Pulelulu 3 Sanuali, 2018

Fakamaau 2:16-19; 3:9,10,15; ʻEkisoto 34:15,16; Levitiko 17:7; 1 Samiuela 12:11; Ngaue 13:20

Fakamaau 2:16-19

"16Pea na‘e toki fokotu‘u ‘e Sihova ha kau fakamaau, ‘a ia na‘a nau taukapo‘i kinautolu mei he nima ‘o e kakai na‘e vete kinautolu. 17Ka na‘e ‘ikai foki te nau tokanga ki honau kau fakamaau, ka na‘a nau tango ki he ngaahi ‘otua kehe, ‘o punou ki ai: na‘e vave ‘enau afe mei he hala na‘e fou ai ‘enau ngaahi kui, ‘enau tokanga ki he ngaahi tu‘utu‘uni ‘a Sihova; na‘e ‘ikai fai pehē ‘e kinautolu. 18Pea ‘oka fokotu‘u ‘e Sihova hanau fakamaau, na‘e kau ‘a e ‘Eiki mo e fakamaau ko ia, ‘o ne fakahaofi kinautolu mei he nima ‘o honau ngaahi fili, lolotonga ‘a e mo‘ui ‘a e fakamaau: he na‘e fakatomala ‘a e ‘Eiki ‘i he‘enau to‘e koe‘uhi ko e kakai na‘e fakamo‘ulaloa mo laiki kinautolu. 19Pea ‘i he faifai pea pekia ‘a e fakamaau, na‘a nau holomui, ‘o fai kovi ange ‘i he‘enau ngaahi tamai ‘enau muia ‘a e ngaahi ‘otua kehe, ke tauhi mo punou ki ai; na‘e ‘ikai te nau tuku ha me‘a ‘o ‘enau ngaahi tō‘onga mo honau ‘alunga fefeka."

Fakamaau 2:16 “Pea naʻe toki fokotuʻu ʻe Sihova ha kau fakamaau, ʻa ia naʻa nau taukapoʻi kinautolu mei he nima ʻo e kakai naʻe vete kinautolú” Ko e founga hono taukapoʻi ke fakahaofi mai kinautolú mei he nima honau ngaahi filí. Naʻe ʻikai ke fekauʻi mai ʻe he ʻOtuá ha kau ʻangelo koeʻuhi ko honau fakahaofí ka naʻá ne fokotuʻu ha kau fakamaau mei honau lotolotongá. Ko e kau fakamaaú ni naʻe ʻoange ʻe he ʻOtuá ha potoʻi ngāue makehe ʻo ui kinautolu ki ha ngāue makehe, naʻe palani kinautolu ki aí. He ko Sihova naʻe ʻi he kau fakamaaú ʻi he taimi naʻá ne fokotuʻu ai kinautolu, pea ke nau hoko ko e kau fai fakamoʻui. ʻI he ngaahi ʻaho ʻo e holoa lahitaha ʻo e siasí, ʻe ʻi ai pe ha niʻihi ʻe ʻiloʻi mo teuʻi feʻunga ʻe he ʻOtuá ke toe fakaake mo faitoʻo ʻa e mamahí. Pea kuopau ke fakamoʻoni ʻa e ʻOtuá ki hono taimi ke fokotuʻu ai ha kau tangata ke ngāueʻaki ki he ngāue ʻa hono puleʻangá. ʻI he holoa ʻa ʻIsilelí, pea ʻikai ha ola ke nau liliu neongo ko e lolotonga ia ʻo e ʻiate kinautolu ʻa e kau fakamaau mo nau ngāue tōtōivi ki he liliu, ka naʻe ʻikai ke nau fanongo kinautolu ki he kau fakamaau, ka naʻe taimi vave ʻo ʻenau muimui kinautolu ia ki he ʻotua kehe, mo ʻenau ngaahi ʻaitoli mo ʻenau fakaholomui.Ko e ʻaitolí ko e ʻaitoli fakalaumalie. Pea ʻi he taimi naʻe pekia ai ʻa e kau fakamaaú, naʻa nau sio ki he kauvai ke vakaiʻi ʻa e matavai ʻo ʻenau ʻaitolí ʻo hangē kuo toʻo, ka naʻe tafe hifo ia ʻo lahi ange ʻa e kovi ʻa e toʻutangata ko ení, ʻi heʻenau fanga tamaí. He ko kinautolu kuo nau liʻaki ʻa e ngaahi founga lelei ʻa e ʻOtuá ʻe ʻiloa kinautolu ʻi he fai angahala, pea te nau maʻu ʻa e loto fefeka tahá. Kaekehe, ko Kalaisi ʻa e Fakamaau aofangatuku ʻo e māmaní, pea kuo tuku kiate ia ke ʻAʻana ʻa e Fakamaau ʻo e māmaní he ko Ia naʻe hoko ʻo tangata ke Ne pekia ko hotau fetongi.