Falaite 10 Fepueli, 2017

TEUT 1:26-33; 9:1-3,28; 32:10-12; NOM 14:1-4; EKI 14:14; SA 106:24; NG 13:18

Teutalonome 1:26-33

"26Ka na‘e ‘ikai te mou loto ke ‘alu hake, ka mou paetaku‘i ‘a e folofola tonu ‘a Sihova ko homou ‘Otua.27Pea na‘a mou mumuhu ‘i homou ngaahi tēniti, ‘o mou pehē, Na‘e ‘ita ‘a Sihova kiate kitautolu, ko ia na‘a ne fakahao ai kitautolu mei ‘Isipite, ka ne tuku kitautolu ki he nima ‘o ha‘a ‘Āmoli ke faka‘auha kitautolu. 28Ko ‘etau ‘alu hake ki fē? Kuo fakavaivai‘i hotau loto ‘e he kāinga ni, he‘enau pehē, Ko e kakai lahi hake mo lōloa ‘iate kitautolu; lalahi honau ngaahi kolo, pea tau hake honau ‘ā ki langi; kae‘uma‘ā foki na‘a mau mamata ai ki ha kakai ‘Ānaki. 29Pea u pehē kiate kimoutolu, ‘Oua te mou teki, pea ‘oua te mou toka ilifia kiate kinautolu. 30Ko Sihova ko homou ‘Otua ‘oku hā‘ele mu‘omu‘a kiate kimoutolu; ko ia ia te ne tau ma‘amoutolu, ‘o hangē ko ‘ene fu‘u fai ko ia ma‘amoutolu ‘i ‘Isipite–seuke, na‘a mou sio ai. 31‘I he Toafa foki, ‘a ia na‘a mou mamata ai ki he fua koe ‘e Sihova ko ho ‘Otua, hangē ko e fua ‘e he tangata ‘ene tamasi‘i, ‘i he hala kotoa na‘a mou ‘alu ai, kae‘oua ke mou a‘u ki he potu ko ‘eni. 32Ka neongo e me‘a ko ia, ka hono mou tui kia Sihova ko homou ‘Otua. 33‘Osi, ‘oku ne hā‘ele mu‘omu‘a atu ‘i he hala ke kumi ha potu ke mou fokotu‘u tēniti ai, ‘i he Afi, po‘uli, ke huluhulu kimoutolu ‘i he hala ‘oku totonu ke mou ‘alu ai, pea ‘i he ‘Ao, ‘aho. Ko Hono Tautea ‘e Sihova ‘a e Kakai ‘Isilelí."

Teutalonome 9:1-3,28

"1FANONGO mai, ‘a ‘Isileli: ko ho‘o a‘a ‘i Soatani he ‘aho ni, ke hū atu ‘o ma‘u ha ngaahi pule‘anga ‘oku lahi mo kaukaua ‘iate koe, ha ngaahi kolo lalahi, pea tau hake honau ‘a ki langi, 2ha kakai lahi mo mā‘olunga, ko e hako‘i ‘Ānaki, ‘a ia ‘oku ke ‘ilo ki ai, pea kuo ke fanongo ki hono lau, Ko hai ‘e ala mātu‘u ‘i he ‘ao ‘o e hako‘i ‘Ānaki? 3Ko ia ke ke ‘ilo he ‘aho ni ko Sihova ko ho ‘Otua, ko ia ia ‘oku hā‘ele mu‘omu‘a ‘iate koe ko e afi faka‘auha; ko ia ia te ne faka‘auha kinautolu, pea ko ia ia te ne ha‘aki kinautolu ‘i ho ‘ao: ko ia te ke kapusi ai kinautolu, mo ‘ai ke nau ‘auha vave, ‘o hangē ko ‘ene folofola kiate koe. 28na‘a pehē ‘e he fonua na‘a ke fakahaofi kimautolu mei ai, Tā ko e ‘ikai lava ‘e Sihova ke fakahū kinautolu ki he fonua na‘a ne tala‘ofa kiate kinautolu, pea koe‘uhi ko ‘ene fehi‘a kiate kinautolu, ko hono ‘uhinga ia kuo ne ‘omi ai kinautolu ke tāmate‘i ‘i he toafa"

Teutalonome 32:10-12

"10Na‘a ne ‘ilo ia he fonua toafa, ‘I he fonua mamate mo ‘u‘ulu mo lālāfua‘a; Na‘a ne kāpui ia, na‘a ne nofo‘aki lama, Na‘a ne tauhi ia hangē hono tama‘imata. 11Hangē ha ‘īkale ‘oku ue‘i hono pununga, ‘O ne puna mo hono fānganga mei ‘olunga, Pehē ‘ene folahi hono kapakau, ‘o kilala ia, ‘I hono funga fulufulu ‘oku ne fua: 12Na‘e taki ia ‘e Sihova toko taha pē, Pea na‘e ‘ikai ō mo ia ha ‘otua kehe."

