Tu'apulelulu 2 Fepueli, 2017

NOM 35:29-34; 27:11; SEN 9:6; EKI 29:45,46; LEV 18:24,25; TEUT 17:6; SA 106:38

Nomipa 35:29-34

"29Pea ko e ngaahi me‘a ko ia ko e tu‘utu‘uni fakakonisitūtone kiate kimoutolu ‘i homou ngaahi tangutu‘anga kotoa pē ‘o laui to‘utangata. 30‘Ilonga ‘a ia ‘oku ne te‘ia ha toko taha, ‘e tāmate‘i ‘a e fakapō ‘i he fakamo‘oni ‘a ha ni‘ihi, ka ‘e ‘ikai fakamāumatea ha taha ‘i he fakamo‘oni ‘a ha toko taha pē. 31Pea ‘e ‘ikai te mou tali totongi ke mo‘ui ai ‘a e fakapō, ‘a ia kuo fakamāumatea, ka ‘e mātu‘aki tāmate‘i ia. 32Pea ‘e ‘ikai te mou tali totongi ma‘ana kuo hola ki hono kolo-hūfanga ke ne foki ‘o nofo ‘i hono fonua, kae‘oua pē ke pekia ‘a e taula‘eiki. 33‘O ‘oua te mou maumau ‘a e tapu ‘o e fonua ‘oku mou ‘i ai: he ko e fakapō ‘oku ne maumau‘i ‘a e tapu ‘o e fonua: pea ‘e ‘ikai lava ha huhu‘i ‘o e fonua mei he toto kuo lilingi ai, kae ‘aki ‘a e toto pe ‘o ia na‘a ne lilingi. 34‘Io, ‘e ‘ikai te ke ‘uli‘i ‘a e kelekele ‘oku mou tangutu ai, ‘a ē ā ‘oku ou nofo fonua ai au: he ko au Sihova ‘oku ou lotolotoi ‘i ha‘a ‘Isileli."

Nomipa 27:11

"11Pea kapau ‘oku ‘ikai ha tokoua ‘o ‘ene tamai, pea te mou foaki hono tofi‘a ki ha kakano ‘o hono fāmili ‘oku ofi kiate ia, pea te ne ma‘u ia: pea ‘e hoko eni ko e kupu‘i konisitūtone ki ha‘a ‘Isileli hangē ko e tu‘utu‘uni ‘a Sihova kia Mōsese. Ko e Fili ‘o Siosiua ke ne Fetongi ‘a Mōsese."

Senesi 9:6

"6Ko ia ‘oku ne lilingi ‘a e toto ‘o ha tangata, ‘e lilingi hono toto ‘e ha tangata: he ko e ‘īmisi ‘o e ‘Otua na‘a ne ngaohi ai ‘a e tangata."

'Ekisoto 29:45, 46

"45Pea te u nofo ‘i he lotolotonga ‘o ha‘a ‘Isileli, pea te u hoko ko honau ‘Otua. 46Pea te nau ‘ilo ko Sihova au ko honau ‘Otua, ‘a ia na‘a ku ‘omi kinautolu mei ‘Isipite ke u nofo fonua ‘i honau lotolotonga: ko Sihova au ko honau ‘Otua."

Levitiko 18:24, 25

"24‘Oua te mou fakata‘ema‘a‘i kimoutolu ‘i he alā me‘a pehē: he ko e ngaahi me‘a ko ia kuo ‘uli‘i ai ‘a e ngaahi kakai ‘oku ou fakateka atu mei homou ‘ao: 25pea kuo ‘uli‘i ai ‘a e fonua: ko ia ‘oku ou ‘eke ki ai hono kovi, pea ‘oku pu‘aki ‘e he fonua hono kau nofo‘anga."

Teutalonome 17:6

" 6‘I he fakamo‘oni ‘a ha toko ua pe toko tolu ‘e mate ‘a ia ‘e tāmate‘i; ‘e ‘ikai tāmate‘i ‘i he fakamo‘oni ‘a ha toko taha pē."

Saame 106:38

"38‘Io, ko e toto ta‘ehalaia na‘a nau lilingi, Ko e toto ‘o ‘enau fānau tangata mo fefine, ‘A ia na‘a nau feilaulau ‘aki ki he ngaahi tamapua ‘o Kēnani, Pea na‘e maumau ‘a e tapu ‘o e fonua ‘i he fu‘u toto ko ē."

