Tusite 10 Sanuali, 2017

NOM 32:-1-5; 3:13; 21:32; 32:36, 38; SIOSIUA 13:17,26

Nomipa 32: 1-5

"1PEA na‘e lahi ‘a e monumanu ‘a ha‘a Lūpeni mo ha‘a Kata; ko e me‘a ko ia na‘a nau mālohi ‘aupito ai. Pea na‘a nau vakai ‘a e fonua ‘o Siasea mo Kiliati, pea tā ko e toki potu ia ki he fanga manu. 2Ko ia, na‘e ha‘u ‘a ha‘a Kata mo ha‘a Lūpeni, ‘o nau lea kia Mōsese mo ‘Eliesa ko e taula‘eiki, pea ki he hou‘eiki ‘o e fakataha, ‘o pehē, 3Ko ‘Ataloti, mo Tīponi, mo Siasea, mo Nīmila, mo Hesiponi, mo ‘Eleale. 4Mo Sēpami, mo Nipo, mo Peoni, ‘a e fonua na‘e te‘ia ‘e Sihova ‘i he ‘ao ‘o e fakataha ‘o ‘Isileli, ko e fonua ia ki he fanga manu, pea ‘oku monumanu‘ia ‘a ho‘o kau tamaio‘eiki ko kimautolu. 5Pea nau pehē, Ka kuo mau ta‘imālie ‘ofa ‘i ho ‘ao, pea ke vahe ‘a e fonua ni ki ho‘o kau tamaio‘eiki ko kimautolu ke mau tofi‘a ‘aki; ‘oua ‘e ‘ave kimautolu ki tu‘a Soatani."

Nomipa 3:13

"13he ‘oku ‘o‘oku ‘a e ‘olopo‘ou tangata kotoa pē: ‘i he ‘aho na‘a ku taa‘i ai ‘a e ‘olopo‘ou tangata ‘i he fonua ko ‘Isipite na‘a ku fakatāpui mo‘oku ‘a e ‘olopo‘ou tangata kotoa pē ‘o ‘Isileli, ‘o e manu mo e tangata fakatou‘osi: ‘e ‘o‘oku ‘a kinautolu. Ko au Sihova."

Nomipa  21:32

"32Pea fekau atu ‘e Mōsese ke asiasi ‘a Siasea, pea na‘a nau hamu honau ngaahi kolo fakaongo, ‘o kapusi ‘a e kau ‘Āmoli na‘e ‘i ai."

Nomipa 32:36, 38

"36mo Pete-nimila, mo Pete-hālani: ko e ngaahi kolo ‘aa‘i, mo e ngaahi loto‘ā manu. 38pea mo Nipo, pea mo Peali-meoni (ka na‘e liliu honau hingoa), pea mo Sīpima; pea nau fakahingoa fo‘ou ‘a e ngaahi kolo na‘a nau langa."

Siosiua 13:17, 26

"17ko Hesiponi mo hono ngaahi kolo ‘i he Misoa: ko Tīponi mo Pāmoti-peali, mo Pete-peali-meoni: 26pea na‘e fai mei Hesiponi ki Lama-Mīsipa mo Petonimi, pea mei Mehanemi ki he tafafonua ‘o Tēpili;"

Ko e haʻa Lupení mo e haʻa Katá naʻa nau kole kia Mosese mo ʻEliesa ko e taulaʻeiki mo e fakataha ʻo ʻIsilelí ha nau tofiʻa ʻi he tafaʻaki fakahahake ʻo e vaitafe Soataní. Pea naʻe kau mai ki he kole ko ʻení ʻa e vaeua ʻo e matakali ʻo Manasé. Ka e lolotonga ko ení, ʻoku kei ʻapitanga pē ʻa ʻIsileli, ʻi he lautoka ʻo Moape ʻo nau nofo hokohoko atu ai. ʻI he ngaahi mahina lahi ʻi he kauvai Soataní, ko e haʻa Lupení mo e haʻa Kata, naʻa nau ʻapitanga fakataha ʻi he feituʻu tatau ʻo nau ma’u faingamalie ai ke fai ʻa e foʻi fokotuʻu ko ‘eni. Ko e ongo foʻi meʻa ʻe ua fakamāmani ʻoku na fakaholomuiʻi ʻa e ongo matakali ni, ke fai ʻa e fili ko ʻení, ʻuluakí ko e holi ʻo e matá, pea mo hono uá ko e ʻafungi ʻo e moʻuí (1 Sn 2:16). Ko e fonua ʻoku nau manumanu ki aí, ʻoku ngata pē ʻi he fakaʻofoʻofa hono tuʻuʻanga, mo fakaholomamata ki he matá, ka ʻoku lelei ki he ngoué, pea mo ʻene lelei ki he fafangaʻanga ʻa e monumanu, ka e tefito ki he fangapulúhe naʻa nau maʻu ʻa e fangapulu tokolahi ʻo lahiange ia ʻi he toenga ʻo e ngaahi matakali kehé. Ko ʻenau maʻu ʻa e monumanu tokolahí, ʻoku nau manumanu ai ki he fonuá, ke nau tofiʻa ʻaki. Ka e kehe, kuo nau tulimui pē ki honau manako fakaekinautolu pē, ʻo laka hake ia ʻi heʻenau tuʻutuʻuni fakalukufua maʻa ʻenau leleí. Naʻe ʻikai ke nau lau ʻa e langilangi mo e manakoa ʻo ʻIsileli, pea mo e palomesi ʻa e ʻOtuá naʻe fai kia ʻEpalahame ki he fonua ko Kenani, naʻa nau pipiki ki heʻenau totonu, kuo nau maʻu. ʻI he taimi ni, ko e tokolahi ʻoku nau fekumi ki he meʻa pē ʻa kinautolu, ʻo lahi ange ia ʻi he ngaahi meʻa ʻa Sīsū Kalaisi (Fili 2:21) ʻe tohoakiʻi ʻe heʻenau manako fakamamani, mo fakataimi pē, ʻi he ngaahi lelei ʻo e Kenani faka-hevaní. Kainga, tukuange ʻa māmani, ka e ʻai ʻa Hevani, mo hono hala ʻoku taha pē ko Kalaisi, ko e pea toki monūʻia ē ka hoko.