Monite 9 Sanuali, 2017

NOM 31:48-54; EKI 30:12-16; TEUT 20:14

Nomipa 31:48-54

"48Pea ‘unu‘unu mai kia Mōsese ‘a e hou‘eiki na‘e pule ki he ngaahi toko afe ‘o e hōsitē, ‘a e ngaahi kapiteni ‘o e ngaahi toko afe, mo e ngaahi kapiteni ‘o e ngaahi toko teau: 49pea nau pehē kia Mōsese, ‘Ēī, kuo mau lau ‘a e tokolahi ‘o e kau tau ‘oku mau pule ki ai, pea kuo ‘ikai ke mole hamau toko taha. 50Ko ia, kuo mau ha‘u mo kimautolu ha kōpano kia Sihova takitaha mei he me‘a kuo ne ma‘u, ko e ngaahi siueli koula, ‘a e vesa mo e lelu, ‘a e mama sila, ‘a e hau mo e fakama‘u, ke feia ha fakalelei ma‘a homau laumālie ‘i he ‘ao ‘o Sihova. 51Pea to‘o ‘e Mōsese mo ‘Eliesa taula‘eiki ‘a e koula meiate kinautolu, ko e koto siueli fua pē. 52Pea ko e lahi ‘o e koula ‘i he feilaulau na‘e hapai kia Sihova ko e sikeli ‘e taha mano mā ono afe mā fitungeau mā nimangofulu: ko e feilaulau-hapai ia mei he ngaahi kapiteni ‘o e ngaahi toko afe mo e ngaahi kapiteni ‘o e ngaahi toko teau. 53(Kuo vete ‘e he kau tau takitaha ma‘ana.) 54Pea to‘o ‘e Mōsese mo ‘Eliesa taula‘eiki ‘a e koula mei he hou‘eiki ‘o e ngaahi toko afe mo e hou‘eiki ‘o e ngaahi toko teau, ‘o na ‘omi ia ki he Tēniti-Fe‘iloaki‘anga, mo‘o fakamanatu ‘o ha‘a ‘Isileli ‘i he ‘ao ‘o Sihova."

'Ekisoto 30:12-16

"12‘Oka ke ka lau ‘a e kakai ‘Isileli, ‘a e kakai ‘oku tu‘u, te nau takitaha ‘omi ha holo ki he ‘Eiki, ke huhu‘i ‘aki hono laumālie, ‘i he taimi ‘o ho‘o lau kinautolu; ke ‘oua na‘a ai ha tautea ‘e tō kiate kinautolu ‘i he fai honau lau. 13Ko eni ‘a e me‘a ‘e ‘omi ‘e ia kotoa pē ‘oku laka atu ki he kakai kuo ‘osi lau, ko ha haafe sikeli: (ko e lau ki he sikeli ‘o e Fale Tapu, ‘o uofulu kela ‘a e sikeli ‘e taha) ‘io, ko e haafe sikeli ko e feilaulau-hapai ia kia Sihova. 14Ko kinautolu kotoa pē ‘oku laka atu ki he kakai kuo ‘osi lau, ‘o kamata mei he uofulu ta‘u ‘o fai hake, te nau feia ha feilaulau-hapai kia Sihova. 15‘E ‘ikai ‘omi ‘e he koloa‘ia ke lahi, pea ko e masiva ‘e ‘ikai te ne ‘omi ke si‘i ‘i he haafe-sikeli, ‘i he‘enau ‘omi ‘a e feilaulau-hapai ki he ‘Eiki ke huhu‘i ‘aki homou laumālie. 16Pea te ke tali ‘a e pa‘anga huhu‘i mei ha‘a ‘Isileli, pea te ke tuku ia ki he ngāue ‘o e Tēniti Fe‘iloaki‘anga, ke hoko ko e me‘a fakamanatu ‘o ha‘a ‘Isileli ki he finangalo ‘o e ‘Eiki, ke huhu‘i ‘aki homou laumālie."

