Falaite 3 Fepueli, 2017

NOM 36:1-4; 26:29,33; 27:1,7; LEV 25:10

Nomipa 36:1-4

"1PEA na‘e fe‘unu‘i mai ‘a e hou‘eiki ‘ulumotu‘a ‘i he fāmili ‘o ha‘a Kiliati, foha ‘o Mākili, ko e hoko ‘o Manase, ko e taha ‘i he ngaahi fāmili ‘o ha‘a Siosifa, pea nau lea ‘i he ‘ao ‘o Mōsese, pea ‘i he ‘ao ‘o e hou‘eiki ‘ulumotu‘a ‘o ha‘a ‘Isileli: 2pea nau pehē, Na‘e fekau ‘a e Feitu‘u na ‘e Sihova ke tufa talotalo ‘a e fonua ke tofi‘a ‘aki ‘e ha‘a ‘Isileli, pea na‘e tu‘utu‘uni ‘a e Feitu‘u na ‘e Sihova ke tuku ‘a e tofi‘a ‘o Silofehati ko homau tokoua ki he‘ene fānau fefine. 3Pea ka nau ka mali mo e hako ‘o ha matakali kehe ‘o ha‘a ‘Isileli, pea ‘e ‘ave honau tofi‘a mei he tofi‘a ‘o homau tupu‘anga, ‘o fakalahi ‘aki ‘a e tofi‘a ‘o e matakali te nau kau ki ai, pea ‘e mole ia mei homau tofi‘a kuo tō. 4Pea ka hoko ‘a e siupeli ki ha‘a ‘Isileli, pea ‘e toki fakahoko honau tofi‘a ki he tofi‘a ‘o e matakali ko ia te nau kau ki ai: pea ‘e mole honau tofi‘a mei he tofi‘a ‘o e matakali ‘o homau tupu‘anga."

Nomipa 26:29, 33

"29Ko e hako ‘o Manase: meia Mākili, ‘a e fāmili ‘o ha‘a Mākili: pea tupu meia Mākili ‘a Kiliati: meia Kiliati, ‘a e fāmili ‘o ha‘a Kiliati. 33Ka ko Silofehati ko e foha ‘o Hēfeli na‘e ‘ikai ha‘ane fānau tangata, ko e ngaahi ‘ōfefine pē: pea ko e hingoa ‘o e ngaahi ‘ōfefine ‘o Silofehati ko Māhala mo Noa, ko Hōkela, Milika, mo Tīlisa."

Nomipa 27:1,7

"1PEA ‘unu‘unu mai ‘a e ngaahi ‘ōfefine ‘o Silofehati, foha ‘o Hēfeli, foha ‘o Kiliati, foha ‘o Mākili, foha ‘o Manase, ‘o kau ki he ngaahi fāmili ‘o ha‘a Manase, ko e foha ‘o Siosifa: pea ko e ngaahi hingoa eni ‘o e ngaahi ‘ōfefine ko ia, ko Māhala, Noa, mo Hōkela, pea mo Milika mo Tīlisa. 7‘Oku mo‘oni ‘a e lau ‘a e ngaahi ‘ōfefine ‘o Silofehati: te ke vahe pē ha konga kelekele mo‘onau tofi‘a ‘i he lotolotonga ‘o e kāinga ‘o ‘enau tamai; pea te ke fakalaka kiate kinautolu ‘a e tofi‘a ‘o ‘enau tamai"

Levitiko 25:10

"10Pea te mou tapui ‘a e ta‘u ko hono nimangofulu, pea te mou fanongonongo tau‘atāina ‘i he fonua ki he kau nofo kotoa: ko e Siupeli ia kiate kimoutolu, pea te mou foki takitaha ki hono tofi‘a, pea foki takitaha ki hono fāmili"

Ko Silofehati mei he hako ʻo Manase mei he famili ʻo Siosifá. Naʻa ne maʻu ha ngaahi ʻofefine ʻe toko nima ka naʻe ʻikai hano foha, pea hili ʻene mate naʻe haʻu ʻa hono ngaahi ʻofefiné ʻo nau tangi kia Mosese koeʻuhí ko e maʻu tofiá, ko hono angamahení ʻoku ʻalu pe ia ʻi he laine ʻo e kakai tangatá. Ko e laine fakafāmili ia ʻo Silofehatí, ʻe hala he naʻe ʻikai hano foha. Pea naʻe folofola ʻa e ʻOtuá kia Mosese, kapau leva ʻe mate ha tangata taʻe ʻi ai hano foha, ko hono tofiʻá ʻe ʻalu ia ʻi hono ngaahi ʻofefine (27:8). Ka ko e fehuʻi ki he mali naʻe ʻohake kapau leva ʻa e ngaahi ʻofefine te nau mali kinautolu kituʻa mei honau matakali ʻe lau leva ʻa e kelekele ia ki he matakali, ko ē ʻoku mali ki ai. ʻI he taʻu ʻo e Siupelí. Naʻe fekau leva ʻe Mosese ʻi he keisi ko eni, ʻo fakatatau ki he tuʻutuʻuni ʻa e ʻOtuá, ke faʻiteliha pe ʻa e kakai fefine ki heʻenau malí, ʻa e tokotaha te nau mali mo iá, ka ko ha taha pe ʻi he famili ʻo e matakali ʻoku nau kau ki ai, koeʻuhi ke nau tauhi pe ʻa e tofiʻa, honau tupuʻangá, pea ʻoua naʻa hiki ha tofiʻa ha matakali ki ha matakali, kae takitaha hono tofiʻa tupuʻanga.

Ko e meʻa ʻe ua naʻe fai ki ai ʻa e sió. 1. Ke fakatolonga ʻa hono vahe fakaʻOtua ko eni ʻa e ngaahi tofiʻá, pea ke nau fai ki he fekaú he ko e fonua ʻoku totonu ʻa hono vahe ke ʻoange pe ia ki he ngaahi matakali molumalu, telia naʻa maumau ʻa e fokotuʻutuʻu fakaʻOtua. 2. Pea ka maluʻi ʻa e fekeʻikeʻi ʻo e toʻutangata ʻo e kahaʻu, he ka haʻu ha matakali kehe ki he tofiʻa ʻo haʻa Manasé, te nau ʻeke ʻe nautolu ki ai he meʻa kotoa pe. Kāinga, ʻoku ʻafioʻi ʻe he ʻOtuá ʻa e meʻa kotoa pe pea ʻoku totonu mo kitautolu kuo tau ʻi he ʻEiki ko Sīsū Kalaisi, ke tau fakahā kiate Ia ʻetau meʻa kotoa pē, he ko Ia ʻoku ʻi ai ʻa e mafai fakaleveleva ki he meʻa kotoa pe, he ko e tuai e kemo ʻa ʻetau fou atu ʻi hono lotoʻi finangaló, kuo ne tali mai ʻa ʻetau fiemaʻú.