Pulelulu 1 Fepueli, 2017

NOM 35:22-28; EKI 21:13; 29:7; SIOS 20:6

Nomipa 35:22-28

"22Ka ‘o kapau na‘a ne velo‘i ia fakafokifā, ta‘e te ne fili ‘aki ia; pe na‘a ne lisingi ia ‘aki ha me‘a, ka na‘e ‘ikai te ne toitoi ki ai; 23pe na‘a ne fai‘aki ha maka ‘e ngali mate ai ha taha, ka na‘e ‘ikai te ne sio kiate ia, ka ne lī pē ‘o tau kiate ia, ‘o ne pekia; ka na‘e ‘ikai ko hono fili ia, pea na‘e ‘ikai te ne feinga ke fai ha kovi ki ai; 24pea ‘e toki fakamaau ‘e he fakataha ‘i he vaha‘a ‘o ia na‘a ne tā pea mo e koeli tongitoto, ‘o fakatatau ki he ngaahi kupu‘i konisitūtone ko eni: 25pea ‘e fakahaofi ‘e he fakataha ‘a e fakapō mei he nima ‘o e koeli tongitoto, pea te nau fakafoki ia ki hono kolo-hūfanga ‘a ia ne ne hola ki ai, pea te ne nofo ai ‘o a‘u ki he pekia ‘a e taula‘eiki-lahi, ‘a ia kuo pani ‘aki ‘a e lolo tapu. 26Ka ‘o kapau ‘e momo‘i ‘alu ‘a e fakapō ki he tu‘a laine ‘o hono kolo-hūfanga, ‘a ia kuo ne hola ki ai; 27pea ma‘u ia ‘e he koeli tongitoto ‘i he tu‘a laine ‘o hono kolo-hūfanga, pea ka tāmate‘i ia ‘e koeli tongitoto; ‘e ‘ikai lau ia ko e fakapō: 28koe‘uhi na‘e totonu ke ne nofo ‘i he kolo-hūfanga ‘o a‘u ki he pekia ‘a e taula‘eiki lahi: ka hili ‘a e pekia ‘a e taula‘eiki lahi, pea ‘e toki foki ‘a e fakapō ki he fonua ‘oku tu‘u ai hono tofi‘a"

'Ekisoto 21:13

"13Pea kapau na‘e ‘ikai ko ha‘ane lamalama, ka ko e ‘omi ‘e ‘Elohimi ki hono nima; pea te u toki tu‘utu‘uni ma‘au ha potu te ne hola ki ai."

'Ekisoto 29:7

"7Pea te ke toki to‘o ‘a e lolo pani, ‘o lilingi ki hono ‘ulu ke pani ‘aki."

Siosiua 20:6

"6Pea te ne nofo ‘i he kolo ko ia, ‘o a‘u ki he‘ene tu‘u ‘i he ‘ao ‘o e fakataha ke fai hono fakamaau, ‘o a‘u ki he pekia ‘o ia na‘e taula‘eiki-lahi ‘i he taimi ko ia: pea ‘e toki foki ‘a e tangata tāmate, ‘o ‘alu ki hono kolo mo hono fale, ‘a e kolo na‘a ne hola mei ai."

Ko e tuʻunga ʻo e tamate tangata fakafokifā taʻefakakaukau ki ai pe te ne fili ʻaki ka ko e lī pe ha meʻa ʻo tau ʻi ha tokotaha ʻo ne mate ai. Pea ko ʻene hoko pehē pē pea ʻoku hola leva ʻa ia naʻa ne fakahoko ʻa e mate fakafokifaá, ʻo nofo ʻi he kolo hufangá. Pea ʻoku fakafoki mai ʻo fai hono fakamaauʻi ʻe he fakataha, ʻi he vahaʻa ʻo e tokotaha tamaté, pea mo e tokotaha fai sauní, ʻa ia ko e koeli tongitotó ia. Pea ʻe fakaʻatā leva ia ʻe he fakatahá mei he fakapoó, pea fakafoki leva ia ki he kolo hufangá ʻo ne nofo ai, ʻo aʻu ki he toki mate ʻa e taulaʻeiki lahí, pea toki ʻatā ke foki ki hono feituʻú ʻoku ʻi ai ʻa hono tofiʻá. Pea kapau ʻe hola ʻa e taha ki tuʻa laini ʻo e kolo hufangá, pea fetaulaki ai ʻi tuʻa laini, mo e koeli tongitoto ʻo ne tamateʻi ai ʻa e tokotaha fakapoó, ʻe ʻikai lau ia ko e fakapō, he ko hono tonú, ke nofo pe ia ʻi he kolo hufangá kaeʻoua kuo mate ʻa e taulaʻeiki lahí.

Ko Kalaisi taha pē, kuo fakanofo ko hotau hufangaʻanga, ha feituʻu pe ʻoku tau ʻi ai, ko ia ʻa e hufangaʻanga ʻoku tau maʻu, ke Ne tokoni leva he taimi pe ko ia, ko ʻEne folofolá ʻoku ofi kia kitautolu he ko Kalaisi ʻoku ʻi he Folofolá. Ko e maluʻi ʻo e tokotaha fakapoó, naʻe maʻu ia ki he kolo hufangá naʻe ʻikai hano moʻua ki ha meʻa ʻe taha ʻi ai, ka ko e moʻoni ʻo e kosipelí ʻoku ne ʻomi ʻa e hao ʻo e Laumalié ʻia Kalaisi, pea kuo ʻiate ia, kuo silaʻi ia ʻe he ʻOtuá ko e Tamai, ko e hufangaʻangá, ko ʻetau ngaahi angahala, kuo talaki ʻa hono sauni ʻi mamahi ʻa e ʻOtua maʻoniʻoni, ka ʻi Heʻene meesi taʻengata, kuo Ne teuteu ai ha hufangaʻanga, ke tau hola ʻo hao ki ai, ʻia Kalaisi Sīsū. Pea ke tau piki ai pe, mo hokohoko atu hono faofao ʻo ʻetau tuí, ʻo makatuʻunga ʻiate ia. Pea ke tau tokanga foki, he ʻoku ngaohi koviʻi ʻa e hufangaʻanga ko ení, ʻaki ʻa e angahala ko e ʻafungi, he ʻoku ʻikai ha hufangaʻanga maʻae kau angahala ʻafungí, ʻoku nau ʻalu halalotoʻapi “He kapau ʻoku tau angahala fie angahala, hili ʻetau ʻilo kanokano ki he moʻoni, ʻoku ʻikai kei toe ha feilaulau. Koeʻuhi ko e angahala, ka ʻoku toe pe ʻete nofoʻaki tali ilifia ki he fakamaau pea ʻoku toe pe ʻa e fuaʻa ʻa ha afi, ʻa ia te ne keina ʻa e kakai ʻoku angatuʻú”. Ko e angatu’u ko ‘eni ko e AFUNGI ia.