Teutalonome 7:6-11
"6He ko e kakai koe ‘oku tapu kia Sihova ko ho ‘Otua: kuo fili koe ‘e Sihova ko ho ‘Otua ke mou hoko ko ‘ene koloa kānokato ‘i he kakai kotoa ‘oku ‘i he funga ‘o māmani. 7Na‘e ‘ikai hau‘alofa‘ia ‘a e ‘Eiki kiate kimoutolu, pe fili kimoutolu, koe‘uhi ko hamou tokolahi ‘i he ngaahi kakai; he ko e momo‘i me‘a koe, ‘o si‘i ‘i he kakai kotoa pē: 8ka koe‘uhiā na‘e ‘ofa kiate koe ‘e Sihova, pea koe‘uhi foki ko si‘ene fie tauhi ‘a e fuakava na‘a ne fakapapau ki ho‘omou ngaahi kui, ko hono ‘uhinga ia kuo fakahao mai ai koe ‘e Sihova ‘aki ha nima māfimafi, mo huhu‘i koe mei he fale pōpula, mei he nima ‘o Felo ko e Tu‘i ‘Isipite. 9Ko ia, ke ke ‘ilo ko Sihova ko ho ‘Otua ko ‘Elohimi pē ia; ko e ‘Otua Falala‘anga, ‘a ia ‘oku ne fakaai ‘ene fuakava mo ‘ene meesi kiate kinautolu ‘oku ‘ofa kiate ia, mo kinautolu ‘oku tauhi ‘ene ngaahi tu‘utu‘uni, ‘o fai atu ki he afe‘i to‘utangata: 10ka ko kinautolu ‘oku fehi‘a kiate ia ‘oku ne totongi ki honau mata, ‘o faka‘auha kinautolu; ‘e ‘ikai te ne faifaimālie ki ha taha ‘oku fehi‘a kiate ia, te ne totongi pē ki hono mata. 11Ko ia, te ke tauhi ‘a e fekau, mo e ngaahi lao mo konisitūtone, ‘a ia ‘oku ou kouna atu he ‘aho ni, ‘o mou fai ki ai."
Teutalonome 10:22
"22Na‘e ‘alu hifo ki ‘Isipite ho‘o ngaahi kui ‘oku nau toko fitungofulu pē, ka ko ‘eni kuo ‘ai koe ‘e Sihova ko ho ‘Otua ke hangē ko e ngaahi fetu‘u ‘o e langi homou tokolahi"
Teutalonome 14:2
"2He ko e kakai tapu koe kia Sihova ko ho ‘Otua: kuo fili koe ‘e Sihova ke hoko ko ‘ene kakai kānokato ‘i he kakai kotoa ‘oku ‘i he funga ‘o māmani."
'Ekisoto 13:14
"14Pea ka faifai pea fehu‘i kiate koe ‘e ho foha ‘amui, ‘o pehē, Ko e hā ē? Pea te ke tali ki ai, Ko e nima mālohi na‘e ‘omi ai kimautolu ‘e Sihova mei ‘Isipite, mei he fale hopoate."
'Ekisoto 19:5,6
" 5Pea ko eni, kapau te mou mātu‘aki tokanga ki hoku le‘o, mo tauhi ‘eku fuakava, te mou toki hoko ko ‘eku koloa kānokato ‘i he kakai kotoa: he ‘oku ‘o‘oku ‘a māmani kātoa: 6pea te mou hoko kiate au ko e tu‘unga tu‘i taula‘eiki, ko e kakai tapu. Ko eni ‘a e ngaahi lea te ke fai ki ha‘a ‘Isileli."
Nehemaia 1:5
"5Pea u pehē, ‘Ēī Sihova koe ‘Otua ‘o Langi, ko e ‘Otua Lahi mo Fakailifia, ‘a e ‘Afiona ‘oku tauhi ‘a e Kovinānite mo e ‘ofa ma‘anautolu ‘oku ‘ofa kiate koe mo tauhi ho‘o ngaahi tu‘utu‘uni: ke ke fakaongo hifo mu‘a."
