Teutalonome 1:41-46
"41Pea na‘a mou toki tali ai, ‘o mou pehē kiate au, Kuo mau hia kia Sihova, ko kimautolu eni te mau ‘alu hake ‘o tau, ‘o hangē ā ‘a e tu‘utu‘uni ‘a Sihova ko hotau ‘Otua. Pea na‘a mou takitaha tau ‘ene mahafu, ‘o mou vehi ke ‘alu hake ki he mo‘unga. 42Pea folofola ‘a Sihova kiate au, Lea kiate kinautolu, ‘Oua te mou ‘alu hake, pea ‘oua ‘e tau; he ‘oku ‘ikai te u ‘i homou lotolotonga: na‘a te‘ia kimoutolu ‘i he ‘ao ‘o homou ngaahi fili. 43Ko ia na‘a ku tala kiate kimoutolu, ka na‘e ‘ikai te mou tokanga, pea mou paetaku‘i ‘a e folofola tonu ‘a Sihova, ka mou fai pau‘u pē, ‘o ‘alu hake ki he mo‘unga. 44Kae ha‘u ki tua‘ā ‘a e kau ‘Āmoli ‘oku nofo ‘i he mo‘unga ko ia ke tali kimoutolu, pea nau tuli kimoutolu ‘o hangē ko e fai ‘a e fanga pī, ‘o te‘ia kimoutolu ‘i Seia, ‘o a‘u ki Hoama. 45Pea na‘a mou liliu, ‘o mou tangi ‘i he ‘ao ‘o Sihova; ka na‘e ‘ikai tokanga ‘a Sihova ki ho‘omou lea; pea na‘e ‘ikai te ne ongo‘i kimoutolu. Ko e Nofo Laui Ta‘u ‘a e Kakai ‘Isilelí he Toafá. 46Pea mou nofo pehē ‘i Kētesi ‘o ‘aho lahi, ‘io, hono kotoa ‘o e taimi na‘a mou nofo ai."
Teutalonome 2:7,14
"7He ko Sihova ko homou ‘Otua kuo ne fakamonū‘ia koe ‘i he ngaahi ngāue kehekehe kuo fai ‘e ho nima: kuo ne ‘ilo ho‘o ‘alu ‘i he toafa lahi ni, ko e ta‘u eni ‘e fāngofulu mo e ‘iate koe ‘a Sihova ko ho ‘Otua; kuo ‘ikai te ke masiva ‘i ha me‘a. 14Pea ko e fuoloa ‘o ‘etau ‘alu mei Kētesi-panea ‘o a‘u ki he‘etau a‘a ‘i Vai Sēleti, ko e ta‘u ‘e tolungofulu mā valu; ko ‘ene ‘osi ai ‘a e to‘utangata tau mei he ‘apitanga, ‘o hangē ko e fuakava ‘a Sihova kiate kinautolu."
Teutalonome 17:12,13
"12Pea ko e tangata ‘oku fai fielahi, ‘o ‘ikai te ne fakaongo ki he taula‘eiki ‘oku tu‘u hena ke tauhi kia Sihova ko ho ‘Otua, pe ki he fakamaau, ‘e mate ‘a e tangata ko ia: pea te ke ‘ave ‘a e kovi mei ‘Isileli, 13pea ‘e fanongo ki ai ‘a e kakai kotoa, pea te nau manavahē, ‘o ‘ikai te nau toe fielahi."
Nomipa 14:40-44
"40Pea nau tu‘u hengihengi hake, ‘o nau ‘alu hake ki he tumutumu ‘o e mo‘unga, ‘o nau pehē, ‘Oku tau ‘i heni; pea tau ‘alu hake mu‘a ki he potu kuo folofola ki ai ‘a Sihova: he kuo tau hia. 41Pea lea ange ‘e Mōsese, Ko e hā eni ‘oku mou hiki mei he fekau ‘a Sihova? He tala‘ehai ‘e sia‘a? 42‘Oua te mou ‘alu hake; he ‘oku ‘ikai ‘i homou lotolotonga ‘a Sihova; na‘a te‘ia kimoutolu ‘i he ‘ao ‘o homou ngaahi fili. 43He ko ha‘a ‘Amaleki mo ha‘a Kēnani ena ‘oku hanga mai, pea te mou tō ‘i he heletā: he ko e me‘a ‘i ho‘omou foki mei he muimui kia Sihova, ko ia ‘e ‘ikai ‘iate kimoutolu ‘e Sihova. 44Ka na‘a nau fakata‘emālū‘ia, ‘o ‘alu atu ki he tumutumu ‘o e mo‘unga; ka ko e ‘A‘ake ‘o e Kovinānite ‘o e ‘Eiki pea mo Mōsese na‘e ‘ikai te na hiki mei he ‘apitanga."
