Falaite 6 Sanuali, 2017

NOM 31:31-35

Nomipa 31:31-35

"31Pea fai ‘e Mōsese mo e taula‘eiki ko ‘Eliesa, ‘o hangē ko e fekau ‘a Sihova kia Mōsese. 32Pea ko e lahi ‘o e vete–tukukehe ‘a e koloa na‘e vete ‘e he kau tau–na‘e toko ono kilu mā fitu mano mā nima afe ‘a e fanga sipi mo kosi, 33pea toko fitu mano mā ua afe ‘a e fanga pulu, 34pea toko ono mano mā taha afe ‘a e fanga ‘asi; 35pea ko e kakai, ‘a ia ko e kau fefine te‘eki ‘ilo ki ha tangata, ko honau lau ko e toko tolu mano mā toko ua afe."

Naʻe fekau ʻe Sihova kia Mosese mo ʻEliesa ko e taulaʻeiki, ké na hanga ʻo lau ʻa e tokolahi ʻo e meʻa moʻui naʻe vete mai ʻe ʻIsileli mei Mitiani, ʻa e tangata mo e manu. Pea fai leva ʻe Mosese mo ʻEliesa ʻo hangē ko e fekau ʻa Sihová. Pea ko e tokolahi leva ʻeni ʻo e vete ʻa ʻIsilelí. Ko e fanga sipi mo e fanga kosi ʻe toko 675,000, ko e fanga pulu naʻe toko 72,000, ko e fanga ʻasi naʻe toko 61,000, ko e kakai fefine kei maʻá naʻa nau toko 32,000 honau tokolahí. ʻOku mahino mei he folofolá ni, ko e ʻOtuá ʻoku pule mo fakaleveleva he ko hono māmaní na’a ne ngaohi ʻa e meʻa kotoa pē. Naʻa Ne ngaohi ʻa e kakai kotoa pē ʻo e māmani, pea naʻa ne ʻofa’i kitautolu. Pea naʻa Ne finangalo foki kia kitautolu ke tau ʻofa ‘o tokoni ki he kakai kehé. Ka koeʻuhi, ko hotau natula angahalá ʻoku tau fiemaʻu ai ke tau fai ʻo lahi ange ʻa e ngaahi meʻa koví, ʻi he ngaahi meʻa ʻoku lelei mo taau. Neongo ko e fonua hitení mo tauhi ʻaitoli e kau Mitianí, ka naʻe lahi pe ʻenau fangamanú mo ʻenau koloa ne vete ʻe ʻIsileli, he ʻoku ʻi ai ʻa e taimi kotoa ʻo e pule fakaleveleva ʻa e ʻOtuá ki he meʻa kotoa pē ʻo māmani. ʻOku fakatupu koloa ʻa e kakai tokolahi pea mo lahi ʻenau paʻanga pea fakakaukau leva ʻa e tokolahi ʻoku nau monuʻia mo lelei honau tuʻunga fakalaumalié. Ko Mitiani eni ʻoku tala ʻe he lahi ʻenau koloa naʻa nau faingamalie fakaemāmani pea ʻikai haʻanau lave ʻiloa ʻe vave honau ngataʻangá mo honau fakamāuʻí. Ko e fakatokangá, ke ʻoua naʻa tuʻu’aki ʻe ha taha ʻa ʻene koloaʻiá pe paʻangaʻiá he ko e ʻoho fononga fakataimi, ka ʻe ngata mo maʻu ia ʻe ha kakai kehe. Ko e koloa fakalaumalié ʻoku taha pē ʻa ia ko hoʻo mai ʻa Sisu Kalaisi ki ho loto he kuo ne ʻosi fai ʻe ia ho fakakoloa fakalaumalie ʻi heʻene pekia ʻi he kolosí mo toetuʻu. Pea tau kau fakataha mo e punaké, “Sīsū ē, ko koe pē siʻeku mataʻikoloa..” (Himi 565:3)