Tu'apulelulu 5 Sanuali, 2017

NOM 31:25-30 ; 3:7 ; 18:3, 21 ; SIOS 22:8

Nomipa 31:25-30

"25Pea folofola ‘a Sihova kia Mōsese, ‘o pehē, 26Lau ‘a e tokolahi ‘o e me‘a mo‘ui ‘i he vete, ‘a e tangata mo e manu, ‘e koe, mo ‘Eliesa ko e taula‘eiki, mo e hou‘eiki ‘ulumotu‘a ‘o e fakataha: 27‘o vaeua ‘a e vete ki he kau pāte‘i tau na‘e ‘alu ‘i he kongakau, mo e fakataha kotoa. 28Pea te ke hapai mei ai ha ‘inasi ma‘a Sihova mei he kau tau na‘e ‘alu ‘i he kongakau, ko e toko taha mei he toko nimangeau mei he kakai, mo e fanga pulu, mo e fanga ‘asi, mo e fanga sipi mo kosi: 29to‘o ia mei he vaeua ko ia, ‘o ‘atu kia ‘Eliesa ko e taula‘eiki mo‘o feilaulau-hapai ‘o Sihova. 30Pea mei he vaeua ‘oku ‘o ha‘a ‘Isileli, te ke to‘o ha taha ‘e puke mei he toko nimangofulu, mei he kakai, mei he fanga pulu, mei he fanga ‘asi, pea mei he fanga sipi mo kosi, ‘io, mei he monumanu kotoa, pea te ke ‘atu kinautolu ki he kau Līvai, ‘a ia ‘oku nau fai ‘a e tauhi ‘o e Tāpanekale ‘o Sihova."

Nomipa 3:7

"7Pea te nau feia ‘ene lakanga tauhi, pea mo e lakanga tauhi ‘a e fakataha kātoa, ‘i he mata Tēniti Fe‘iloaki‘anga, ke ‘anautolu ‘a e ngāue ‘o e Tāpanekale"

Nomipa 18:3, 21

"3Pea te nau fai ho tauhi, mo e tauhi ‘o e Tēniti kātoa: ko e me‘a pē, ‘e ‘ikai te nau ofi ki he nāunau ‘o e Fale Tapu, pe ki he ‘ōlita, na‘a nau pekia, ‘a kinautolu mo kimoutolu. 21Pea ko e me‘a ki ha‘a Līvai, vakai kuo u foaki hono kotoa ‘o e tukuhau hongofulu mei ha‘a ‘Isileli moonau tofi‘a, ko e fetongi ‘o ‘enau ngāue he‘enau fai ‘a e ngāue ‘o e Tēniti Fe‘iloaki‘anga."

Siosiua 22:8

"8Kae‘uma‘ā ‘i he tukuange kinautolu ‘e Siosiua ke ‘alu ki honau ngaahi tēniti, na‘a ne tāpuaki‘i kinautolu: ‘io, na‘a ne lea kiate kinautolu, ‘o pehē, Foki ā ki homou ngaahi tēniti mo e koloa lahi, mo e monumanu tokolahi, mo e siliva mo e koula, mo e kapa mo e ‘aione, mo e ngaahi kofu lahi ‘aupito: mou tufa fakataha mo homou kāinga ‘a e vete ‘o homou ngaahi fili."

Ko e fekau mei he ʻOtuá kia Mosese na’e fekauʻaki ia mo e koloá, pehē foki ki he tangata mo e monumanu naʻe maʻu mei he tauʻi ʻo e kau Mitianí. Naʻe tuʻutuʻuni ʻe he ʻOtuá ke vahevahe tatau ʻa e monumanú mo e kau popula, naʻe kei haó ki ha kulupu tatau ʻe ua. Ko e taha maʻa kinautolu naʻe ʻalu ʻi he taú, pea ko e taha ʻe ʻave ia maʻa kinautolu naʻe nofo pe ʻo ta’ekau he tau he fakataha ʻo ʻIsilelí, pea ko e ʻinasi leva mei he kulupu ʻa e kakai ko ení ʻe ʻave ia ki he kau taulaʻeikí mo e kau Livaí. Ko e lau ʻo e kakai fefine popula naʻe kei hao, ko e sauni fakaofo kuo fai ʻe he ʻOtuá, ki Hono ngaahi fili maʻa kinautolu ko hono kakai. Ko ʻAmaleki, naʻa nau ʻuluaki tau mo ʻIsileli, naʻa nau kei hao fuoloa mai pe, ka ko Mitiani naʻa ne ʻuluaki ʻahiʻahiʻi kinautolu ki he ʻaitolí, naʻe vave mo fakamamahi honau tauteá.

Pea ke toʻo leva mei he ʻinasi ʻo e kau taú, ʻo hapai ia ko e ʻinasi kia Sihova, ʻo tatau ʻi he kakai pea mo e monumanu, ʻa e pulu, ʻasi, sipi mo e kosi, ko e tokotaha mei he toko 500 kotoa pe ʻo ʻave ki he taulaʻeiki ko ʻEliesá, ke ne fai ʻaki ʻa e feilaulau hapai kia Sihova. Pea ke mahino pe ki he kongakaù, naʻa nau ikunaʻi ʻa Mitianí, ko e ikuná ko Sihova, ko ia naʻa ne fekaú pea ko ia naʻe ʻeikitaú, pea kuo pau ke nau houngaʻia ai, mo tuʻu ai ʻenau falalá, pea ke maluʻi kinautolu mei he ʻafungí. Pea ko e meʻa tatau kia kitautolu. Ko e seniti vahe ʻoku tau maʻú, pe ʻoku haʻu hangatonu mai, pe ʻoku fou mai mei ha taʻafaki, ʻoku ʻikai ko ʻete meʻa tokotaha pe. Ko e meʻa kotoa pe ʻoku tau maʻú, ko e haʻu ia mei he ʻOtuá, pea ʻoku Ne kau ki ai. Pea ʻoku totonu ke tau fakafoki ha ʻinasi kiate ia (ki ha tokoni). Pea ʻi ai ha ʻinasi maʻa kinautolu ʻoku ʻi ai ʻenau fiemaʻú. Fai ho lelei tahá, ʻi he meʻa kotoa pe ʻoku ke maʻú. Manatuʻi, ko e ʻOtuá naʻe fai he meʻa ko ia.