Pulelulu 8 Fepueli, 2017

TEUT 1:15-18; 16:18; EKI 18:25,26; SEM 2:1

Teutalonome 1:15-18

"15Pea u to‘o ‘a e kau pule ‘i homou ngaahi matakali, ko e tu‘unga me‘a poto mo ‘ilonga, pea u fakanofo kinautolu ko e kau pule kiate kimoutolu, mo‘o kapiteni ‘o e ngaahi toko afe, pea mo‘o kapiteni ‘o e ngaahi toko teau, pea mo‘o kapiteni ‘o e ngaahi toko nimangofulu, pea mo‘o kapiteni ‘o e ngaahi toko hongofulu, pea mo‘o kau ‘ōfisa ‘i homou ngaahi matakali. 16Pea u kouna homou kau fakamaau ‘i he taimi ko ia, ‘o pehē, Fanongo ki he ngaahi me‘a ‘oku ‘omi ‘e homou kāinga, pea mou fakamaau totonu ‘i he vaha‘a ‘o e tangata mo e tangata, pea mo e vaha‘a ‘o e tangata mo ‘ene muli. 17‘E ‘ikai te mou hūmataniu ‘i he fai ‘o e fakamaau; te mou tali tatau ‘a e si‘i mo e lahi; ‘e ‘ikai te mou toka‘i ha fōtunga ‘o ha tangata, he ko e fakamaau ko e me‘a ‘a e ‘Otua ia: pea ko e me‘a ‘oku faingata‘a fau kiate kimoutolu te mou ‘omi kiate au, ka u tali ia ‘e au. 18Pea na‘a ku tu‘utu‘uni kiate kimoutolu ‘i he taimi ko ia ‘a e ngaahi me‘a te mou fai"

Teutalonome 16:18

"18Te ke fokotu‘u hao kau fakamaau mo hao kau ‘ōfisa ‘i he ngaahi kolo kotoa pē ‘oku ‘atu ‘e Sihova ko ho ‘Otua, ‘o fakamatakali: pea te nau fakamaau ‘a e kakai ‘aki ‘a e fakamaau totonu. "

'Ekisoto 18:25,26

"25Pea na‘e fili ‘e Mōsese ha kakai fita mei ‘Isileli kātoa, ‘o ne fakanofo kinautolu ko e ngaahi ‘ulu ki he kakai, ko e kau pule ‘o e ngaahi afe, ko e kau pule ‘o e ngaahi teau, ko e kau pule ‘o e ngaahi nimangofulu, ko e kau pule ‘o e ngaahi hongofulu. 26Pea na‘a nau fai fakamaau ki he kakai ‘i he taimi kotoa pē: ‘ilonga ha me‘a faingata‘a na‘a nau ‘omi kia Mōsese, ka ko e ngaahi me‘a iiki na‘a nau fakamaau ‘e kinautolu."

Semisi 2:1

"1SI‘OKU kāinga, ke ‘oua na‘a taka filifilimānako ho‘omou fai‘aki ‘a e tui hotau ‘Eiki ko Sīsū Kalaisi, ‘a e ‘Eiki ‘oku ‘a‘ana ‘a e lāngilangi"

Ko e teuteu ʻo e fakamaau maʻae kakai. Naʻe fakapapauʻi ʻe Mosese ʻa e uhoʻi moʻui ʻa e tokotaha taki lelei. 1. Ke poto. 2. Loto matala (mahino). 3. Kakai ʻilonga (v.13). Ke tau fakafehoanaki mo kau taki ʻo e ʻaho ni ʻo kehe ia mei he kau taki ko eni naʻe fili ʻe ʻIsilelí. Ko e fili ia pe kau taki ʻo e ʻaho ni, ko e matamata lelei, koloaʻia, manakoa, loto ke fai pe ha meʻa ko ia ʻoku maʻolunga taha. Kaekehe kuo tau ʻosi lave ki ai ʻa e uhoʻi moʻui naʻe fili mei ai ʻa e kau tokoni ʻe toko 7 ʻi he uhoʻi moʻui ko eni, ongoongolelei, fonu ʻi he laumalie mo poto. Kaekehe, pea toʻo leva ʻa e kau pule mei he ngaahi matakali, ke nau tokoni, hono puleʻi ʻa e kakai, ko e kau pule ki he toko afe, kau pule pe kapiteni ki he toko teau, kau kapiteni ki he toko nimangofulu, mo e kau kapiteni ki he toko hongofulu. Pea ʻai mo e kau fakamaau, pea ʻoku fiemaʻu ʻa e faitotonu, mo fai tatau ki he iiki mo e lalahi, ʻi hono tokangaʻi, mo hono tataki ʻo e kakaí ki he fonua ʻo e talaʻofá. Pea ko e konga ko ‘eni, kuo palani ia ke lau leʻolahi ko e fakamatala, ki he tonunga ʻa e ʻOtuá ki he kotoa ʻo hono kakaí, pea mo ʻenau tali lelei ʻa ʻene tataki kinautolú.

Ko e ngaahi lao lelei kuo ʻoange maʻa ʻIsileli, mo e kau tangata lelei ke nau fakahoko ʻa e ngaahi fakamaau maʻa kinautolu. ʻIo, he ko e fakamaau ʻa e ʻOtuá pea ko e kau fakafofonga ʻo e ʻOtuá ko ʻenau ngāue maʻana, pea ko ia ai ke nau ngāue ʻo hangē ko Ia pea kapau te ke fakamaau totonu. Ko ʻOtua ʻoku ne tokoniʻi ia. Ko e fakamaau maʻana, ko ia ai te ne hanga ʻo maluʻi koe ʻi he fai meʻa lelei koeʻuhi ko Ia. ʻOku fakamoʻoni mai ʻa Semisi “Ke ʻoua naʻa taka filifili manako hoʻo mou fai ʻaki ʻa e tui ʻa hotau ʻEiki ko Sīsū Kalaisi, ʻa e ʻEiki ʻoku ʻaʻana ʻa e langilangi” Ko e ngaahi ngāue totonu ko e ʻulungaanga fakaenatula ia ʻo e tui moʻoní. Ko e tui taʻe ʻi ai ha ngāue lelei, ʻoku ʻikai ke fai ʻe ha taha ia ha lelei, ke ne fakahaaʻiʻaki ʻa ʻene tui, ko e tui hā atu ʻi he ngāue. ʻOku fakamamafa’i ʻe Paula, ko e taumuʻa ʻo e tuí, ke ʻomi ʻa e fakamoʻui, ko e fakamamafaʻi ʻe Semisi, ko e ola ʻo e tuí, ke liliu ʻa e mouí, ʻo hā ia he ngāue leleí.