Sapate 1 Sanuali, 2017

NOM 31:1-6 ; 10:9 ; 20:26 ; 27:13

Nomipa 31:1-6

"1PEA folofola ‘a Sihova kia Mōsese, ‘o pehē, 2Te ke mātu‘aki sauni ‘a ha‘a ‘Isileli ki he kau Mitiani: pea hili ia ‘e ului koe ki ho kakai. 3Pea lea ‘a Mōsese ki he kakai, ‘o pehē, Mou teuteu hamou ni‘ihi ki he tau ke nau ‘alu ‘o tau‘i ‘a Mitiani, ke feia ‘a e sauni ‘a Sihova ki Mitiani. 4Te mou fekau atu ki he tau ha toko taha afe mei he matakali takitaha ‘o ‘Isileli. 5Ko ia, na‘e vahe‘i mei he ngaahi toko afe ‘o ‘Isileli ha taha afe mei he matakali; ko e toko taha mano mā toko ua afe kuo ‘osi sāuni ki he tau. 6Pea fekau atu kinautolu ‘e Mōsese ki he tau, ‘a e taha afe mei he matakali, ‘a kinautolu mo Finiasi ko e foha ‘o ‘Eliesa taula‘eiki, ke ‘alu ki he tau; pea ne to‘o ‘a e nāunau tapu, ‘io, ‘a e ongo talupite na‘e fai‘aki ‘a e ifi faka-lali-pakola."

Nomipa 10:9

"9Pea ka ko ho‘omou ‘alu ke fai tau ‘i homou fonua mo e fili ‘oku ne fakamamahi‘i kimoutolu, pea mou ifi faka-lali-pakola ‘aki ‘a e ongo talupite; pea ‘e langa‘i ai ha manatu kiate kimoutolu ‘i he ‘ao ‘o Sihova ko homou ‘Otua, pea ‘e fakahaofi kimoutolu mei homou ngaahi fili."

Nomipa 20:26

"26pea hu‘ihu‘i ‘a e kofu ‘o ‘Ēlone, ‘o ‘ai ki hono foha ko ‘Eliesa: pea ‘e ului ‘a ‘Ēlone ki hono kakai ‘o pekia ai ‘i he potu ko ia."

Nomipa 27:13

"13Pea hili ho‘o mamata ki ai, te ke ului mo koe foki ki ho kakai, ‘o hangē ne ului ho tokoua ko ‘Ēlone"

Ko hono sauni ʻe ʻIsileli ʻa Mitiani. Ko e kau Mitianí ko e kakai nofo holo pe, ko e hako kinautolu ʻo ʻEpalahame pea mo hono mali uá, ko Ketule. Ko e fonua ko eni ko Mitiani, ʻoku tuʻu mamaʻo ki he fakaTonga ʻo Kenaní. Naʻe mamaʻo ʻa ʻenau ʻalu mei honau fonuá ko e kumi ha feituʻu ke fafanga ai ʻenau fanga manú, ʻo hangē ko e kulupu naʻa nau ofi ki he Fonua ʻo e Talaʻofá ʻi he taimi naʻe aʻu mai ʻa ʻIsileli. ʻI he taimi naʻe hola mai ai ʻa Mosese mei ʻIsipité (Eki 2:15) naʻa ne kumi hufanga ki he fonua ko Mitianí. Ko hono malí mo ʻene tamai ʻi he fonó, ko e Mitiani. Ko ʻIsileli mo Mitianí ko e ongo fili feʻiteʻitangi. Ko e sauni ia ko ení, ko e tuʻutuʻuni pe ia ʻa e ʻOtuá he ʻoku fakafoki ia ki he vahe 25 ʻi he taimi naʻe tuʻutamaki ai ʻa ʻIsileli he angahala ʻia Peali-Peolí pea naʻe kau mai ʻa Mitiani ki he meʻa naʻe hokó. Ko e tangata ʻIsileli ko Similai pea mo e fefine Mitiani ko Kosipi naʻe tamateʻi kinaua ʻe Finiasi ko e foha ʻo ʻEliesa ʻo tuʻu ai ʻa e houhau ʻa Sihová. Naʻe teuteu leva ʻa ʻIsileli ki he tauʻi ʻo Mitianí ʻo tautau toko 1000 mei he matakali ʻe hongofulu ma ua ʻo ʻIsilelí, ʻa ia naʻa nau toko 12,000, ʻa ia naʻa nau kau kotoa ʻa e ngaahi matakalí ki he taú, he ko e sauni ʻa Sihova. Pea ko Fineasi naʻa ne fai ʻa e meʻa ʻo tuʻu ai ʻa e tautea (25:7,8). Ko ia ai, naʻe ʻeikitau ʻi he malaʻe tau. Ko e taulaʻeikí, ke ne taki ʻa e kau tau ʻa ʻIsilelí ʻaki ʻa e ngaahi meʻa maʻoniʻoni (naunau tapu) ʻa ia ko e talupite ki he fakaʻilonga ʻo e taú. ʻOku ʻikai ko ha tau pe, ka ko e tau tapu, mo maʻoniʻoni, he ʻoku fai ʻi he huafa mo e mafai ʻo e ʻOtuá. Neongo ko e kau taú ko e toko 12,000, ka ko e fika tokosiʻi ʻi hono fakahoa atu ki honau filí, ka ʻe akoʻi kinautolu ʻe he ʻOtuá. “He ʻoku ʻikai loki ʻa Sihova ke fai ha fakamoʻui ʻaki ha toko lahi pe ha tokosiʻi” (1 Sam 14:6). Pea ʻoku totonu mo kitautolu kāinga Moʻui Foʻou, ko Sīsū Kalaisi ʻoku tau ʻEiki ʻakí ʻoku ne mafeia ʻa e meʻa kotoa pe, ke fakamoʻui kakato ʻa hono kakaí ʻi he meʻa kotoa pe, kae tefito ki heʻene fakamaʻa ʻetau angahalá.