Sapate 5 Ma'asi, 2017

TEUT 5:12-15 ; 4:34,37 ; 15:15 ; EKI 20:8 ; 23:12 ; 35:2: HEP 4:4

Teutalonome 5:12-15

"12Tokanga ki he ‘aho Sāpate ke tauhi ia ke tapu, ‘o hangē ko e tu‘utu‘uni koe ‘e Sihova ko ho ‘Otua.13Ko e ‘aho ‘e ono te ke ngāue, ‘o fai ai ho ngaahi nafa kehekehe; 14ka ko hono ‘aho fitu ko e Sāpate ia ‘a Sihova ko ho ‘Otua; tapu ha‘o fai ai ha momo‘i ngāue, ‘a koe mo ho‘o fānau tangata pe fānau fefine, ko ho‘o tamaio‘eiki pe ko ho‘o kaunanga, pe ko ho‘o pulu, pe ko ho‘o ‘asi, pe ha taha ‘o ho‘o fanga manu, pe ko ha ‘āunofo ‘oku ‘i ho kolo; koe‘uhi ke mālōlō ‘a ho‘o tamaio‘eiki mo ho‘o kaunanga ‘o hangē ko koe. 15Pea te ke manatu na‘a ke nofo koe ko e tamaio‘eiki ‘i ‘Isipite, pea na‘e fakahao mai koe ‘e Sihova ko ho ‘Otua ‘aki ha nima mālohi mo ha nima kuo hiki tā: ko hono ‘uhinga ia na‘e tu‘utu‘uni koe ‘e Sihova ko ha ‘Otua ke tauhi ‘a e ‘aho Sāpate."

Teutalonome 4:34,37

"34Pe kuo ala‘aki ‘e he ‘Otua, ‘o ‘alu ‘o to‘o mo‘ona ha pule‘anga mei he lotolotonga ‘o ha pule‘anga, ‘aki ‘a e ngaahi ‘ahi‘ahi, mo e ngaahi faka‘ilonga, mo e ngaahi mana, mo e tau, mo e nima mālohi, mo e nima kuo hiki tā, mo e ngaahi me‘a fakailifia lahi, hangē ko e fu‘u me‘a na‘e fai ma‘amoutolu ‘e Sihova ko homau ‘Otua ‘i ‘Isipite, ‘o ke sio tonu ai? 37Pea ko e me‘a ‘i he‘ene ‘ofa ki ho‘o ngaahi kui, ko ia na‘a ne fili ai honau hako kimui, ‘o ne fakahao mai koe mei ‘Isipite ‘aki hono fōtunga, pea ‘aki hono fu‘u ivi"

Teutalonome 15:15

"15Pea te ke manatu na‘a ke pōpula mo koe ‘i ‘Isipite, pea na‘e huhu‘i koe ‘e Sihova ko ho ‘Otua: ko hono ‘uhinga ia ‘oku ou kouna pehē koe he ‘aho ni."

'Ekisoto 20:8

"8Pea ‘e fai atu ‘a e kau ‘ōfisa ‘enau lea ki he kakai, ‘o pehē, Ko hai ha tangata ‘oku manavahē mo loto vaivai? ke ‘alu ia ‘o foki ki hono ‘api; na‘a vai ‘a e loto ‘o hono kāinga ‘o hangē ko ho‘ona."

'Ekisoto 23:12

"12Ko e ‘aho ‘e ono te ke fai ai ho‘o ngāue, ka ‘i hono fitu ‘o e ‘aho te ke tuku: koe‘uhi ke mālōlō ho‘o pulu mo ho‘o ‘asi, pea ke fakamānava hake ‘a e tama ‘a ho‘o kaunanga mo e muli."

'Ekisoto 35:2

"2Ko ha ono‘i ‘aho ‘e fai ngāue ai, ka ko hono ‘aho fitu ko homou Sāpate mālōlō ia tapu kia Sihova: ko ia kotoa pē te ne fai ai ha ngāue te ne mate."

Hepelu 4:4

"4He kuo ne folofola ‘i ha potu ‘e taha, ‘i he‘ene lau ki he Sāpate, ‘o pehē, Pea na‘e mālōlō ‘a e ‘Otua ‘i hono fitu ‘o e ‘aho mei he‘ene ngaahi ngāue kehekehe."