Nomipa 14:1-4

"1PEA hiki ‘e he fakataha ‘enau fu‘u fākafoa; pea tangi ‘a e kakai ‘i he pō ko ia. 2Pea lāunga ‘a ha‘a ‘Isileli kātoa kia Mōsese mo ‘Ēlone; pea na‘e pehē kiate kinaua ‘e he fakataha kātoa, Taumaiā na‘a mau mate ‘i ‘Isipite! Pe taumaiā na‘a mau mate ‘i he toafa ni! 3Pea ko e hā kuo ‘omi ai kimautolu ‘e Sihova ki he fonua ni ke mau tō ‘i he heletā, kae taki pōpula homau uaifi mo e fānau? ne mei lelei mu‘a ‘etau foki ki ‘Isipite? 4Pea nau fepehē‘aki, Tau fokotu‘u hatau kapiteni, ‘o tau foki ki ‘Isipite."

'Ekisoto 14:14

"14Ko Sihova te ne tau ma‘amoutolu, ka ko kimoutolu te mou tu‘u noa pē."

Saame 106:24

"24Na‘a nau fakafisi foki ki he fonua māna‘ia, Na‘e ‘ikai te nau tui ki he‘ene folofola."

Ngaue 13:18

"18Pea fuoloa ‘ene fafa kinautolu ‘i he toafa, ko e fāngofulu ta‘u nai.

Naʻe hoko atu ai pe ʻa Mosese, ʻo ne tala ki ʻIsileli ʻa e angahala ʻoku nau halaia aí, ko honau tukiaʻanga. Pea ko kinautolu ʻoku ne lea ki aí, ko e toʻutangata foʻou ia, ʻoku nau ʻi lalo pe ʻi he taʻu 20 ʻo ne pehē “ʻOku mou muhumuhu mo angatuʻu” Ko e sio ia ki heʻenau tamai pea ko ʻeni honau tala mo e fakatokanga . 1. Ko e talangataʻa mo e angatuʻu ko e fakafepaki ia ki he lao ʻa e ʻOtuá. 2. Ko e fakaʻikaiʻi ʻa e meʻaʻofa ʻa e ʻOtuá, ko e angatuʻu fakafepaki ia ki hono mafaí, ko ia ʻo e ʻOtuá. 3. Ko e loto taʻetuí ko e takele ʻo e ngaahi meʻa ni kotoa. He naʻe pehē ʻe Mosese “Ka ko homou tui kia Sihova ko homou ʻOtua”. Ko hono kotoa ʻo e talangataʻa ki he lao ʻa e ʻOtua mo e taʻefalala ki hono ivi, mo ʻene lelei, ko e haʻu kotoa mei he taʻetui ki heʻene folofolá pea ko e kotoa ʻo e talangofua moʻoni, ʻoku mapunopuna ia mei he tui. Ko ha tuʻunga fakamamahi ʻoku tau ʻi ai, lolotonga ko e ʻOtua eni ʻo e moʻoni taʻengata, ʻoku ʻikai ke tau lava ʻekitautolu ʻo tui ki ai, pea ko e kī eni ki he moʻui fakalaumalié, ʻoku ʻikai ke tau maʻu ia ʻetautolu. Sio ki he fakaʻofa ʻa e fononga naʻe fai ʻe haʻa ʻIsileli, pea kia kitautolu he ʻaho ni, he ko e lotu ʻoku ʻikai ko ʻete faʻifaʻiteliha pe, pe te te maʻu lotu, pe ʻikai. Pea ko e maʻu lotu pe ka ko ʻete tui falala ki he meʻa kuo fakahaaʻi, mo tala ʻe he ʻOtuá ʻi heʻene folofola, mo talangofua kakato ki ai. Ka ʻoku ʻi ai ha meʻa ʻoku taʻofi mai ʻe he folofolá, ke tuku, pea tuku. Ka ʻoku ʻi ai ha meʻa ʻoku talamai ʻe he folofolá ke tau fai, pea fai. ʻI he fie talangofua kakato ki hotau ʻOtua moʻui, mo moʻoni. Ko eni pe ʻa e angahala, naʻe toe fakamanatu ʻe Mosese ki ʻIsileli, he ʻoku pāpaasi holo pe ʻa e angahala ni ʻiate kinautolu.

Pea ʻi heʻenau halaia aí, ko honau tauteá ko hono tamateʻi fakalao kinautolu, ke nau mate kotoa pe ʻi he toafá. Pea halaʻatā ha taha ʻiate kinautolu ʻo e kau ʻIsileli motuʻa, ke fie faingataʻaʻia ke hū ki Kenani. Kāinga Moʻui Foʻou, ko kitautolu kuo ne ui, ke tau kau he fononga ki Hevaní he ʻaho ni, te tau tui falala moʻoni kia Kalaisi mo ʻene folofolá, mo talangofua kakato ki ai, ʻo tatau ʻi he faingofua mo e faingataʻa, pea mo e moʻui mo e mate. Ko ʻetau Him 566:6, ʻE Sīsū toʻo ʻa e loto ni ʻoʻoku Sila’i ke ʻoua ʻe hū ha meʻa kehe. Keu mate mo moʻui pe moʻou. ʻO nofo ai pe siʻo “taʻemele”. Ko e poupou ia maʻaú.