Tusite 9 Sanuali, 2018

Fakamaau 3:26-30; 5:14; 6:34; Siosiua 2:7; 17:15; 1 Sam 13:3; 17:47 

Fakamaau 3:26-30

"26Kae lolotonga ‘enau tatali na‘e hola ‘a ‘Ēhuti, ‘o ne laka atu ‘i he ngaahi tamapua, ‘o ne hao atu ki Seila. 27Pea ‘i he‘ene a‘u atu, na‘a ne ifi talupite ‘i he fonua mo‘unga ‘o ‘Ifalemi, pea na‘e ‘alu hifo mo ia ‘a ha‘a ‘Isileli mei he fonua mo‘unga, pea taki ‘e ia. 28Pea ne pehē kiate kinautolu, Mou muimui kiate au: he kuo tuku ‘e he ‘Eiki homou ngaahi fili ‘a e kau Moape ki homou nima. Pea na‘a nau muimui kiate ia, ‘o nau puke ‘a e ngaahi a‘a‘anga ‘o Soatani ki Moape, pea na‘e ‘ikai te nau tuku ha taha ke a‘a atu. 29Pea na‘a nau taa‘i ‘i he taimi ko ia ha kau Moape ‘e taha mano nai, ko e kau tangata kaukaua kotoa pē mo to‘a: pea na‘e ‘ikai hao ha taha. 30Pea na‘e fakavaivai‘i ‘a Moape ‘i he ‘aho ko ia ‘i he lalo nima ‘o ‘Isileli, pea na‘e nonga ‘a e fonua ‘o valungofulu ta‘u."

Fakamaau 3:28 “Pea ne pehē kiate kinautolu.Mou muimui kiate au, he kuo tuku ʻe he ʻEikí homou ngaahi filí ʻa e kau Moape ki homou nimá” Ko Ehutí, ko ia ʻa e helo naʻá ne fakahoko ʻo e tamateʻi fakalao ʻo e fai sauni ʻa e ʻOtuá, naʻe ʻikai haʻane halaia, ka naʻá ne falala ki he maluʻi ʻa e ʻOtuá. Naʻá ne hola ʻo aʻu ki Seila ko e koto vao ʻakau matolu. Naʻe ʻikai ke ne ʻalu ki ha toe feituʻu kehe ka ko e feituʻu pe naʻe nofo ai ʻa Ekeloni, he ko Ekeloní naʻá ne tuku ʻe ia ʻa hono fonua ʻa Moape ʻa ē ʻoku ʻi he kauvai ia ʻe taha ʻo Soataní, kae ngaohi ʻe ia hono nofoʻanga ʻi he kolo ʻo e ʻakau paame ʻi he fonua ko Kenaní. Naʻe koloaʻia ange ia ʻi hono fonua, pea ko ia pe ʻa e feituʻu naʻe tamateʻi ai iá. Ko e ngaahi tamapua ʻaitoli naʻe ʻi Kilikalí naʻe ʻikai mamaʻo meiate ia, pea ko e meʻa ia naʻá ne fakafeʻunga kiate ia, ke ne nofo ai ko hono kolotau, pea ke ne hoko ko e ʻeiki, ki he kakai ʻa e ʻOtuá ko ia ai naʻe tuʻusi ai iá. Kuo tamateʻi ʻe Ehuti ʻa e tuʻi Moapé, ko ʻene luluʻi ia ke toʻo ʻa e ioke fakapopulá, pea ne ui leva ʻa e kongakau ʻi he moʻunga Ifalemí, pea ne taki kinautolu ʻe ia. Pea ne ifi ʻa e talupite fakasiupeli, ko hono fakaongo mai ia, mo hono fakaʻilongaʻi ʻo e tauʻatāina, mo e fiefia kuo hoko ki ʻIsilelí. Ko e tahaʻi meʻa naʻá ne fai kotoa ení ʻi he tuí, naʻá ne fakalotolahiʻi ʻa Ehutí pea ne ʻoange ʻa e fakalotolahi ki heʻene kau sotiá, mei he mafai ʻo e ʻOtuá, naʻa ueʻi kinautolú ke nau taaʻi ʻa e kau Moape ʻe toko tahamano ʻi he ʻaaʻanga ʻi Soatani ki Moapé, ʻo ʻikai ke hao ha taha.Pea ko e ola ʻoi ʻenau ikuna ko ení, ko hono fakamaʻa ʻa e fonuá mei he kau fakafepaki ʻa e kau Moapé, pea naʻe nonga mo mālōlō ʻa e fonuá ʻi he taʻu ʻe valungofulu. ʻOku ʻi ai ʻa e ʻamanaki ʻe ʻi ai ha liliu ʻiate kinautolu, pea mo ʻenau vakaiʻi ʻa e ʻaitolí, tuʻunga ʻi he tohoaki naʻe fai ʻe ʻEhutí, pea ke nau hoko atu ʻi ha konga lelei ʻo e taimi ko ení. ʻOku tuʻunga pehē ʻa e kau maʻoniʻoni, kuo nau ʻi he ʻEiki ko Sīsū Kalaisi, ʻa ʻenau maʻu ʻa e monūʻia ko ia ko e mālōlō taʻengata ʻi he Kenani fakalangí, ko e fiefia pe ʻo taʻengata. Kau ki ai he ko hotau monū ia.