Monite 15 Sanuali, 2018

Fakamaau 5:1-5; ‘Ekisoto 65:1; Teutalonome 32:1,3; 1 Kalonikali 17:16; Saame 2:10; 18:47; 68:7

Fakamaau 5:1-5

"1PEA toki hiva ‘i he ‘aho ko ia ‘a Tepola, pea mo Pēlake ko e foha ‘o ‘Apinoame, ‘o pehē,

2Mou fakafeta‘i ki he ‘Eiki,

‘I he mu‘aki ‘a e kau takimu‘a ‘o ‘Isileli,

Mo e vēkeveke fai ‘a e kakai.

3Me‘a mai, ‘a e ngaahi tu‘i,

Fanongo mai ‘a hou‘eiki;

Ko au ē te u lave ki he ‘Eiki,

Te u tā nafa kia Sihova ko e ‘Otua ‘o ‘Isileli.

4‘Eiki, ‘i ho‘o me‘a atu mei Seia,

‘I ho‘o hā‘ele atu mei he vao ‘o ‘Ītomi na,

Na‘e tekelili ‘a e fonua,

na‘e tutu‘u foki ‘a e langi,

‘Io, ko e ngaahi ‘ao na‘e lōvai. 5Na‘e ngalaku ‘a e ngaahi mo‘unga‘i he ‘ao ‘o e ‘Eiki, ‘Io, ‘a Sainai na ‘i he ‘ao ‘o Sihova ko e ‘Otua ‘o ‘Isileli"

Fakamaau 5:2 “Mou fakafetaʻi ki he ʻEikí, ʻi he muʻaki ʻo e kau takimuʻa ʻo ʻIsilelí mo e vekeveke fai ʻa e kakaí”.

Ko e faʻu ʻe Tepola ia ʻa e hivá ni, ʻo hangē ko ʻene ʻasi ʻi he v.7. Pea mo e ngaahi lea totonu hono ngāueʻaki. Naʻá ne hivaʻi ʻe Tepola. Naʻá ne ngāueʻaki ʻene ngaahi meʻaʻofa ʻo hangē ko e palofita ia, ke ne faʻu ʻa e hiva kaeʻumaʻā ʻene hoko ko e fakamaau ia ki ʻIsileli (4:4). Ka ko ʻene meʻaʻofa fungani, ko hono nofoʻia ia ʻe he Laumalie ʻo e ʻOtua, ʻo ne maʻu poto ai ke ne fakahoko ʻa e finangalo ʻo e ʻOtuá ʻi he founga kehekehe, ʻo aʻu mai ʻeni ki he faʻu hivá. Fakatokangaʻi lelei angé ko e ʻOtuá ʻoku ʻAʻana ʻa e palani maʻae tokotaha kotoa pē kuó ne fakaʻa,ta mai ki hono māmaní. Ko e fehuʻí, kuó ke fakatokangaʻi nai ʻa hoʻo meʻaʻofa foaki ʻe he ʻOtuá? ʻOku fēfē ʻa hoʻo ngāueʻakí? ʻOku ʻikai ha taimi ʻoku totonu ke mole ʻi hono fakafoki ki he ʻEikí ʻa e fakamālō fai meesi, pea koeʻuhi ko ʻetau ngaahi fakafetaʻi, ʻokú ne tali mo ʻene hoifua ki ai, ʻi he taimi ʻoku tafe mai mei ha loto ʻoku fonu he houngaʻia, ka ekimuʻa pea kamata ke taumatala ʻa e ʻofá. Ka ko hono fai ʻa e founga ko ení ko hono katoangaʻi ʻa e ngaahi ngāue fakaofo ʻa e ʻOtuá ke aʻu ʻa e moʻoni ko ia ki he loto ʻo e tangatá, ko ia aí, ko e ʻofá mo e houngaʻiá ʻe tupu ʻo lahi mo fakamafana, pea mo faiaka loloto ʻi he ngaahi loto ʻo e kau tuí.Ko e ngaahi meʻa naʻe hokó ʻe fai ʻa e ʻilo lahi ki ai, pea ʻe fai mo e manatu loloa ki ai. Ka ko e hā ʻa e meʻa ʻa Tepola, Pelaki mo e kautaú naʻe faí, ko e ʻEikí kuopau ke ne maʻu kotoa ʻa e fakafetaʻí. Ko e loto vekeveke faí ko e ivi mo e lava meʻa, ko e haʻu kotoa ia meiate Ia. Pea ko ʻIsileli naʻe ʻi ai ʻa e fiemaʻu lahi makehe ke nau fai ha fakafetaʻi ki he ʻEikí, ʻi heʻene fakahaofi kinautolu mei honau kau fakafepakí. Pea ke nau fakafetaʻi foki kiate Ia, koeʻuhi ko e kelesi naʻá ne ʻoange ki he ngaahi kaumeʻa ʻo ʻIsilelí, koeʻuhi ko e loto ʻa e kakai ko iá ke nau tokoni ʻi he taú. Ko e ʻOtuá ʻoku taau ke ne maʻu ʻa e langilangi ʻo e kotoa ʻo e ngaahi ngāue lelei ʻi he taimi pe te tau fai ai ʻa e ngāue ko iá. Ko e ngaahi tuʻi ʻo e ngaahi kakai ʻoku nau nofo takatakai, naʻa nau feingaʻi ke fakaʻauha ʻa ʻIsilelí. Ko e hiva ko ení ke nau fanongo ki ai, ki he tuʻunga ʻo e lavameʻa ʻa e toʻutangatá ni. Ko e palofita ʻoku ui kiate kinautolu, ke nau fanongo ki he ngāue ʻoku fai ʻe he ʻOtuá maʻa ʻIsileli, ke tau ako mei ai.