Saame 118:12
"12Na‘e hangē ko e fanga pī ‘enau kāpui au; Na‘e hangē ha afi ‘akau talatala ‘a e tāmate‘i kinautolu; Ka ‘i he huafa ‘o Sihova te u tu‘usi kinautolu."
Ko e lea eni ʻa ʻIsileli kia Mosese. “Kuo mau hia kia Sihova”. Naʻe fakahaaʻi
ʻe ʻIsileli ʻenau loto mamahi ʻi heʻenau talangataʻa, ka naʻe ʻikai ko ʻenau
fakatomala moʻoni, pea nau toe pehē “Te mau ʻalu hake ʻo tau” Ko ʻenau falalá
ʻiate kinautolu pe. ʻOku nau kei taʻefiemuimui ai pe kinautolu ia ki he ngaahi
fekau ʻa e ʻOtuá. Pea folofola ʻa Sihova kia Mosese ke tala kia kinautolu “ʻOua
te mou ʻalu hake, pea ʻoua ʻe tau, he ʻoku ʻikai teu ʻi homou lotolotongá”. Ko
e ʻOtuá ʻe ʻikai te ne maluʻi kinautolu. Ko ia ai, ko e ikuna heʻikai toe fehuʻia.
He ko e kakaí naʻa nau loto fieʻeiki. Pea naʻe ʻikai ke nau fie tukulolo ki he
ʻEikí. Pea nau ʻalu hake ki he moʻungá ʻi he tukunga, ko e moʻui fakalaumalie,
ʻoku fai pe ia ʻe kita, ʻaki hoto poto, mo hoto mafai. Kaekehe ne haʻu ʻa e kau
ʻAmolí, ʻo tali kinautolu naʻa nau tuli ʻa ʻIsileli ʻo hangē ko e fai ʻa e fanga pií,
ko e fakatokanga ia ki ʻIsileli, ʻe kapu kinautolu ʻe honau ngaahi filí pea te nau
ikuna ʻa e tau ʻe faí, he ʻoku ʻikai ke ʻi ai ʻa Sihova, pea ʻe fakaʻauha kinautolu ʻe
he filí. Ko e foʻi hingoa ko e Hoama, ʻoku ʻuhinga ko e “fakaʻauha”, ko e tafaʻaki
fakatonga ia mo moʻungaʻia ʻo e kau ʻAmolí, ʻi he hāngai ki Hetesi Panea. Pea
nau tangi kia Sihova, ka naʻe ʻikai tokanga ʻa Sihova ia ki heʻenau leá, pea
naʻe ʻikai te ne ongoʻi kinautolu. ʻOku tala ʻe he loʻimatá ʻa e loto mamahi, kae
ʻikai pe ha fakatomala ia, ke foki moʻoni kia Sihova.
Kāinga Moʻui Foʻou, teu lea hangatonu kia kimoutolu. ʻOku ʻi ai ʻa e tokolahi,
kuo ke kau mai ki he feohiʻanga Moʻui Foʻou ʻia Kalaisí, pea mālō ia, ka ʻoku
teʻeki ai pe ke ke fakatomala ʻo tafoki mei ho ngaahi ʻalunga koví, ʻo tali ʻa
Sīsū Kalaisi ko ho fakamoʻui, mo ho ʻEiki ʻaki hoʻo tui falala kiate Ia, pea
ke fakamolemole hoʻo angahalá, pea ke maʻu ʻa e meʻaʻofa ko e Laumalie
Maʻoniʻoni, ke Ne fakaivi koe, ke ke lava ʻo tukulolo kakato ki he ʻOtuá, pea mo
talangofua kakato kiate Ia he meʻa kotoa pe. He ko e palopalema ia ʻo ʻIsileli,
ko e ʻikai ha mafai feʻunga ʻiate kinautolu, ke nau maʻu ivi ai, ke nau fakahoifua
ki he ʻOtua Toputapu, pea ko ʻenau tōnounoú, ke tau ako ai kitautolu ʻo e ʻaho
ní, ke tau teke ʻa e langilangi ʻo e ʻOtuá, he meʻa kotoa pe, pea ke tau ka lea
kiate ia, te ne ongoʻi kitautolu, mo fakahaofi ʻi ha meʻa pe.
No comments:
Post a Comment