Tokonaki 7 Sanuali, 2017

NOM 31:36-40

Nomipa 31:36-40

"36Pea ko e vaeua, ‘a ia ko e ‘inasi ‘onautolu na‘e ‘alu ‘i he kongakau, ko hono lahi ko e sipi mo kosi ‘e toko tolu kilu mā tolu mano mā fitu afe mā nimangeau: 37pea ko e tukuhau kia Sihova mei he fanga sipi mo kosi ko e toko onongeau mā fitungofulu mā nima. 38Pea ko e fanga pulu na‘e toko tolu mano mā ono afe; pea ko hono tukuhau kia Sihova ko e toko fitungofulu mā ua. 39Pea ko e fanga ‘asi ko e toko tolu mano mā nimangeau; pea ko hono tukuhau kia Sihova ko e toko onongofulu mā taha. 40Pea ko e kakai na‘e toko taha mano mā ono afe; pea ko hono tukuhau kia Sihova ko e toko tolungofulu mā toko ua."

Ko e tukuhau kia Sihova mei he vete naʻe maʻu mei Mitianí. ʻA ia naʻe fai ʻa e tukuhau kia Sihová mei he vaeua ‘o e ‘inasi ʻo e konga kau naʻe ʻalu ʻi he taú. Ko e vaeua ʻo e ʻinasi ʻo e kau tau ʻi he fanga sipí mo e kosi, ko e monumanu ʻe toko 337,500 pea koe tukuhau leva kia Sihová ko e sipi mo e kosi ʻe toko 675. Ko e ʻinasi ʻo e kongakaú ʻi he fanga pulú naʻe toko 36,000 pea ko e tukuhau kia Sihová ko e fanga pulu ʻe toko 72. Ko e ʻinasi ʻo e kau tau ʻi he fanga ʻasí ko e ʻasi ʻe 30,500, pea koe tukuhau kia Sihová ko e ʻasi ʻe 61. Ko e kakaí he ʻinasi ʻo e kau taú, naʻe toko 16,000 pea ko e tukuhau kia Sihová naʻa nau toko 32. He naʻe toʻo ʻa e tokotaha mei he toko 500 kotoa pē ʻi he manu mo e kakai ʻo ʻoatu ia ko e tukuhau ki he ʻOtuá ke mahino pē ki haʻa tangata ko e ikuna naʻe hokó ko Sihova naʻe taki muʻa he fonongá. Pea ko ia pē ʻa e ʻEikitaú. Pea ʻoku fakamanatu mai ʻe he punake “ʻEiki ko e kapiteni ʻo e tau ʻo ʻIsileli pea moe takimuʻa ki he kakai fai fononga, ke nau maʻu ʻa e fonua kuo tuku ʻi ʻolunga (Himi 167:1). Pea ko e fakamanatu ia ki ʻIsileli pea mo kitautolu ke tuʻu ʻetau falala ʻi he ʻOtuá ʻi he meʻa kotoa pe pea ke maluʻi kitautolu mei he ʻafungi mo e polepole he ko e natula angahala ia ʻo e faʻahinga ʻo e tangatá pea neʻineʻi fokotuʻu mai ʻe he ʻapositoló, “ʻIo, ke ʻiate kimoutolu ʻa e loto pehē, ʻa ia naʻe ʻia Kalaisi Sīsu foki, ʻa ia neongo ʻe ne ʻafio ʻi he anga ʻo e ʻOtuá ka naʻe ʻikai tene lau ʻene tatau mo e ʻOtuá. Ko e meʻa ‘e haʻaki puke ki ai” (Fili 2:5,6). Ko hono fakatātaaʻi ʻe Sīsū ʻa e anga ʻo e moʻui ʻoku ui kitautolu ki aí ko e tuʻu pē ʻa e falala ki he ʻOtuá mo e loto maʻulalo he kuo tau mate ki he angahalá ka kuo tau moʻui ki he ʻOtuá ʻi he moʻui maʻoniʻoni.