Monite 8 Sanuali, 2018

Fakamaau 3:18-25; Siosiua 4:20; 1 Samiuela 24:3; ʻEmosi 3:15 

Fakamaau 3:18-25

"18Pea ‘i he faifai pea ‘osi ‘ene ‘atu ‘a e me‘a‘ofa, na‘a ne fekau ‘a e kakai na‘e ha‘u mo ia ke ‘alu. 19Ka ka foki mai ia mei he ngaahi tamapua ‘a ia ‘oku ‘i Kilikali, ‘o ne pehē, ‘Ēī, ‘oku ‘i ai ha‘aki fekau fufū ki he ‘Afiona.

Pea ne folofola mai, Tuku ‘a e lea. Pea hū atu leva kitu‘a ‘a kinautolu kotoa pē na‘e fe‘ao mo ia.

20Pea ‘alu atu ‘a ‘Ēhuti kiate ia, ka ‘oku ne nofo toko taha ‘i ha fale fakahavilivili na‘a ne ma‘u. Pea lea ange ‘a ‘Ēhuti, Kuo u ha‘u mo au ha folofola ‘a e ‘Otua kiate koe. 21Pea ne tu‘u mai mei hono nofo‘anga. Pea mafao atu ‘e ‘Ēhuti hono nima to‘ohema, ‘o ne to‘o ‘a e heletā mei hono tenga to‘omata‘u, ‘o ne velo‘i ia ki hono kete: 22pea na‘e hū atu mo e ‘esia foki; pea ngalo ‘a e mata ‘i he ngako, he na‘e ‘ikai te ne ta‘aki ‘a e heletā mei hono kete; 23pea na‘e ‘asi atu ia kitu‘a. Pea hū kitu‘a ‘a ‘Ēhuti ki he falehala, ‘o ne tāpuni ‘a e ngaahi matapā ‘o e fale kiate ia, ‘o ne fakama‘u. 24Pea kuo ‘alu ia, na‘e ha‘u ‘a e kau tamaio‘eiki; pea na‘a nau vakai, tā kuo fakama‘u ‘a e ngaahi matapā ‘o e fale; pea na‘a nau pehē, Kuo pau ‘oku ne fai ‘ene me‘a ‘i he fale fakahavilivili. 25Na‘a nau tatali, tatali, pea nau mā ai: pea tā na‘e ‘ikai to‘o ‘a e ngaahi matapā ‘o e fale; ko ia na‘a nau to‘o ‘a e kī, ‘o fakaava ia: pea tā ko honau ‘eiki ena kuo tō ki lalo kuo mate."

Fakamaau 3:21 “Pea mafao atu ʻe ʻEhuti hono nima toʻohemá ʻo ne toʻo ʻa e heletaá mei hono tenga toʻomataʻu, ʻo ne veloʻi ia ki hono kete”. Naʻe fiemaʻu ʻe ʻEhuti ʻa e tokanga ʻa e tuʻi Moape ko ʻEkiloni ki he fekau mei he ʻOtuá, pea ko e fekaú ko e heletui. ʻOku ʻomai ʻe he ʻOtuá kiate kitautolu ʻa e ngaahi fakamaau ʻaki hono ongonimá pea pehē ki he ngaahi fakamaau mei hono ngutú. Naʻe fakaʻapaʻapaʻi ʻe ʻEkiloni ʻa e fekau mei he ʻOtuá. Neongo ko e tuʻí ia, ka ko e tuʻi hiteni, neongo naʻe koloaʻia mo iviiviʻia pea neongo ʻokú ne puketuʻu ʻe ia ʻa e kakai ʻa e ʻOtuá, neongo ʻokú ne sino ʻaupito ʻi ha toe tangata, ka ʻoku ʻikai lava ʻo tuʻu faingofua ki ʻolunga, pe ke tuʻu fuoloa. Ka ʻi heʻene fakaʻapaʻapa ai ke maʻu ʻa e tuʻutuʻuni mei Hevaní, naʻá ne tuʻu hake ʻo hū kituʻa mei hono nofoʻangá, pea naʻe maʻolunga pe maʻulalo, pe faingataʻa pe faingofua ka naʻá ne tuʻu ki ʻolunga, he ko e ʻOTuá eni ʻe folofola mai kiate ia, he ʻoku maʻolunga ʻa e ʻOtuá ʻiate ia, neongo ko e tuʻí ia. ʻOku fakamā eni ki he tokolahi ʻoku ui ko e kau kalisitiane ʻi he taimi ʻoku ʻomai ai ha fekau mei he ʻOtuá kia kinautolu, ʻoku nau toutou fakahaaʻi mai ʻa e ngaahi fakaʻilonga ʻo e taʻetokanga mo e siʻisiʻi ʻo ʻenau lave ki ai. Ko Ehuti eni mo hono ui ki he meʻa ke ne fai ko e fekau ia mei he ʻOtuá pea naʻe langaʻi ʻe he ʻOtuá ʻa ʻEkiloni ke tuʻu ki ʻolunga ke fakapapauʻi ʻa e fekaú, pea naʻe fakahoko ʻe Ehuti ʻa hono tamateʻi fakalao, ʻo faingofua pe. Ko ʻene fuʻu sino, naʻe ʻikai ke ne toe malava ke fai ha fakafepaki, pe ha tokoni kiate ia. Ko Ehuti eni naʻá ne fai tonuhia pe ʻa e ngāué ni, he naʻá ne maʻu ha tataki mei he ʻOtua ki ai pea naʻá na felotoi pe ki he founga te ne ngāueʻaki. Naʻe tuku pe ʻe he ʻOtuá ke ikunaʻi ʻe hono kakaí ʻa honau ngaahi filí pea ke fakahaaʻi ki he māmani ʻa ʻEne fakamaaú. Pea ke ʻoua naʻa mahalo ʻe ha taha ʻe haʻo taʻe fakamauʻi, he ʻoku pehē ʻe he ʻapositolo “Pea hangē kuo tuʻutuʻuni ki he kakai ke mate tā tuʻo taha pe, pea hili ia ko e fakamaau pe” (Hep 9:27). ʻIo, ko Kalaisi ʻa e Fakamaau aofangatuku ʻo e māmani, pea ko Ia ʻa e Fakamoʻui. Tui ki ai he ʻahó ni.