Ko Sihova ʻoku lotolotoi ʻi ʻIsileli, kuopau ke tauhi maʻa ʻa e fonua ko Kenaní. Ko e lao fakakonisitutone ʻa e ʻOtuá, ʻoku talaki pe ia, koeʻuhi ko ʻetau tuʻutāmaki, mo fakatokangaʻi ʻaki kitautolu, ke tau hola mei he houhau ʻoku tuʻunuku maí. Ko e fakapoó, kuopau ke tautea mate ia, ka ʻi he fakamoʻoni ki ai ʻa e tokolahi pea heʻikai mate ha taha fakapō ʻi ha fakamoʻoni pe ha tokotaha. Heʻikai tali ha totongi ke fakahaofi ʻaki ha taha fakapō, pea ʻe ʻikai totongiʻi ha taha fakapō. Kuo hola ki he kolo hufangá, ke foki ki hono ʻapí, ka ʻe tatali ʻi ai, kaeʻoua kuo toki mate ʻa e taulaʻeiki lahi. Pea ʻoua ʻe maumauʻi ʻa e tapu ʻo e fonuá, he ko e toto kuo lilingi kuo maumau ai ʻa e tapú, pea ʻe huhuʻi pe ʻaki ʻa e toto ʻo ia naʻa ne lilingí. Kuo ʻosi ʻafio pe ʻe he finangalo ʻo e ʻOtuá, ʻa e tuʻunga fakatuʻutāmaki ʻoku ʻi ai ʻa e faʻahinga ʻo e tangatá ‘i he angahala, pea Ne fokotuʻutuʻu leva ʻa e lao, ko e fakataipe pe ki he meʻa kuo ne kotofa ke ne fai, maʻae faʻahinga ʻo e tangatá ʻi hono ʻAlo ko Sīsū Kalaisí, koia pe taha ʻa e hufangaʻanga maʻae tangatá mo e fefine angahalá.

Ko e kosipeli ʻo Sīsū Kalaisí, ko e ngataʻanga ia ʻo e laó maʻae maʻoniʻoni, ki he tokotaha kotoa pe ʻoku tui. Ko e tokotaha angahalá ko e taimi ʻoku ne fakatokangaʻi moʻoni ai, ko ʻene tuʻutamaki ʻoku vave, ʻo ne ʻilo ʻaki ʻa e tuí ko e hufangaʻanga ʻoku ʻi hono ʻao tonu, pea fai leva ia ʻoua ʻe toe toloi pea tuku ʻa e meʻa kotoa pe kimui, mo e meʻa kotoa pe ʻoku nau fakatuaiʻi ʻete nofo mo ʻete ʻilo ʻo Kalaisí. Pea talamai ʻe Paula “Seuke ʻoku ou kei lau ni foki ʻa e ngaahi meʻa ko ia kotoa ko e koto fakamasiva, koeʻuhi ko ʻene fungani ʻa e ʻiloʻi ʻo Kalaisi Sīsū ko hoku ʻEiki, ʻa ʻene ʻafio naʻa ku tuku ai ke mole kotoa, ʻio ʻou lau ko e kinohaʻa pe koeʻuhi ke fakakoloʻaki au ʻa Kalaisi” (Fili 3:8). Kāinga, ko e mahuʻinga ʻo e ʻiloʻi ʻo Kalaisi ʻoku ne lakasi ʻa e meʻa kotoa pe (Fili 2:3, 4:7). Ko e fakamasiva, ʻoku ʻuhinga ʻa e lea ni ha meʻa pe ke ke fehiʻa ia mo taʻemahuʻingaʻia ai. Ko e meʻa kotoa pe ʻo māmani, ko e veve ia ʻi hono fakahoa kia Kalaisi, pea kau ai ʻetau ngaahi ngāue totonu mo maʻoniʻoni ko e kofu pani toto mo ia mo ʻuli (Ai 64:6) He kuo fetongi kotoa ia ʻe Kalaisi. Pea toe pehē mai ʻa e ʻapositolo “He ko e meʻa kia kita ko ʻete moʻuí ko Kalaisi ʻatā pea ko ʻete pekia ko e ʻasili hoto fakakoloa” (Fili 1:21). Ko e taimi ʻo nofo fonua ʻa e ʻOtua ʻiate kitautolu pea ʻoku tapu leva ʻa e fonua ke ʻuliʻi he ko Sihova ia ʻoku Ne ʻafio, ʻo lotolotoi ʻiate kitautolu ko hono kakai tonu. Fakafetaʻi atu ʻe Tamai ki he ʻAfiona.