Tu'apulelulu 16 Fepueli, 2017

TEUT 2:16-23; SEN 10:14; 19:38; 36:8; SIOS 13:3; EMOSI 9:7

Teutalonome 2:16-23

"16Pea ‘i he fafai pea ‘osi mei he ‘apitanga ‘a e kau tau kotoa he‘enau pekia, 17pea folofola ‘a Sihova kiate au, ‘o pehē, 18Ko ho‘o laka he ‘aho ni ‘i he kau‘ā ‘o Moape, ‘a ‘Ala: 19pea ka mou ka ofi ki he hāngai ‘o ha‘a ‘Āmoni, ‘oua ‘e fakamamahi‘i kinautolu, pea ‘oua ‘e fakafepaki kiate kinautolu: he ‘e ‘ikai te u ‘atu ha konga fonua ‘o ‘Āmoni ke mou ma‘u, he kuo u tuku ia ki ha‘a Lote moonau tofi‘a. 20(Na‘e lau mo ia foki ko ha fonua Lifaimi; na‘e nofo ai ‘i mu‘a ‘a e kau Lifaimi; ‘oku ui kinautolu ‘e ha‘a ‘Āmoni ka e Samisumi: 21ko e fa‘ahinga kaukaua mo tokolahi mo lōloa ‘o hangē ko e kau ‘Ānaki; ka kuo faka‘auha kinautolu ‘e Sihova ‘i he ‘ao ‘o e fa‘ahinga ko ē, pea na‘a nau fetongi kinautolu ‘o nofo ‘i honau fonua: 22‘o hangē ko ‘ene fai ma‘a ha‘a ‘Īsoa ‘oku nofo ‘i Seia, he‘ene faka‘auha ‘a ha‘a Holi ‘i he ‘alu atu ‘a ē; pea na‘a nau fetongi kinautolu, pea ‘oku nau nofo ‘i honau fonua, ‘o a‘u ki he ‘aho ni; 23ko ha‘a ‘Avi foki na‘e nofo hani vilisi ‘o a‘u ki Kesa–na‘e faka‘auha kinautolu ‘e he kau Kafitoli na‘e ‘alu atu mei Kafitoli, ‘o nau nofo ‘i honau fonua.)"

Senesi 10:14

"14kae‘uma‘ā ‘a e kau Patelusi, mo e kau Kaseluhi (‘a ia na‘e ‘alu atu mei ai ‘a e kau Filisitia), mo e kau Kafitoli"

Senesi 19:38

"38Pea fā‘ele mo e tehina, ko e tama; pea ne fakahingoa ko Pēnami: ko e tupu‘anga ia ‘o e ha‘a ‘Āmoni ‘o onopooni."

Senesi 36:8

"8Ko ia na‘e nofo ‘a ‘Īsoa ‘i he mo‘unga ko Seia: ko ‘Īsoa ko ‘Ītomi ia."

Siosiua 13:3

"3‘O fai mei Sīhoa, ‘a ia ‘oku ‘i he matāfonua ‘o ‘Isipite, ‘o a‘u ki he kau‘ā ‘o ‘Ekiloni mei he tokelau, ‘a ia ‘oku lau ki ha‘a Kēnani: ko e ‘ulu-nima ‘o e kau Filisitia; ‘a ha‘a Kesa, mo ha‘a ‘Asitoti mo ha‘a ‘Asikeloni, ‘a ha‘a Kati, mo ha‘a ‘Ekiloni: ko e ha‘a ‘Avi foki ‘i he tonga"

'Emosi 9:7

"7‘Ikai ‘oku mou tatau kiate au mo e fānau ‘a e kau ‘Itiopea, si‘i fānau ‘a ‘Isileli?–ko Sihova ia mei he Ta‘ehāmai–‘ikai na‘a ku ‘ohake ‘a ‘Isileli mei ‘Isipite, mo e kau Filisitia mei Kafitoli, mo e Sīlia mei Kili"

ʻI hono fakahaofi ʻe he ʻOtuá Hono kakaí, naʻe fai ʻaki pe hono toʻukupu (Eki 15:6). Pea ko Hono toʻukupu naʻa ne ʻomi ʻa e fakamaau kia kinautolu. Ko e ʻOtua pe ʻoku ne ngāue fakatouʻosi ki he fakahaofi, mo e kinisi, kae ʻoua kuo nau ʻauha. Ko e ʻOtua naʻa ne ui mo fakahaofi kitautolu ke tau tui falala kakato kia Kalaisi. Tokanga ki ai, he ko e taʻetui ʻe fakaʻauha kinautolu ʻe he ʻOtuá, he ko ʻEne ui kitautolu ke fakamoʻui, ʻi he tui kia Kalaisi ʻo tatau ai pe pe ko e hā ʻa e tukunga ʻo e moʻuí ni, te tau fetaulaki mo ia, tuʻu pe ʻetau falala ʻi hotau ʻEiki mo Fakamoʻui ko Sīsū Kalaisi.

Pea folofola ʻa e ʻOtuá kia Mosese, ʻo fekauʻaki mo ʻAmoni, kuo foaki ia ʻe he ʻOtuá ko e tofiʻa ʻo Lote, he naʻe nofoʻi ia kimuʻa ʻe he kau Lifaimi, naʻe ui ia ʻe he kau ʻAmoní ko e Sanisumi pea naʻe fakaʻauha kinautolu ia ʻe he ʻOtuá, pea tuʻutuʻuni ʻe he ʻOtuá kia Mosese mo ʻIsileli ke ʻoua te nau fakamamahi, pe fakafepaki, kia kinautolu, pea hangē ko e meʻa naʻe fai ʻe he ʻOtuá ʻi Seia, ʻo Ne fakaʻauha ʻa e kau Holí, kae nofo ai, mo tofiʻa ʻaki ia ʻe he haʻa ʻIsoá. Pea naʻe lipooti eni, ke fakalotolahiʻi ʻa e fānau ʻIsilelí, ʻa ē ʻoku nau hū atu ke maʻu ʻa Kenani, ke nau fakafepakiʻi ʻa e ngaahi faingataʻa, te nau fetaulaki mo iá, pea ke fakahaaʻi ki he kau taʻetui ʻa ē naʻa nau manavahe ki he kau saioniti ʻAnakí ʻo tupu ai ʻenau taʻe fie hū ki Kenaní. Pea kapau leva ko e ʻofa tauhi mai ʻa eʻOtuá kuo Ne fai eni maʻa Moape, mo ʻAmoni ʻe lahi ange ʻa e meʻa ia te Ne fai maʻa ʻIsilelí, ko hono kakai makehe. ʻE hala ʻatā ha meʻa ia te ne lava ʻo fakalaveaʻi kinautolu, ka ko e taʻetui pe, mo e talangatá te ne hanga ʻo ʻohifo ʻa e houhau ʻo e ʻOtuá, ki he ʻenau fanga tamaí. Ko e fakatokanga, ke ʻoua te nau ala ki he kau Moapé mo e kau ʻAmoní. Ko Moape naʻa nau kaveinga, ke fakaʻauha ʻa ʻIsileli (Nom 22:6). Naʻe ʻikai taumuʻa pehē ʻa ʻIsileli ia ki Moape. Ka kuo taumuʻa pehē mai ʻa e kakai kehe, ke fai ha kovi kiate koe pea ke fakahaaʻi ange, ʻa e moʻui ʻa Kalaisi ke nau sio ai.