Sapate 12 Fepueli, 2017

TEUT 1:37-40; 3:26; 4:21; 34:4; NOM 14:3,25,30,31; 1 SAM 16:22; AIS 7:15,16

Teutalonome 1:37-40

"37Na‘e tuputāmaki foki ‘a e ‘Eiki kiate au, koe‘uhi ko kimoutolu, ‘o ne folofola mai, Ko koe foki ‘e ‘ikai te ke hū ki ai. 38Ko Siosiua, foha ‘o Nuni, ‘a ia ‘oku ne fakafe‘ao kiate koe, te ne hū ki ai ‘e ia: ke ke poupou ki ai, he ko ia ia te ne fakatofi‘a‘aki ‘a ‘Isileli. 39Ko ho‘omou tamaiki iiki foki, ‘a ia na‘a mou pehē ko e koto vetea, pea ko homou ngaahi foha, ‘a ia ‘oku ‘ikai te nau ‘ilo he ‘aho ni ‘a e lelei mo e kovi, ko kinautolu te nau hū ki ai, pea ko kinautolu te u ‘atu ia ki ai, pea ko kinautolu te nau ma‘u ia. 40Ka ko e me‘a kiate kimoutolu, mou tafoki, ‘o hiki ki he toafa ‘i he hala ‘o e Tahi Kulokula."

Teutalonome 3:26

"26Ka na‘e tuputāmaki ‘a Sihova kiate au koe‘uhi ko kimoutolu, pea na‘e ‘ikai te ne tali au: ka ne folofola kiate au, Ma‘u ā; ‘oua te ke toe lea kiate au ‘i he me‘a ko ē."

Teutalonome 4:21

"21Pea na‘e ‘ita foki ‘a Sihova kiate au koe‘uhi ko kimoutolu, ‘o ne fuakava ‘e ‘ikai te u a‘a atu ‘i Soatani, ‘o ‘ikai te u hū ki he fonua lelei na, ‘a ia ‘oku foaki atu ‘e Sihova ko ho ‘Otua mo‘ao tofi‘a."

Teutalonome 34:4

"4Pea folofola ‘a e ‘Eiki kiate ia, Ko e fonua eni na‘a ku fuakava ai kia ‘Epalahame, kia ‘Aisake, pea kia Sēkope, ‘o pehē, Ko ho hako te u foaki ki ai; kuo u tuku ke ke sio ki ai ‘aki ho mata, kae ‘ikai te ke ‘alu ki ai."

Nomipa 14:3,25,30,31

" 3Pea ko e hā kuo ‘omi ai kimautolu ‘e Sihova ki he fonua ni ke mau tō ‘i he heletā, kae taki pōpula homau uaifi mo e fānau? ne mei lelei mu‘a ‘etau foki ki ‘Isipite? 25Pea ko eni, ko ha‘a ‘Amaleki mo ha‘a Kēnani ‘oku nau nofo ‘i he talalo ko ē: mou foki ā ‘apongipongi, ‘o afe atu ki he toafa ‘i he hala ‘o e Tahi Kulokula.30tangi ‘eku mo‘ui ha‘amou hū ki he fonua, ‘a ia na‘a ku hiki ai hoku nima ke tuku mo‘omou nofo‘anga; ko Kēlepi pē ko e foha ‘o Sīfune, mo Siosiua ko e foha ‘o Nuni. 31Ka ko ho‘omou tamaiki, ‘a ia na‘a mou pehē ‘e taki pōpula kinautolu, te u fakahū ki ai, pea te nau ‘ilo fonua na‘a mou fakafisi ki ai."

1 Samiuela 16:22

"22Pea ‘alu ‘a e fekau ‘a Saula kia Sese, ‘o pehē, Tuku mu‘a ‘a Tēvita ke fakafe‘ao kiate au, he ‘oku ou matamatalelei‘ia ai."

'Aisea 7:15-16

"15Ko e pota mo e honi‘ene me‘akai, fe‘unga mo ‘ene poto ke teke‘i ‘a e kovi mo fili ‘a e lelei. 16He te‘eki ke poto ‘a e tamasi‘i ke teke‘i ‘a e kovi mo fili ‘a e lelei, kuo li‘aki ‘a e kelekele ko ē, ‘a ia ‘oku ke mate teki ki hono ongo tu‘i."

Naʻe tuputamaki ʻa e ʻOtuá, ʻi heʻenau taʻetuí, mo ʻenau talangataʻá. Pea pehē ʻe Mosese “Naʻe tuputamaki foki ʻa e ʻEikí kiate au, koeʻuhi ko kimoutolu.” Ko e taki eni ʻo e kakaí, kuo hoko ia ko e taumuʻa ʻo e houhau ʻa e ʻOtuá. Naʻe ʻikai ke ne lava ʻo hū ki he fonua, koeʻuhi he naʻa ne talangataʻa ki he ʻOtuá, ʻaki ʻene taaʻi ʻa e maka, ki ha vai hili ia ʻa hono talaange kia Mosese ke lea ki he maká, ka ne taaʻi ia ʻe ia ʻaki hono tokotokó. Neongo ko Mosese heʻikai te ne ʻomi kinautolu ki he fonua ko Kenaní, ka ko Siosiua te ne fakahū kinautolu he naʻe folofola ʻa e ʻOtuá kia Mosese “Ke ke poupou ki ai he ko ia te ne fakatofiʻa ʻa ʻIsileli”, he ʻe sio ʻa Siosiua ʻi heʻene taki atu ʻa e kakaí ʻoku ʻikai ʻalu ʻe Mosese pea ʻe lotosiʻi. Pea ʻikai ko ia pe, ka ko e kakai ʻe hū ki Kenani, ko e fānau kei iiki ʻa eni ʻoku pehē ʻe kakai, ʻoku teʻeki ke ʻilo ʻe he fānaú ia ʻa e leleí moe koví, ka ʻe fakahū kinautolu ʻe he ʻOtuá ke nau ʻilo ʻa e fonua naʻe fakafisi ʻenau matuá ke nau hū ki aí (Nom 14:31). Ka naʻe fakahaaʻi ʻe he ʻOtuá ia ʻa ʻene ʻofa, mo fai tonunga ki hono kakaí ʻaki ʻa ʻene maluʻi, ʻenau fānau iikí mei he taʻu 20 ki lalo, ke nau maʻu tofiʻa ʻi he fonua ko Kenaní. Pea neongo ko Siosiua pe, mo Kelepi te na hū moe fānau ki he fonuá, ka ko e ʻOtuá ʻoku ʻAʻana ʻa e poto moʻoniá, pea ʻoku Ne malava noa pe, ke Ne tauhi ʻa e toʻutangata foʻou, mo kei iiki ni ʻi he fonuá. Naʻa ne fakahā kia kinautolu hono lelei, ka naʻe ʻikai ke nau tui ki ai, ka nau tui pe kinautolu ki he faleʻi ʻa e kau asiasi, naʻa nau fili ki aí, he ko ʻenau sio fakaetangata ē, kuo nau taʻetui ai, mo talangataʻa pea ke nau foki atu ʻi he hala ki he tahi kulokulá ʻo nau ʻauha ai. Kāinga Moʻui Foʻou, ko hotau ui ē, ke tau hiki hotau ʻOtua ʻofaʻangá ʻia Kalaisi ʻi he tui, mo e falala kakato ki he mingimingiʻi meʻa kotoa pe, kuo ne folofola ki ai heʻene folofolá, pea ke tau talangofua kakato foki, maʻa hono langilangí.