Sapate 8 Sanuali, 2017

NOM 31:42-47 ; 18:8,19 ; 31:30

Nomipa 31:42-47

"42Pea mei he vaeua na‘e ‘o ha‘a ‘Isileli, ‘a ia na‘e vahe‘i ‘e Mōsese mei he kau tau 43(pea ko e lahi ‘o e vaeua na‘e ‘o e fakataha ko e fanga sipi mo kosi ‘e toko tolu kilu mā tolu mano mā fitu afe mā nimangeau, 44pea tolu mano mā ano afe ‘a e fanga pulu, 45pea tolu mano mā nimangeau ‘a e fanga ‘asi, 46pea taha mano mā ono afe ‘a e kakai); 47‘io, na‘e to‘o ‘e Mōsese mei he vaeua ‘o ha‘a ‘Isileli ‘a ia na‘e puke mai, ko e taha mei he toko nimangofulu, mei he kakai, pea mei he monumanu, ‘o ne ‘ange kinautolu ki he kau Līvai na‘e fai ‘a e tauhi ‘o e Tāpanekale ‘o Sihova; ‘o hangē ko e tu‘utu‘uni ‘a e ‘Eiki kiate ia."

Nomipa 18:8, 19

"8Pea folofola ‘a Sihova kia ‘Ēlone ‘o pehē, pea ko au eni kuo u ‘atu kiate koe ‘a e tauhi ‘o ‘eku ngaahi feilaulau-hapai, ‘io, ‘a e ngaahi me‘a kotoa pē kuo fakatapu ‘e ha‘a ‘Isileli, kuo u foaki kiate koe mo‘o ‘inasi, pea ki ho ngaahi foha foki ko e fatongia ta‘engata. 19Ko e ngaahi me‘a tapu kotoa ‘oku hapai ‘e ha‘a ‘Isileli kia Sihova kuo u ‘atu ia kiate koe, pea ki ho ngaahi foha, pea ki ho ngaahi ‘ōfefine foki, ko e fatongia ta‘engata: ko e fuakava fakamāsima ia, ta‘engata, ‘i he ‘ao ‘o Sihova, kiate koe mo ho hako foki."

Nomipa 31:30

"30Pea mei he vaeua ‘oku ‘o ha‘a ‘Isileli, te ke to‘o ha taha ‘e puke mei he toko nimangofulu, mei he kakai, mei he fanga pulu, mei he fanga ‘asi, pea mei he fanga sipi mo kosi, ‘io, mei he monumanu kotoa, pea te ke ‘atu kinautolu ki he kau Līvai, ‘a ia ‘oku nau fai ‘a e tauhi ‘o e Tāpanekale ‘o Sihova."

Ko e tukuhau ʻa Sihová ʻa ē naʻe vaheʻi mei he kau taú naʻe ʻoange ia ʻe Mosese kia ʻEliesa ko e taulaʻeiki ʻo hangē pe ko e tuʻutuʻuni ʻa Sihová. Pea naʻe ʻomi leva ʻa e vaeua ʻo e veté, ʻa ia naʻe ʻoange ki he fakataha ʻo ʻIsilelí ʻo toʻo mei ai ʻa e tukuhau kia Sihová he naʻe tokolahi tatau ʻa e monumanu mo e kakai naʻe ʻi he kau taú, pea moe ʻinasi naʻe ʻi he fakatahá ko e sipi ai pē mo e kosi ʻe toko 337,500 pea mo e pulu ʻe toko 36,000 mo e ʻasi ʻe toko 30,500 kaeʻumaʻā ʻa e kakai ʻe toko 16,000 honau tokolahi pea koe tukuhau kia Sihova, ko e tokotaha mei he toko 50 kotoa pē ʻo tatau ʻa e monumanu mo e kakai. Pea naʻe toʻo ʻe Mosese ʻa e tukuhau ʻa Sihová ʻo ʻoange ki he kau Livaí he ko kinautolu naʻa nau fai ʻa e tauhi ʻo e tapanekale ʻo Sihová.

Naʻe maʻu ʻe he ʻOtua ʻa e tukuhau mei he koloa vete ʻe ʻIsileli mei Mitiani, ke fakamoʻoniʻi ʻa ʻEne fakaleveleva, ʻa ʻene pulé ʻiate kinautolu fakalukufua, ʻo ʻIsilelí he ko ia honau tuʻi ʻoku fai ki ai ʻa e tukuhau, pea ko Ia naʻa Ne ʻoange kiate kinautolu ʻa e ikuná. ʻOku totonu foki ko e hā pe ha meʻa ʻoku tau maʻu, ʻoku totonu ke ʻi ai ʻa e ʻinasi ʻo e ʻOtuá mei he ʻinasi ʻo e fakatahá. Naʻe fiemaʻu ʻe he ʻOtuá ʻa e taha mei he 50 kotoa pē pea mei he ʻinasi ʻo e kau taú pe kau sotiá, ko e tukuhau ko e 1 mei he 500 kotoa pē ko e kakai naʻa nau maʻu faingofua honau ʻinasi taʻe ʻi ai ha fakatuʻutamaki, pe ha halaia ʻe taha. ʻOku siʻi pe ʻa e faingamalie ʻoku tau maʻu, ke tau fakalangilangiʻi ‘aki ʻa e ʻOtuá ʻi heʻetau ngaahi fakafoʻituitui ʻoku tau faí, he ko hono taʻinga ʻa e meʻa kuo fai ʻe he ʻOtuá maʻa kitautolu, kae tautefito ki heʻene ʻomi ʻa Kalaisi ke tau moʻui ai.