Teutalonome 15:19-23; 12:5-7,16-18,22; ʻEkisoto 13:2; Levitiko
22:10-25
Teutalonome 15:19-23
"19Ko e ‘olopo‘ou ‘oku fanau‘i ‘e ho‘o monumanu, ‘a e tangata, te ke fakatāpui mo‘o Sihova ko ho ‘Otua: ‘e ‘ikai te ke ngāue‘aki ‘a e ‘olopo‘ou ‘o ho‘o pulu, pea ‘e ‘ikai te ke kosi ‘a e ‘olopo‘ou ‘o ho‘o sipi pe kosi. 20‘I he ‘ao ‘o Sihova ko ho ‘Otua te ke kai ia ‘i he ta‘u mo e ta‘u, ‘a koe mo ho fale, ‘i he potu ‘e fili ‘e Sihova. 21Pea kapau ‘oku ai hano ‘ila–‘oku heke, pe kui; ha ‘ila kovi–‘e ‘ikai te ke feilaulau ‘aki ia kia Sihova ko ho ‘Otua. 22Te ke kai pē ‘i ho kolo: ko e ta‘ema‘a mo e ma‘a ‘e fakatou kai ai, ‘o hangē ko e fai ki he kaseli mo e tia. 23Ngata ‘i he toto, ‘e ‘ikai kai ia: te ke lilingi ia ki he kelekele ‘o hangē ha vai."
Teutalonome 12:5-7,16-18,22
"5Kaekehe, ko e potu ‘e fili ki ai ‘e Sihova ko homou ‘Otua mei homou ngaahi matakali ke ‘ai ki ai hono huafa, ‘io, ko hono ‘afio‘anga te mou kumi ki ai, pea te mou ‘alu ki ai: 6pea te mou fetuku ki ai ho‘omou ngaahi feilaulau-mōifua, mo ho‘omou tāmate manu, mo ho‘omou tukuhau-hongofulu, mo e me‘a kuo hapai ‘e homou nima, mo ho‘omou ngaahi tukumo‘ui, pea mo ho‘omou ngaahi me‘a‘ofa, mo e ‘olopo‘ou ‘o ho‘omou fanga manu: 7pea ko e potu ko ia te mou kai ai ‘i he ‘ao ‘o Sihova ko homou ‘Otua, pea te mou fiefia ‘i he me‘a kotoa te mou ala ki ai, ‘e kimoutolu mo homou ngaahi fale, ‘a ia kuo tāpuaki ‘aki koe ‘e Sihova ko ho ‘Otua. 6Kaekehe ‘e ‘ikai te mou kai ‘a e toto; te ke lilingi ia ki he kelekele hangē ko e vai. 18ka te ke kai ia ‘i he ‘ao ‘o Sihova ko ho ‘Otua ‘i he potu ‘e fili ki ai ‘e Sihova ko ho ‘Otua, ‘a koe, mo ho foha, mo ho ‘ōfefine, mo ho‘o tamaio‘eiki, mo ho‘o kaunanga, mo e Līvai ‘oku ‘i ho kolo: pea te ke fakafiefia ‘i he ‘ao ‘o Sihova ko ho ‘Otua ‘i he me‘a kotoa kuo ke ala ki ai. 22‘O hangē ‘oku kai ‘a e kaseli mo e tia, ‘e pehē ho‘o kai ia; ‘e kai ai ‘a e ta‘ema‘a mo e ma‘a fakatou‘osi."
ʻEkisoto 13:2
"2‘ilonga ‘a e ‘olopo‘ou ‘i ha‘a ‘Isileli, ‘i he tangata mo e manu, ‘e ‘o‘oku ia."