Teutalonome 20:14

"14ka ko e kau fefine, mo e tamaiki, mo e monumanu, mo e me‘a kotoa pē ‘i he kolo, ‘io, ‘a hono vete, te ke ta‘ofi ma‘a u; pea te ke kai ‘a e vete ‘o ho ngaahi fili, ‘a ia kuo foaki ‘e Sihova ko ho ‘Otua kiate koe."

Ko e finangalo ‘o e ‘Otuá ʻe tuʻú. Lolotonga ko iá, ko e lēkooti ko ē ʻa hono fakaʻauha ʻo e kakai Mitianí ʻoku fuʻu fakamamahi, mo fakamanavahē ʻaupito. Ka ko e lēkooti mei he kau ʻofisa ʻo ʻIsilei, naʻe ʻikai ha taha ʻe mate, pē mole ʻiate kinautolu, ʻi he tau naʻa nau fakahokó. Pea ko e kau ʻofisá naʻa nau haʻu kia Mosese ke fakahā ʻenau fakamālō, mo ʻenau houngaʻia ki he ʻOtuá, naa nau loto pē ke fai ʻenau kopano, pē ko ʻenau tukumoʻui makehe ki he ʻOtuá, he ko ia naʻe tuʻu ʻi heʻenau meʻa kotoa pē, ʻi hono fakahaofi kinautolu mo honau maluʻi mei he mole, mo e mate naʻa nau fehangahangai mo ia. Pea koe fakakatoa ʻa e meʻaʻofa makehe ʻa e kau ʻofisá, naʻe laka hake ʻi he pauni koula fakakatoa ʻe 400. Pea naʻe ʻave ia ʻe Mosese ʻo tuku ʻi he Tapanekalé, ko e fakamanatu ʻo e ngāue fakaofo, kuo fai ʻe he ʻOtuá maʻa hono kakaí. Pea kuo fai ‘eni ʻe he kau ʻofisá ʻi he hingoa kotoa ʻo kinautolu naʻa nau ō mo kinautolu ʻi he taú. Naʻe fai ‘e he kau ʻofisá ʻa e feilaulau tukumoʻui ko ʻení, ke fai ha fakalelei maʻa honau ngaahi laumalie kia Sihová. Naʻe ʻikai ko ʻenau fai ʻeni ʻe he kau ʻofisá, ko ha ʻeke haʻa nau pale, pē totongi ‘i he ngāue kuo nau faí, ka naʻa nau fiemaʻu ʻa e fakamolemole ʻa ia ʻoku nau hala aí, pea nau loto foki, ke fai ha fakamālō kiate ia ʻi heʻene fakahaofi enau moʻuí, ʻa ē, naʻe tototnu ia ke mole he naʻa nau toko 12,000 ʻo e kongakau naʻa nau fakaʻauha ʻa Mitiani ʻe ʻikai mole ha foʻi tokotaha pea ʻoku fuʻu fakaofo fau ʻa hono maluʻi kinautolu pea mahino pē ki he kau ʻofisá ʻa ʻenau hao ʻi he ʻOtuá, ka ne fakaʻauha ʻa e kotoa ʻa Mitianí. Pea ʻoku totonu mo kitautolu he ʻahó ni ke tau fakatokangaʻi ko e meʻa kotoa pē ʻe finangalo ki ai ʻa e ʻOtuá, te ne fai ʻe ia hono fakahoko ʻ o tatau pe, pē ko e tau, pē ko e fai ha ngāue, neongo ʻene hā faingataʻá ka ʻoka finangalo ʻa e ʻOtuá ki he meʻa koiá, pea te ne fai ʻe ai pe, hono fakahaofi moʻui mo e fakaʻauha ʻa e tafaʻaki ʻe taha, pē ko ha meʻa fakapaʻanga te ne fai pe ia ʻe Ia. Ko e faingataʻa pē, ke tau ʻilo ki he meʻa taki taha, pē ʻoku Ne finangalo ki ai, pea tene fai ia ʻe Ia ʻo hangē pe ko ʻetau ʻilo pau ʻoku ne finangalo ke fakamoʻui kitautolu ʻaki ʻetau tui falala kia Kalaisi pea ʻi heʻetau tui kia Kalaisí, pea te Ne fai leva ʻe ia hotau fakamoʻuí.