Falaite 13 Sanuali, 2017

NOM 32:16-19; SIOSIUA 4:12,13; 12:1; 22:4

Nomipa 32:16-19

"16Pea nau ‘unu‘unu kiate ia, ‘o nau pehē, Ka mau langa loto‘ā manu pē ‘i heni ki he‘emau monumanu, mo e ngaahi kolo ki he‘emau tamaiki; 17ka ko kimautolu te mau ‘ai mahafu ke vave, ke laka ‘i he ‘ao ‘o ha‘a ‘Isileli, kae‘oua ke mau ‘ave kinautolu ki honau feitu‘u, kae nofo ‘emau tamaiki ‘i he ngaahi kolo kuo ‘aa‘i telia ‘a e kakai ‘o e fonua. 18‘E ‘ikai te mau foki ki homau ngaahi ‘api kae‘oua ke ma‘u‘i ‘e ha‘a ‘Isileli takitaha hono tofi‘a. 19He ‘e ‘ikai te mau ma‘u tofi‘a mo kinautolu ‘i he kauvai ko ē ‘o Soatani, pe ki kō atu: he kuo tō homau tofi‘a ‘i he kauvai ‘o Soatani ki hahake."

Siosiua 4:12,13

"12Pea na‘e a‘a atu ‘a ha‘a Lūpeni mo ha‘a Kata mo e vaeua ‘o e matakali ‘o Manase, ‘o fakakongakau ‘enau ‘alu, ‘i he ‘ao ‘o ha‘a ‘Isileli, ‘o hangē ko e me‘a ‘a Mōsese kiate kinautolu: 13ko e toko fā mano nai kuo ‘osi sāuni ki he tau, na‘a nau laka ‘i he ‘ao ‘o Sihova ki he ‘Alapā ‘o Sielikō ke fai ‘a e tau."

Siosiua 12:1

"1PEA ko eni ‘a e ngaahi tu‘i ‘o e fonua, ‘a ia na‘e taa‘i ‘e ha‘a ‘Isileli, ‘o ma‘u honau fonua ‘i he kauvai ‘o Soatani ki hahake, ‘o fai mei he tele‘a ‘o ‘Alanoni ‘o a‘u ki he mo‘unga ko Heamoni, ‘o kau ai mo e feitu‘u kotoa ‘o ‘Alapā ki hahake"

Siosiua 22:4

"4Pea ko eni kuo tuku ‘e he ‘Eiki ko homou ‘Otua ke mālōlō homou kāinga, ‘o hangē ko ‘ene folofola kiate kimoutolu: ko ia mou foki atu ki homou ngaahi tēniti, ki he fonua ‘oku mou tofi‘a ‘aki, ‘a ia na‘e ‘atu ‘e Mōsese ko e Sevāniti ‘a Sihova ‘i he potu ki kō ‘o Soatani."

Ko e fakamatala ‘a e ongo matakali ‘o Lupeni mo Kata kia Mosese ‘a e anga ‘o e me’a ‘oku nau sio ki aí. Ke nau langa pē ha lotoʻā ke maluʻi ai ʻenau fanga manú pea ke nau ngaohi mo ha kolo, ke nofo malu ai ʻenau fānaú. He ko e konga fonua fakahahake ʻo e vaitafe Soataní kuo ʻosi ikunaʻi ia hili ia ʻa e ngāue fakataha ki ai ʻa e ngaahi matakali kotoa ʻo ʻIsilelí. Ka ko e matakali ʻo Lupeni mo Kata mo e vaeua ʻo e matakalai ʻo Manasé, heʻikai ke nau nofo ai hili ʻa hono fakamaʻa honau nofoʻangá. Naʻa nau palomesi ki ai kia Mosese, te nau tauhi ʻenau ngāue fakataha mo e ngaahi matakali kehe ʻo ʻIsilelí, kae ʻoua, ko e tokotaha kotoa pē, kuo ikunaʻi honau ngaahi konga fonuá ke nau tokoni ki ai. ʻI he hili ange hono tokoniʻi koe ʻe he kakai kehe, pea ke kumi faingamalie koe, ke ke hola mei he tokoni la ke kakai? Fakaʻosi ʻa e ngāué ke kakato, neongo ko e ngaahi konga ko iá heʻikai ʻaonga ia kiate koe. Naʻa nau fakahā foki kia Mosese, te nau laka ʻo kau fakataha mo e ngaahi konga kau ʻa ʻIsilelí, ke ikunaʻi ʻa e fonua ko Kenaní maʻa e toenga ʻo ʻIsilelí. “ʻE ʻikai te mau foki ki homau ʻapí, kae ʻoua kuo maʻu ʻe he ʻIsileli takitaha honau tofiʻá”. Ko ʻenau palōmesi ia, ko ʻenau tōnunga ki he kongakau ʻa ʻIsilelí. Neongo ʻoku tuku honau ngaahi fāmilí ʻi he kauvai fakahahake ʻo Soataní pea heʻikai foki ke nau toe maʻu tofiʻa ʻi ai, he kuo tō honau tofiʻa ʻo kinautolu. Ko e fakamāʻopoʻopo ʻo ʻenau fakamatalá, 1. Te nau takimuʻa ʻi he fānau ʻa ʻIsilelí ʻi he taú, 2. ʻE tuku honau ngaahi fāmilí mo ʻenau koloá, 3. Heʻikai ke nau foki kaeʻoua kuo maʻu tofia ʻa e taha kotoa pē, 4. Heʻikai ke kau he maʻu tofiʻa ʻi Kenaní. Ko ʻenau fakamatala tukupā ia kia Mosesé. ʻOku mahino ko e fonongá ʻoku ʻi ai hono kāveinga ke aʻusia, pea ke tokoniʻi ʻa e kakai kehe, ke nau aʻusia ʻa e kāveinga ʻoku fai ki ai ʻa e fonongá, ko e hū ki Hevani ia Kalaisi, ʻo ʻikai ko Kenani ʻi māmaní.