Ko e fekau pau ʻo e Sapaté. ʻI he ngaahi veesi ko ení, ʻoku ʻi ai ʻa e fekau pau, ke lau ʻa e sapaté ʻoku tapu, pea fakamavaheʻi ia ki he ngaahi kaveinga ʻa e ʻOtuá. Pea ko e fekau ko ení, naʻe fai ia ʻe he ʻOtuá ʻi Moʻunga Sainai (Eki 20:8-11). Ko e Sapate ia ʻo Sihova ko ho ʻOtua. Ko e ʻuluaki ʻuhinga ʻo e Sapaté, ʻoku kau ia ki he ʻEiki. Tapu haʻo fai ha momoʻi ngāue, ko e mālōlō pē. ʻI he ʻaho ko eni ʻo e ʻEikí, ko ʻIsileli kotoa, naʻa nau mālōlō mei heʻenau ngaahi ngāue, mo nau katoangaʻi, ʻa e ngaahi meʻaʻofa lelei ʻa e ʻOtuá, ʻo kau ai ke nau manatuʻi, naʻa nau nofo popula ʻi ʻIsipite, mo e faingataʻa naʻa nau tofangá, pea katoangaʻi ai pē ʻenau tauʻatāiná.

Ko e kau kalisitiane ia ʻoku kehe ʻa e anga ʻo e fekau ko eni, ʻi hono fakafelāveʻi ki he kau tui kia Sīsū Kalaisí. Ko e Sapaté naʻe hoko ia ʻi he ʻaho Tokonakí, ko e ʻaho fitu ia ʻo e uiké. Ko e kau kalisitiane, ko honau taimi lotu hū fakalukufua ki he ʻOtuá ʻi he Sapate. Ko e ʻuluaki ʻaho ia ʻo e uiké koeʻuhi naʻe hoko ʻi he ʻaho Sapaté, naʻe toetuʻu ai ʻa e ʻEikí mei he mate. Ko ia ʻa e taimi ki he ʻEikí ʻaki ʻa e mālōlō, pea fai mo e fakafetaʻi kiate ia, koeʻuhi ko ʻene ngaahi tapuaki pea mo manatuʻi ʻene ngāue fai fakamouʻi kuo hiki ʻi he tohitapú. Ko ia ai, ʻi he toetuʻu ʻa Kalaisí, naʻa ne ʻomai ʻa e tauʻatāina langilangiʻia ki he fānau ʻa e ʻOtuá, ʻaki ʻa e nima mafimafi mo e nima kuo mafao. Ko ia ai ʻi he faiʻaki ʻa e fakatauʻatāiná ʻa e Kosipelí, pea tapuni ai ʻa e laó, pea tau hangatonu leva, ʻo tokangaʻi ʻa e ʻuluaki ʻaho ʻo e uiké, ʻi he fakamanatu ʻa e ivi ngāue langilangiʻia, pea moe kelesí, koeʻuhi ko hotau fakamoʻuí, pea naʻa mo ʻetau tuí, ko e meʻaʻofa. Pea ʻoku totonu mo kitautolu, ke tau tali ʻaki ki he ʻOtuá, ʻa e houngaʻia, mo e fakafetaʻi, pea mo e fiefia, taʻe ʻi ai hano tatau, he kuo tau hiki mei he moʻui fakalaó, ʻo hangē naʻe ʻi ai ʻa ʻIsilelí, ki he moʻui taʻe te tau kau ai ha foʻi meʻa ʻe taha. Ko e meʻa ē naʻe ui kitautolu ki ai ʻe he ʻOtuá, haʻu pē, mo e loto kuo fakaava, ʻo tali ʻa ʻene kelesi ʻia Kalaisí, ʻo tau ʻinasi ai pē ʻi he moʻui taʻengata, ʻo taʻe ʻi ai ha meʻa ʻe taha te tau kau ai, pea ko hono tuhá, ke tau tuku hono langilangi ʻi heʻetau meʻa kotoa pē. Haleluia!