a Pēseli, ‘a ia ‘oku tu‘u ‘i he toafa, ‘i he Misoa na‘e kau ki he matakali ‘o Lūpeni; pea mo Lemoti ‘i Kiliati ‘i he matakali ‘o Kata, pea mo Kōlani ‘i Pēsani mei he matakali ‘o Manase."

Ko e kolo Hufangá. Ko e lao ‘eni, ʻoku fekauʻaki mo e ngaahi kolo, kuo ʻai ia telia ha taha kuo halaia ʻi he fakapō tangatá, ʻoku ne lava ʻo hola ki ai, ʻo fai mei ai ʻa hono fakalakalaka, ʻo aʻu ki hono fakamauʻi. Pea ʻi hono vahevahe ʻo e fonua ʻoku mei ai ʻa e tuʻuʻanga ʻo e ngaahi kolo Hufanga ko ení ʻe tolu, ki he tafaʻaki ki Hahake pe ‘o e Vaitafe Soataní. Ko e ngaahi koló leva, ko Peseli ʻi he toafa ia ʻi Misoá, ko e haʻa Lupení ia naʻa nau tofiʻaʻaki pea mo Lemoti ʻi Kiliati ia, ko e haʻa Katá ia naʻe ʻi aí, pea ko Kolani ʻi Pesani, ko e haʻa Manasé ia naʻa nau ʻi aí.

Ko e ngaahi kolo hufangá ē, ka ʻoku tau maʻu pē mei he laó ni, ʻa e taipe ʻo e kosipelí. Ko e ngaahi kolo hufangá, ʻoku lave mahino fakatouʻosi ki he Fuakava Motuʻá mo e Fuakava Foʻoú, pea ʻoku ʻikai ke tau talaʻa ai, ki he fakataipe fakaʻulungaanga, honau fokotuʻutuʻú. He ʻoku pehē mai ʻe he palofitá, “Mou foki ki he tali tauʻanga ʻa e kau haʻi (kau popula) ʻi he ʻamanaki naʻa mo e ʻaho ni, ʻoku ou tala atu, teu fakafoki kiate koe ʻa e loua” (Sak 9:12). Ko e leʻo ia ʻo e meesi ʻoku ʻomai ʻe he palofita, he ʻoku ne lave mai ki hono maluʻi ʻo e tangata fakapoó, pea ʻe tauhi, ʻo kapau ʻoku ne ʻi he kolo hufangá. Pea punou mai ʻa e ʻapositoló “koia ke ai haʻatau tokoni malohi ʻakitaua kuo ta hola hufanga ke puke ki he ʻamanaki ʻoku tala humaki mai, ʻa e ʻamanaki koia ʻoku tau maʻu moʻo taula hotau laumalie, ʻa e taula malohi mo maʻumaʻuluta, pea kuo li ki he loto tatau” (Hep 6:18,19). Ko e ʻamanaki ʻa e kau tuí ʻia Kalaisi kuo pau, ʻe pau ʻoku fakatātāʻaki ʻa e taula, pea ko e taula ko ení ʻoku ʻikai ke ʻi he ʻoneʻoné, ka ʻoku lotolotonga ʻo e Mafimafi ʻo e ʻOtuá, he kuo lī ia ki he loto tatau. Ko e Potu Toputapu ia ʻa e feituʻu ko ia ʻoku ʻafio ai ʻa e ʻOtuá, ko ia ia ʻa hotau kolo hufangaʻangá. Ko e fakakoloa ē ʻo ʻetau ʻia Kalaisi, pea tuʻu ʻiate ia ʻetau falala mo ʻetau ʻamanaki taʻengata, ʻo taʻemauea ʻe ha toe meʻa ʻe taha ʻo e moʻui mole ngofua ni. ʻOku tau ʻi he mamani mo ʻetau ʻamanaki, kuo ʻi loto tatau mo Kalaisi, ʻEmeni.