Levitiko 22:10-25
"10‘Ilonga ha kehe ‘e ‘ikai te ne kai ‘a e me‘a ‘oku tapu: ha taha ‘oku ‘āunofo ki he taula‘eiki, pe ha ngāue unga, ‘e ‘ikai te ne kai ‘i he me‘a tapu. 11Ka ‘o kapau ko ha tokotaha kuo fakatau ‘e he taula‘eiki, ko e fua ‘o ‘ene pa‘anga, te ne kai ai: pea mo kinautolu kuo fanau‘i ‘i hono fale, te nau tokoni kinautolu ‘i he‘ene me‘akai. 12Ko e ‘ōfefine foki ‘o ha taula‘eiki kuo mali mo ha kehe ‘e ‘ikai kai ia ‘i he ngaahi me‘a tapu kuo apo. 13Ka ‘o kapau kuo uitou ‘a e ‘ōfefine ‘o ha taula‘eiki, pe kuo vete, pea ‘oku ‘ikai ha‘ane fānau, pea kuo ne foki ki he fale ‘o ‘ene tamai, ‘o hangē ko ha‘ane finemui, ‘e kai ‘e ha taha pehē ‘i he me‘akai ‘a ‘ene tamai: ka ‘e ‘ikai tokoni ai ha kehe. 14Pea kapau ‘e tokoni ta‘e‘ilo ‘e ha taha ‘i he me‘a tapu, pea te ne toki ‘atu ki he taula‘eiki ‘a e me‘a tapu ko ia, mo fakalahi ‘aki hano vahenima. 15‘Io, ‘e ‘ikai te nau fakame‘avale‘i ‘a e ngaahi me‘a tapu ‘a ha‘a ‘Isileli, ‘a ia kuo nau hapai kia Sihova; 16‘o hilifaki ai ki he kakai ha hia fakahalaia ‘i ha‘anau kai ‘enau ngaahi me‘a tapu; he ko Sihova au ‘oku ou fakatāpui ‘a e ngaahi me‘a ko ia. 17Pea folofola ‘a Sihova kia Mōsese, ‘o pehē, 18Lea kia ‘Ēlone mo hono ngaahi foha, pea mo ha‘a ‘Isileli kātoa, pea tala kiate kinautolu, Ka ai ha taha ‘i ha‘a ‘Isileli, pe ‘i he muli ‘oku nofo mo e ‘Isileli, ‘a ia ‘oku ne ‘atu ha‘ane kōpano, (pe ko ha‘anau tukumo‘ui, pe ko ha‘anau me‘a‘ofa pē ‘a e kōpano ko ia, ‘a ia ‘oku nau ‘atu kia Sihova), ko e feilaulau-mōifua. 19Pea koe‘uhi ke fai ai ha hōifua kiate kimoutolu, te mou ‘atu ha manu ta‘ehano mele, ko e manu tangata, pe ko ha pulu, pe sipi, pe kosi. 20Ka ko e manu ‘oku ‘ila ‘e ‘ikai te mou ‘atu, he ‘e ‘ikai fai ai ha hōifua kiate kimoutolu. 21Pea ko ia ‘oku ne ‘atu ha feilaulau-‘ofa kia Sihova ke fakaai ‘ene tukumo‘ui, pe ke feia ha me‘a‘ofa; pe ko ha pulu pe ko ha sipi ka ‘e haohaoa pē kae tali: ‘e ‘ikai ‘i ai ha momo‘i mele. 22Ko e manu ‘oku kui, pe fasi, pe ‘oku fakakonga pē, pe ‘oku ‘au, pe ‘oku pokua, pe lafa‘ia, ‘e ‘ikai te mou ‘atu ha me‘a pehē kia Sihova ke feia ‘aki ha feilaulau tutu ma‘a e ‘Eiki ‘i he ‘ōlita. 23‘E ngofua ha‘o ‘atu ha pulu pe lami ‘oku hulu atu hano konga, pe ‘oku masiva, ‘o kapau ko ha me‘a‘ofa pē; ka ‘e ‘ikai tali ia ki ha tukumo‘ui. 24‘E ‘ikai te mou ‘atu ha fufula kia Sihova, pe ko e momosi pe tuki, pe mio‘i, pe faito‘o: ‘io, ‘i homou fonua ‘e ‘ikai te mou ngaohi ha manu ke pehē. 25Pea ‘e ‘ikai te mou tali mei ha muli ha taha ‘o e ngaahi me‘a ko ia ke ‘atu mo‘o me‘akai ‘o homou ‘Otua; he kuo e‘a ai honau fakaka‘anga; ‘oku ‘i ai ha mele: ‘e ‘ikai fai ai ha hōifua kiate kimoutolu."
