Falaite 12 Sanuali, 2018

Fakamaau 4:4-9; 5:2; Senesi 35:8; ‘Ekisoto 14:4; Siosiua 19:37; 1 Tu’i 18:40; Hepelu 11:32 

Fakamaau 4:4-9

"4Pea ko Tepola ko e fefine palōfita, ko e uaifi ‘o Lapitoti, ko ia ia na‘a ne fai fakamaau ‘i ‘Isileli ‘i he taimi ko ia. 5Pea na‘a ne nofo ‘i he lolo Paame ‘o Tepola, ‘i he vaha‘a ‘o Lama mo Pēteli ‘i he fonua mo‘unga ‘o ‘Ifalemi; pea na‘e ‘alu hake kiate ia ‘a ha‘a ‘Isileli ke fai honau fakamaau. 6Pea fekau atu ‘e ia, ‘o ui mai ‘a Pēlake ko e foha ‘o ‘Apinoame mei Kētesi Nafitalai, pea ne pehē kiate ia, ‘Ikai kuo fekau ‘e he ‘Eiki ko e ‘Otua ‘o ‘Isileli, ‘o pehē, ‘Alu ‘o fakatē tau ‘i he mo‘unga ko Tepoa, pea ‘alu mo koe ha toko taha mano mei ha‘a Nafitalai mo ha‘a Sepulone? 7Pea te u fakatē mai kiate koe ki he luoki vai ‘o Kīsoni ‘a Sīsela ko e ‘eikitau ‘a Siapini, mo ‘ene ngaahi sāliote mo ‘ene hōsitē; pea te u tuku ia ki ho nima.

8Pea tali ‘e Pēlake kiate ia, Kapau te ta ō mo koe, pea te u ‘alu pē; pea kapau ‘e ‘ikai te ta ō mo koe, pea ‘e ‘ikai te u ‘alu.

9Pea pehē ‘e ia, Seuke, te ta ō pē: ka neongo ia, ka ‘oku ‘ikai ko koe te ke lāngilangi‘ia ‘i he me‘a te ke ‘alu ke fai; koe‘uhi ‘e fakatau ‘e he ‘Eiki ‘a Sīsela ki he nima ‘o ha fefine."

Fakamaau 4:4 “Pea ko Tepola ko e fefine palofita, ko e uaifi „o Lapitoti, ko ia ia na‟e fai fakamaau „i „Isileli „i he taimi ko ia”. Ko Tepolá ko e palofita fefine, naʻá ne fafale mo e ʻOtua, he naʻe akonekina ia ʻi he ʻiloʻi ʻo e ʻOtua, ʻaki hono fakamanavaʻi ia ʻaki ʻa e Laumalie ʻo e ʻOtua, pea naʻá ne maʻu ʻa e meʻaʻofa ʻo e poto, naʻe ʻikai ke ne faifainoaʻia. Ka naʻá ne tukupā kakato ki he ngāue ki ʻIsileli. Ko e fai fakamaau ia ki ʻIsilelí, ʻi he taimi naʻe fakafepaki ai ʻa Siapini kiate kinautolú. Naʻe fai fakamaau ʻo hangē ha palofita fefine, pea ne hangē ko e ngutu ia ʻo e ʻOtuá kia kinautolu, he naʻá ne fakatonutonu ʻa e fehalaaki mo toe fakaleleiʻi ʻa e tonounou, ʻo tautefito kiate kinautolu ʻoku nau felāveʻi mo e fai ʻo e hū ki he ʻOtuá. Naʻe haʻu ʻa e fānau ʻa ʻIsilelí kiate ia ki he fakamaaú, naʻa nau ʻilo ai ʻa e fakamoʻuí ʻiate ia. Pea ko kinautolu ʻoku nau fekumi ʻOtuá koeʻuhi ko e kelesi, te nau maʻu kelesi mo e melino, kelesi mo e fiemalie kelesi mo e langilangi. ʻI he tataki ʻa e ʻOtuá naʻe fekau ʻe Tepola ʻa Palaki ke ne tuʻu ʻo taki ʻa e kau taú, ʻo nau fehangahangai mo e kongakau ʻa Siapiní, ʻoku nau ʻi he malumalu ʻo Sisela ko e ʻeikitaú. Pea ne taki ʻa Pelaki, ke ne taki ʻa e kau tangata ʻe toko tahamano, pea ʻoua te ne manavahē ko ʻenau tokosiʻí, he kuo pehē ʻe he ʻOtuá ko ia mo kinautolu te nau fakamoʻui ʻa ʻIsilelí. He te ne taki ʻakinautolu mei hono matakali ʻoʻona, pea mo kinautolu mei he matakali ʻo Sepuloní, pea feʻunga leva ʻa e kau taú. Naʻe kole ʻa Pelaki kia Tepola, ke ne palomesi ange te na ō mo ia ki he malaʻe taú, heʻikai te ne lava ke tauhi ʻene leá, kaeʻoua kuo na ō mo ia. Naʻe palomesi ʻa Tepola te na ō mo ia. He ko kinautolu ʻoku nau ʻi he huafa ʻo e ʻOtuá ʻo ui ʻa e kakai kehe ki honau fatongiá, kuopau ke nau mateuteu ke tokoniʻi kinautolu ki he fatongia ko iá. Pea ʻi heʻene loto ke ʻalu mo Pelakí, naʻá ne tala kiate ia, ko e ʻOtua te ne fakatau ʻa Sisela ki he nima ʻo ha fefine, ko Siaili ia (v.21). Ko e māmani ʻe tala ʻa e ikuna ki he nima ʻo Tepolá. Pea ko e ʻOtua ʻe kakato ʻa e ikuna ʻaki ʻa e nima ʻo Kalaisi ʻi hono kolosí, ko e ikunaʻi kakato ia ʻo e māmaní.