Tokonaki 6 Me, 2017

Teutalonome 16:9-12; 19:17; ʻEkisoto 23:16; 34:22; Nomipa 28:26

Teutalonome 16:9-12

"9Te ke lau hao uike ‘e fitu: te ke kamata ke lau ‘a e uike ‘e fitu mei ho‘o fua ‘ai ‘a e hele ki he ta‘u uite. 10Pea te ke fai ‘a e Kātoanga Lau-uike kia Sihova ko ho ‘Otua, ‘o fakatatau ki he lahi ‘o e me‘a‘ofa ‘a ho nima, ‘a ia te ke foaki, ‘o taau mo ho tāpuekina ‘e Sihova ko ho ‘Otua: 11pea te ke fakafiefia ‘i he ‘ao ‘o Sihova ko ho ‘Otua, ‘e koe, mo ho foha, mo ho ‘ōfefine, mo ho‘o tamaio‘eiki, mo ho‘o kaunanga, mo e Līvai ‘oku ‘i ho kolo, pea mo e muli mo e tamai mate mo e fine uitou ‘oku ‘i ho lotolotonga, ‘i he potu ‘e fili ‘e Sihova ko ho ‘Otua ke ‘afio ai hono huafa. 12Pea te ke manatu na‘a ke pōpula mo koe ‘i ‘Isipite: pea te ke tokanga mo fai ‘a e ngaahi tu‘utu‘uni ko eni."

Teutalonome 19:17

"17pea ‘e fakatou tutu‘u ‘a e ongo me‘a ‘oku na fakamaau ‘i he ‘ao ‘o Sihova, ‘i he ‘ao ‘o e kau taula‘eiki mo e kau fakamaau ‘o e taimi ko ia"

'Ekisoto 23:16

"16Pea ko e Kātoanga ‘o e Polopolo-ta‘u, ko e ‘uluaki fua ‘o ho‘o ngāue, ‘o e me‘a kuo ke tō ‘i ho‘o ngoue. Pea ko e Kātoanga Utu ta‘u ‘oka ‘osi ‘a e ta‘u, ‘i ho‘o fetuku mai ho‘o fita‘a mei he ngoue‘anga."

'Ekisoto 34:22

"22Pea te ke fai ‘a e Kātoanga Lauuike, ‘a e Polopolo Uite, pea mo e Kātoanga Ututa‘u ‘i he faka‘osi ‘o e ta‘u."

Nomipa 28:26

"26‘I he taimi foki ‘o e polopolo ta‘u, ‘i ho‘omou ‘atu ha feilaulau-me‘akai fo‘ou kia Sihova, ‘i ho‘omou kātoanga Lau-uike, ‘e fai ha‘amou fakataha tapu: ‘ilonga ha ngāue fakatamaio‘eiki ‘e ‘ikai te mou fai"

KO E UIKE ʻE FITU HILI ʻA E PASOVÁ, ko e katoanga ʻo e Penitekosi naʻe tauhi. Pea ke nau tauhi ʻa e katoanga ni, ko ʻenau fakamoʻoni houngaʻia ʻi he ngaahi lelei ʻa e ʻOtuá kia kinautolu, pea ʻi he ngaahi fai meesi ʻi he polopolo ʻo ʻenau ngoue uite kuo toki hili angé. ʻIo, kuopau ke nau fiefia ʻi he ʻao ʻo e ʻOtuá. Ko e fiefia maʻoniʻoni ʻoku ʻi he loto, mo e laumalie, ʻa e fakamālō mo e fakafetaʻi, ʻoku fakahaaʻi ʻi he lea ʻa e fiefia maʻoniʻoni. Kuopau ke nau fiefia maʻu mei he ʻOtua pea ke nau foki ki he ngāue, mo e feilaulau kiate ia, pea ko hotau fatongia ke fai mo e fiefia.

Ko e fononga eni ʻa haʻa ʻIsileli mei he tahi kulokula, kaeʻoua kuo nau aʻu ki he veʻe Moʻunga Sainai, ko e moʻunga ʻo Sihova, ko e hili ia ʻa e ʻaho ʻe 47, pea fekau ʻe he ʻOtuá ke fakamaʻa ʻa e kakai ʻi he ʻaho ʻe 3, pea hili honau fakamaʻá, ko e kakato ia ʻa e ʻaho ʻe 50, ko e Penitekosí leva ia, kuo nau ʻi he moʻunga ʻo Sihová, ke maʻu ʻa e fekau ʻe hongofulú.

Pea ʻi he ʻalu hake ʻa Mosese ki he moʻungá, ke fefolofolai mo Sihová, naʻe ngalulu ʻa e kelekelé pea mumuhu ʻa e matangi ʻo e toafá, pea kakaha ʻa e afi ʻi he tumutumuʻi moʻungá. Fakatatau ki he tukufakaholo ʻa e kau Siú, ko e taimi ko ē naʻe folofola ai ʻa e ʻOtuá, kia Mosesé naʻe ʻikai ko e lea fakahepelū pe, ka ko e lea kotoa naʻe ʻiloa ʻi māmaní, naʻa ne folofola ʻakí. Pea ko e palani ia ki he kahaú, he ko e fekau ʻa e ʻOtuá, kuopau ke ʻi he māmani kotoa ʻo e Senitaile, pea naʻe mate ki ai ʻa e ʻOtuá, hili ʻa e ʻaho ʻe 50 mei he toetuʻu ʻa Sīsū Kalaisi. Pea ko ia pe ʻa e fekau ʻa Sīsū ki heʻene kau akó. “Pea ko kimoutolu te mou nofo ʻi kolo, kaeʻoua ke fakakofuʻaki kimoutolu ha mālohi mei ʻolunga: (Lk 24:49). Pea ʻi he loki ʻi ʻolunga naʻe ʻi ai ʻa e toko 120 ʻo e kau ako, pea fakafonu ʻe he tuʻoni matangi, mo e ngaahi ʻelelo mangamanga mo e afi ʻi honau ʻulu, ko ia pe ʻa e afi naʻe ʻi he moʻunga Sainaí. Pea ko e palomesi pe ia ʻa Sīsū ki hono kau muimuí, “Ka te mou maʻu pē ha malohi, ʻoka hifo ʻa e Laumalie Maʻoniʻoni kiate kimoutolu” (Ng 1:8). Ko e afi ʻi moʻunga Sainaí, ko e ʻata ia ʻo e holo mai ʻa e ivi ʻo e Penitekosi, pea ke fiefia ai ʻa e ngaahi fāmili, pea mo e kau memipa ʻo e Siasi ʻo e ʻEikí, pea ko e ivi ia ke fai ʻaki ʻa e moʻuí, pea mo ʻene ngāue mo talitali ki heʻene foki maí.