Monite 6 Fepueli, 2017

TEUT 1:6-8; 11:24; SEN 12:7; 26:4; 28:13; NOM 10:13

Teutalonome 1:6-8

"6Na‘e folofola mai ‘a Sihova ko hotau ‘Otua ‘i Hōlepi, ‘o pehē, Kuo fuoloa ho‘omou nofo ‘i he mo‘unga ni: 7mou hanga ‘o fononga atu, ‘o ‘alu ki he mo‘unga ‘o ha‘a ‘Āmoli mo e ngaahi potu ofi ki ai, ‘i he ‘Alapā, mo e fonua mo‘unga, mo e Sēfela‘a, mo e feitu‘u ko Tonga, mo e hāngai ki tahi ko e fonua ‘o ha‘a Kēnani, mo Lepanoni ‘o a‘u ki he vaitafe lahi ko ‘Eufaletesi. 8Vakai, kuo u tuku ‘a e fonua ‘i homou ‘ao: hū atu ‘o ma‘u ‘a e fonua na‘e fuakava ai ‘a e ‘Eiki ki homou tupu‘anga, kia ‘Epalahame, kia ‘Aisake, pea kia Sēkope, tokua te ne ‘atu kiate kinautolu mo honau hako ‘amui."

Teutalonome 11:24

"24‘Ilonga ha potu ‘e tu‘u ai homou ‘aofiva‘e ‘e ‘omoutolu ia: te mou fai mei he Toafa mo Lepanoni, mei he Vaitafe, ‘a e vaitafe ko ‘Eufaletesi,"

Senesi 12:7

"7Pea hā ‘a Sihova kia ‘Epalame, ‘o ne folofola ‘o pehē, Ko ho hako te u ‘atu ki ai ‘a e fonua ni. Pea ne langa ‘i he potu ko ia ha ‘ōlita kia Sihova ‘a ia ne hā kiate ia."

Senesi 26:4

"4pea te u fakatokolahi ho hako ke tatau mo e ngaahi fetu‘u ‘o e langi; pea te u ‘atu ki ho hako ‘a e ngaahi fonua kotoa ko eni; pea ko ho hako ‘e monū‘ia mei ai ‘a e ngaahi pule‘anga ‘o māmani."

Senesi 28:13

"13Pea tā ko Sihova ‘oku tu‘u mei ‘olunga, ‘o ne folofola mai, Ko au ko Sihova ko e ‘Otua ‘o ‘Epalahame ko ho‘o ‘eiki, pea ko e ‘Otua ‘o ‘Aisake; ko e kelekele ‘oku ke tokoto ai, te u ‘atu ia mo‘ou mo ho hako"

Nomipa 10:13

"13Pea nau hiki hokohoko ‘i he angi ‘a Sihova na‘e fakafai ‘ia Mōsese."

Ko e taʻu ʻe 40 ʻa e hē holo ʻa ʻIsileli ʻi he toafá kuo aʻu mai eni ki hono ngataʻanga ʻi he tohi ko ení. Ko e ngaahi meʻa naʻe hoko ʻia Teutalonome, ʻoku ʻufiʻufi ʻa e uike ʻe taha, pe uike ʻe ua ʻo e mahina 11 ʻo e taʻu ʻe 40 (1:3). Ko e mahina 12 ko e mahina fakaʻosi ʻo e taʻu 40, naʻe fai ai hono tengihia ʻe Mosese (34:8). Pea naʻe ha’u ʻa ʻIsileli ki he Fonua ʻo e Talaʻofá, ʻi he ʻuluaki mahina ʻa e taʻu 41 hili ʻa e ʻEkisotosi (Sios 4:19). Naʻe hanga ʻe Mosese ʻo toʻo konga lalahi ʻa e fononga ʻa ʻIsileli ʻo kamata pe mei he moʻunga Holepí, (Sainai) ʻo ʻikai mei ʻIsipite, koeʻuhi, ko e Moʻunga Sainaí, naʻe foaki ai ʻe he ʻOtuá ʻa e kovinanite ki hono kakaí (Eki 19:20). Ko e kovinanite ko eni, naʻe ʻomai ai ʻa e ʻilo, mo e fatongia, ko e hili pe ʻa e fili ʻa e kakaí, ke muimui ki he ʻOtuá, naʻa nau ʻiloʻi leva ʻa e anga ʻo e muimui kiate ia. Ko ia ai naʻe ʻoange ʻe he ʻOtuá kiate kinautolu ha seti tukufua ʻo e ngaahi laó, mo ha tataki ʻo e founga ʻo ʻEne finangalo ke nau moʻui. (Pea ʻoku ʻilo eni ʻi he tohi ʻEkisoto, Levitiko mo Nomipa). Naʻe fakamamafaʻi ʻe Mosese ʻa e fai tonunga ʻa e ʻOtuá, ki Heʻene palomesi, pea ne fakahaaʻi ange ʻa e lahi ʻo e fonua ʻo e talaʻofá. ʻOku mei he Tonga mei he vaitafe ‘o ‘Isipite (Sen 12:9) ki he vaitafe Eufaletesi (Sen 15:18-21) he kuo ne palomesi fuakava ai kia ʻEpalahame, ʻAisake mo Sekope (Sen 26:2-4 ; 35:10- 12). Pea ʻoku Ne tonunga ai pe maʻa mamani ʻia Kalaisi “Ko ia ʻoku ne maʻu ʻa e ʻAló, ʻoku ne maʻu ʻa e moʻui, ko ia ʻoku tui ki he ʻAlo ʻo e ʻOtuá, ʻoku maʻu ʻa e moʻui taʻengatá. Ko ia ʻa e kotoa hoʻo fiemaʻu ʻoku ʻikai fiemaʻu ia ke ke tatali ki he moʻui taʻengata, koeʻuhi ʻoku kamata ia ʻi he momeniti ʻo hoʻo tui kia Kalaisí. ʻIkai fiemaʻu haʻo ngāue ki ai, koeʻuhi ko e meʻa ia kuo ke ʻosi maʻu, ʻikai ha toe hohaʻa ki ai, koeʻuhi he kuo ʻosi foaki maʻau ʻe he ʻOtuá. Ko e ʻOtua fai ki heʻene leá.