1 Kolinito 1:9
"9Ko e ‘Otua ko e toko taha ia ‘oku fai ki he‘ene lea, pea ko ia ia na‘e fou mei ai homou tala ko e kau tangata mo Hono ‘Alo ko Sīsū Kalaisi ko hotau ‘Eiki."
Naʻe fakafēfē ʻa e taau ʻa ʻIsileli, ke fili ia ʻe he ʻOtuá, ʻo maʻolunga ia ʻi he kotoa ʻo e kakai kehe ʻo e taimi ko ia? Naʻe ʻikai ko ha meʻa ia ko e pehē, ko e lelei ʻa ʻIsileli, ka ko e tauhi ʻe he ʻOtuá ia ʻa ʻene palomesi ki heʻenau ngaahi kuí ʻo hangē ai pe ia kuo fili ʻe he ʻOtuá ʻa ʻIsilelí. He kuo ne fili ʻa e kau tui kotoa pē, he ʻahó. Ko ʻene mataʻikoloa kanokato. Pea meʻa tatau pe mo ia ki ʻIsilelí, ʻoku ʻikai koeʻuhi ko haʻatau lelei, ka koʻetau tui kia Kalaisí, kuo fili ai kitautolu ʻe he ʻOtuá ʻi heʻene lelei pe ʻAʻana, pea mo ʻEne kelesi faifio, kuo tau fiefia ai. Pea ko e ngaahi ʻuhinga lelei eni ke fakatokangaʻi 1. Ko e fili kuo fai ʻe he ʻOtuá, pea Maʻana kuo toʻo kinautolu ʻe he ʻOtuá, ke nau hoko ko e kakai makehe kiate Ia, pea ʻikai ʻha to e ʻOtua, ka ko ia pē. 2. Ko e tauʻatāina ʻa e kelesí, kuo mei ai ʻa e fili ko ení. Naʻe halaʻatā ʻiate kinautolu, ha ongoongo lelei, pe mafai ke manakoa ai, ʻikai haʻatau lelei pe ʻofa, ka ko e ʻofa maʻataʻatā pe ʻa e ʻEikí kia kitautolu, pea ʻoku Ne fakahaaʻi mai kia kitautolu ʻoku ʻikai ha ʻuhinga, ka koeʻuhi, ʻoku Ne ʻofa kia kitautolu, pea mo fili kitautolu he huafa ʻo Kalaisi, ke fakatupu mei ai hotau huhuʻi, mo e kotoa hotau ngaahi tapuakí. Pea ko e ʻuhinga ko iá, ʻoku kei hokohoko atu pē, pea heʻikai ke he tukuange, pe liʻaki hono kakai (Hos 14:4). Ko kinautolu ʻoku mate, ko e mate pe ʻi heʻenau kovi pe ʻanautolu, pea ko e kotoa ʻoku nau moʻui, ko e fakamoʻui ʻi heʻenau nofo tonu ʻi he ʻEikí. 3. Ko e ʻalunga eni ʻo e kovinanite, naʻa nau toʻo ʻo anga pehe ni. Ko kinautolu ki he ʻOtuá, pea ko e ʻOtuá ʻe ʻanautolu. Ko ia ʻa e ʻOtuá, ko e ʻOtua moʻoni. Ko e ʻOtua pe ia, ko e ʻOtua tonunga, lava meʻa mo mateuteu maʻu pe, ko ia pe ʻoku Ne fakakakato ʻene ngaahi palomesi pea Ne tali kotoa ʻa e ngaahi ʻamanaki ʻa ʻene kau lotu, pea te Ne fakapapauʻi hono tauhi ʻo e kovinanite, mo e meesi, ʻoku fakahaaʻi ʻa e meesí, ʻo fakatatau ki he kovinanité, ke nau ʻofa kiate Ia mo tauhi ʻa ʻEne ngaahi fekaú, ʻaki ʻa e kotoa honau lotó, mo e kotoa honau laumalié, mo e kotoa honau iví. Ko e ʻafio ʻa e ʻOtuá ʻi hotau loto ʻia Kalaisí mo tauhi ki ai.
No comments:
Post a Comment