Tusite 2 Sanuali, 2018

Fakamaau 2:11-15; 3:7; Teut 28:25; 31:16; Saame 106:40-42

Fakamaau 2:11-15

"11Pea na‘e fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova, ‘o nau tauhi ‘a e ngaahi Peali. 12Pea na‘a nau li‘aki ‘a Sihova ko e ‘Otua ‘o ‘enau ngaahi kui, ‘a ia na‘a ne ‘ohake kinautolu mei ‘Isipite, ‘o nau muia ‘a e ngaahi ‘otua kehe, ha ngaahi ‘otua ‘o e kakai na‘e nofo takatakai kiate kinautolu, pea nau punou ki ai: pea na‘a nau fakahouhau‘ia ‘a Sihova. 13‘Io, na‘a nau li‘aki ‘a Sihova, ‘o nau tauhi kia Peali mo ‘Asiteloti. 14Pea langa‘i ai ‘a e houhau ‘a Sihova kia ‘Isileli, pea na‘a ne tuku kinautolu ki he nima ‘o e kau vete, ‘a ia na‘a nau vete kinautolu, pea na‘a ne fakatau kinautolu ki he nima ‘o honau ngaahi fili takatakai; ko ia na‘e ‘ikai te nau kei lava ke tu‘u ‘i he ‘ao ‘o honau ngaahi fili. 15‘Ilonga ha me‘a na‘a nau ‘alu ki ai, na‘e kau ‘a e ‘Eiki ke nau kovi ai, ‘o hangē ko ‘ene folofola, pea mo ‘ene fuakava kiate kinautolu: pea na‘a nau faingata‘a‘ia ‘aupito."

Fakamaau 2:11 “Pea naʻe fai ʻe haʻa ʻIsileli ʻa e meʻa naʻe tau kovi ki he finangalo ʻo Sihová, ʻo nau tauhi ʻa e ngaahi Pealí”. Ko e langilangí naʻe ngaohi ki ai ʻa ʻIsilelí, ke nau maʻolunga ʻi he kakai kehe kotoa pē. Ko ʻenau fehalaakí ko ʻenau kumi pe ʻe kinautolu honau monū fakaekinautolu pe, ko ia aí naʻa nau fili ʻekinautolu ʻa e ngaahi ʻotua ʻo e kakaí ʻoku nau nofo ʻo takatakaiʻi kinautolú. Ko honau ʻotuá ko Peali, ʻoku ʻuhinga ko e ngaahi ʻeikí, pea mo e ʻotua ʻo ʻAsiteloti, ko e ʻotua faitapuakí ko e ngaahi ʻotua tokolahi fakatouʻosi. Kuo nau liʻaki ʻa e ʻOtua moʻoni mo taha pe, ka nau maʻu mai ʻa e ngaahi ʻotua tokolahi, mo e ʻeiki tokolahi, pea ko e meʻa ia kuo nau fai, naʻe tau kovi ki he finangalo ʻo e ʻOtuá. He ko ia pē ʻa e ʻuluaki fekau, ʻo e fekau ʻe 10. “ʻOua naʻa ai haʻo ʻOtua kehe, ʻo uaʻaki au” (ʻEki 20:3). Ko Sihova ia pea ko Ia tokotaha pe. ʻIo, ʻo aʻu ki he ʻafungi ʻa e tangatá, ko hoʻona ia ʻaitoli. Ko e kotoa ʻo e ngaahi tui ʻotua kehé, ʻoku ʻuli, pea ʻoku ʻikai ko ha lotu ia, pea ʻoku fakafepaki ki he ʻOtuá, pe ko e kumi ke tauʻatāina meiate ia. Ko e ha pē ha mea ʻoku tau fai ʻo tōnounou mei he ʻofa haohaoa ia he ʻOtuá ʻoku tau faiangahala ʻi he ʻuluaki fekau ʻo e fekau ʻe 10. Ko ia ʻa e fakamanatu ʻoku ʻomai ʻe he ʻapositolo ko Paulá. “Ko ia pe ko hoʻomou kai pe ko hoʻomou inu, pe ko hoʻomou fai ha meʻa, mou fai kotoa pe ke ongoongo lelei ai ʻa e ʻOtuá” (1 Kol 10:31). Pea ko e tuʻunga ia naʻe ʻi ai ʻa ʻIsilelí, ʻi heʻenau liʻaki ʻa Sihova, ka nau tauhi ki he ngaahi Pealí. Ko ia hotau tala kuo fai ʻe he ʻOtuá kiate kitautolu, he kuo fele ʻa e ʻafungi, mo e siokita ʻi he lotu fakakosipeli ʻo Sīsū Kalaisí, pea kuo fai mo e kumi koloa mo kumi ongoongoa ʻaki e Huafa ʻo Kalaisí. ʻOange ki he ʻOtuá ke langilangiʻia tokotaha pe ʻi hoʻo moʻuí.