Pulelulu 10 Sanuali, 2018

Fakamaau 3:31; 5:6,8; 10:7,17; 1 Sam 13:19,22 

Fakamaau 3:31

"31Pea hili ia na‘e ‘i ai ‘a Sāmika‘a ko e foha ‘o ‘Ānati, ‘a ia na‘a ne taa‘i ‘a e kau Filisitia ‘e toko onongeau ‘aki ha tao fakateka pulu: pea ko ia foki na‘a ne taukapo ‘a ‘Isileli."

Fakamaau 3:31 “Pea hili ia naʻe ʻi ai ʻa Samikaa ko e foha ʻo ʻAnati, ʻa ia naʻá ne taʻai ʻa e kau Filisitia ʻe toko ongongeau ʻaki ha tao fakateka pulu, pea ko ia foki naʻá ne taukapoʻi ʻa ʻIsileli”. Ko e taimi ko ē naʻe pehē ai naʻe nonga ʻa e fonuá ʻi he taʻu ʻe valungofulú, ʻoku fakakaukau ʻa e niʻihi ia naʻe ʻuhinga tefito ia ki he tafaʻaki ʻo e fonua ki hahake ʻo e vaitafe Soataní ʻa ē naʻe kapa mo puleʻi ʻe he kau Moapé, he ko e tafaʻaki ia ʻoku nofo ai ʻa e kau Moapé, ka ʻi he Folofola ko ení ʻoku ngali ia ko e tafaʻaki ʻe taha ʻo e fonuá, ʻa ia ʻoku tuʻu fakatonga- hihifo, ʻa ē naʻe uesia ai ʻe he kau Filisitiá ʻa ia naʻe taki ai ʻa Samikaa ʻi honau fakafepakiʻi. Pea hili ʻa e ngaahi ko iá, naʻe kau ia ʻi he hiva naʻe faʻu ʻe Tepola, ko e palofita fefine.ʻI he ngaahi ʻaho ʻo Semikaa, ko e ngaahi hala lalahí naʻe ʻikai ke ngāue kinautolu, ko e konga ia ʻo e fonuá naʻe tuʻu hoko ki he kau Filisitiá, ko e kakai naʻe ʻikai lava ke nau fononga hao ʻi he ngaahi halá, he naʻe ʻi ai ʻa e ngaahi fakatuʻutamaki naʻe faʻa hoko ai, pea mo e kaihaʻa naʻe fai ia e kakai naʻa nau nofoʻi ʻa e fanga kiʻi kolo iiki taʻekau he laú he naʻe fakamalohia kinautolu ke nau hiki ki he ngaahi kolo lalahi. Naʻe fokotuʻu leva ʻe he ʻOtuá ʻa Semikaa ke ne fakahaofi ʻa hono kakaí, he naʻá ne kamata pe lolotonga ʻoku moʻui ʻa e ʻEhutí. Naʻe taʻelava ʻo lau ʻa e tokolahi honau ngaahi filí, he ʻoku ngalingali ko hono tamateʻi ʻo e toko onongeaú ʻo e kau Filisitiá, ko e tokolahi ko iá ke fakahaofi ʻa e kau ʻIsilelí meiate kinautolu, pea ko e tokolahi naʻe ʻia Semikaa ko e kau fakatekapulu pe ko e kau ngāue palau ʻi he lau ʻa e niʻihi, pea mahalo pē ko Samikaa naʻe muimui he palaú, pea ko e taimi ko ē ʻoku fai ai ha meʻa ʻe he kau Filisitiá ʻi he halá, kuo ʻai leva ʻe he ʻOtuá ʻi hono lotó ke fakafepakiʻi kinautolu, naʻe ʻikai ha heletā, pe ko ha tao, ka naʻá ne ngāueʻaki pe ʻa e meʻangāue ʻoku ʻi hono nimá, ʻone tamateʻi ai ʻa e toko onongeaú, pea ne haʻu ʻoku ʻikai ke lavaea. ʻOku lava ʻe he ʻOtuá ʻo ngāueʻaki pe ʻa e kau sevanití ki hono langilangi pea mo e lelei ʻo hono siasí, ʻokú ne ʻai hono laumalié ki he kau tangata palau ke fakamaau, mo e kau tangata toutai ke nau ʻapositolo, he ko ia ʻoku pule fakalevelevá. Fēfē koe?