KO HONO FAKAʻAPAʻAPAʻI ʻA E OLOPOʻOU ʻO E PULÚ. Ko hono toe ʻai ʻa e laó
ni, ʻo fekauʻaki mo e olopoʻou ʻenau fanga pulú (ʻEki 22:30). Pea ko e tanaki
mai ki he laó ni, ko e hā ha meʻa ʻe fai ʻaki ʻa e olopoʻou ni. Ko olopoʻou,
kapau ko ha pulu tangata pea ʻe fai ʻaki ʻa e feilaulau, pea heʻikai tutu ia ʻi
he ʻolitá, ka ko e meʻakai ia ʻa e kau taulaʻeiki (Nom 18:17,18). Pea kapau
leva ko e pulu fefine, pea heʻikai ngāueʻaki ia ʻo hangē ko e pulu tangataá, ka
ʻe fai ʻaki ia ʻa e feilaulau ʻofa ʻi he ʻosi ʻa e taʻú. Ko e olopoʻoú leva ʻoku
ʻi ai hano mele, kuopau ia heʻikai ngāueʻaki ki he feilaulau, pe ko e ngaahi
katoanga toputapú, he ʻoku ʻikai ke feʻunga ia, ke fakalangilangiʻaki ʻa e ʻOtuá,
pe ko e fakataipe ʻaki ʻa Kalaisi, he ko e lami taʻemele. Ka kuopau p eke nau
tamateʻi pe ʻa e fakamanu ʻoku mele, ʻo nau kai pe ʻi honau ngaahi fale. ʻOku ʻikai
ke tau hangē ʻi he taimi ni ko ʻIsilelí ʻoku fai ki ai ʻa e talanoá. ʻOku ʻikai
ke toe faikehekehe ʻa e pulu olopoʻou, pe ko e lami, pea mo e toenga ʻo e
fakamanu. Ke mahino pe kia kitautolu ko e kosipeli ʻoku ʻuhinga ki ai ʻa e lao
ni. Ke lioa pe kitautolu mo hotau ʻuluaki taimi ʻo fakamalohiʻi ki he ʻOtua.Ko
e makatuʻunga ʻo e lao ko ení, ko e mate ʻa e olopoʻou ʻa e kau ʻIsipite, kae
hao pe ʻa e kau olopoʻou, ʻa haʻa ʻIsilelí. Ko e ʻOtuá naʻa ne fakamoʻui ʻa e
kau olopoʻoú ʻoku kau ange kiate iá. Naʻe ʻamanaki pe ʻa e ʻOtuá, ko e
leleitahá mei ʻIsileli. He ko ia honau Tuʻí, ko ʻenau Tamai, mo honau ʻOtua
(Mat 1:8). Ko hono feilaulau ʻaki ʻa e lelei taha ki he ʻOtua, ko e fakalaka ia
ʻo e Tuʻí, ʻoku hangē ia ko e fuaʻiʻakau polopolo ki he meʻa moʻui kotoa. Pea
ke tau ngāueʻaki ʻa e kotoa hotau faingamalie, mo e fiefia ki hono fakafetaʻia ʻi
he malumalu ʻo e tataki ʻo ʻene lao, he kuo tau moʻui kotoa ʻaki ʻene meʻaʻofa,
pea naʻe taipe pe ʻa hono ʻomi ʻo e lao, ki hono ʻomi ʻa e ʻEiki huhuʻi, ko e
meʻaʻofa pe maʻa māmani, kae monū pe maʻa kinautolu, ʻoku tui falala ki he meʻaʻofa
taʻengata. Ko e ʻEiki ko Sīsū Kalaisi ʻo tau hiki ai mei he mate ki he moʻui maʻoniʻoni
maʻae ʻOtuá. Fakafetaʻi!
No comments:
Post a Comment