Falaite 5 Me, 2017

Teutalonome 16:1-8; ʻEkisoto 12:2,8,11,15-16,19

Teutalonome 16:1-8

"1TAUHI ‘a e māhina ko ‘Āpipi, mo fai ‘a e Pāsova kia Sihova ko ho ‘Otua: he ‘i he māhina ko ‘Āpipi na‘e fakahao mai koe ‘e Sihova ko ho ‘Otua mei ‘Isipite, po‘uli. 2Pea te ke tāmate‘i ‘a e Pāsova kia Sihova ko ho ‘Otua, ha me‘a mei ho‘o monumanu, ‘i he potu ‘e fili ki ai ‘e Sihova ke ‘afio ki ai hono huafa. 3Tapu ho‘o kiki ‘aki ha me‘a fakalēvani: ko ha fitu‘i ‘aho te ke kiki ‘aki ‘a e mā ta‘elēvani, ko e mā ‘a e mamahi, he na‘e hangē ha hola ho‘o hū mei ‘Isipite; koe‘uhiā ke ke manatua ‘a e ‘aho ‘o ho‘o hū mai mei ‘Isipite ‘i he ‘aho kotoa pē ‘o ho‘o mo‘ui. 4Pea ‘e ‘ikai ‘ilo ‘iate koe ha momo‘i lēvani ‘i ho ngaahi feitu‘u ‘o ‘aho fitu; pea ‘e ‘ikai ‘ahoia ha kakano ‘o e manu na‘a ke feilaulau ‘aki ‘i he efiafi ‘o e ‘uluaki ‘aho. 5‘Oku tapu ho‘o tāmate‘i ‘a e Pāsova ‘i ha taha pē ‘o e ngaahi. kolo ‘oku ‘atu ‘e Sihova ko ho ‘Otua: 6ngata pē ‘i he potu ‘e fili ‘e Sihova ko ho ‘Otua ke ‘afio ai hono huafa, ko e potu ko ia te ke tāmate‘i ai ‘a e Pāsova, efiafi, ‘i he ‘alu hifo ‘a e la‘ā, ‘i he fa‘ahita‘u na‘a ke ha‘u ai mei ‘Isipite. 7Pea te ke ngaohi ia ‘o kai ‘i he potu ‘e fili ki ai ‘e Sihova ko ho ‘Otua: pea te ke foki pongipongi, ‘o ‘alu ki ho ngaahi tēniti. 8Ko e ‘aho ‘e ono te ke kai mā ta‘elēvani, pea ‘i hono ‘aho fitu ‘e fai ‘a e faka‘osi, ko e fakataha kia Sihova ko ho ‘Otua; tapu ha‘o fai ai ha ngāue."

ʻEkisoto 12:2,8,11,15-16,19

"2Ko e māhina ko eni ko e ‘ulu ‘o e ngaahi māhina kiate kimoutolu, ko e ‘uluaki ia ‘i he ngaahi māhina ‘o homou ta‘u. 8Pea te nau kai ‘a e kakano ‘i he pō ko ia, kuo tunu ‘aki ‘a e afi, pea ai mo e mā ta‘elēvani; te nau kiki ‘aki ‘a e lou‘akau konokona. 1Pea ko e anga eni ‘o ho‘omou kai ia; kuo ‘osi no‘o homou kongaloto, pea kuo ‘ai sū homou va‘e, ‘o ma‘u puke homou tokotoko: ‘io, te mou kai ia hangē ha teu ke hola: ko e Pāsova ia kia Sihova. 15Ko e ‘aho ‘e fitu te mou kai mā ta‘elēvani; ‘io, ko e ‘uluaki ‘aho te mou li‘aki ‘a e lēvani mei homou ngaahi fale: he ‘ilonga ha kai me‘a lēvani, mei he ‘uluaki ‘aho ‘o a‘u ki hono fitu, ‘e tu‘usi ‘a e laumālie ko ia mei ‘Isileli. 16Pea ‘i he ‘uluaki ‘aho ‘e fai ha‘amou fakataha tapu, pea mo ha fakataha tapu ‘i hono fitu ‘o e ‘aho; ‘e ‘ikai fai ai ha momo‘i fatongia, ngata pē ‘i ha me‘akai ma‘a e kakai; ko ia pē te mou ngaohi. 9Ko e ‘aho ‘e fitu ‘e ‘ikai ‘iloa ‘a e lēvani ‘i homou ngaahi fale; he ‘ilonga ha kai mā lēvani, ‘e tu‘usi ‘a e laumālie ko ia mei he Fakataha ‘a ‘Isileli, pe ko ha muli ia, pe ko ha tupu ‘i he fonua."

KO E KATOANGA ʻO E PASOVÁ, ke toe fakamanatu mai he ko e katoanga lahi, mo molumalu he naʻe fai ia ʻi he mahina kakato. He ʻoku pehé ni hono leá, “Tauhi ʻa e mahina ko ʻApipi”. Naʻa nau ngāueʻaki ʻa e mā taʻelevani, fakalukufua ʻa e fonua kotoa. Pea ko kinautolu naʻa nau ngata pe ʻi honau ngaahi ʻapí naʻa nau lototaha pe, pea mo kinautolu naʻa nau kai ʻa e Pasová ʻi he tapanekalé. ʻOku ʻomi ʻe he ʻapositoló ʻa e ʻuhinga fakakosipeli, ki he katoanga ko eni, ʻo e mā tapu levani (1 Kol 5:7). Ko Kalaisi ʻetau Pasová, naʻe feilaulauʻi ia maʻa kitautolu, pea kuo tau kau ʻi he tapuaki. Ko e ngaahi fua ʻo e feilaulau ko ia, ko ʻetau fiemalie, pea ke tau tauhi ʻa e katoanga, ʻi ha fepotalanoa ʻoku toputapu, kuo tau tauʻatāina, mei he levani ko e lotokovi, ki hotau fanga tokouá pea mo e malualoi ki he ʻOtuá, he ko e ma tapu levani, ko e moʻoni pe, mo e ʻofa. Pea ki ʻIsileli ke nau tauhi tokanga ʻa e Pasová, ko e hā ʻa hono ngataʻanga, he naʻe ʻi ai ʻa hono kamataʻanga, ke nau manatuʻi ʻa e ʻaho, naʻa nau hū ai ki tuʻa mei ʻIsipité, pea ʻoku ʻikai ko e ʻaho pe ʻo e Pasová, pe ko e lolotonga pe ʻa e ʻaho ʻe fitu ʻo e katoanga, ka ko e kotoa ʻa e ngaahi ʻaho ʻo ʻenau moʻuí (v.3) pea ke fai tuʻumaʻu, ʻa e talangofuá. ʻOku tau katoangaʻi fakamanatu ʻa e pekia ʻa Kalaisí, ʻi he ngaahi taimi pau, pea ʻoku totonu ke tau manatuʻi ia ʻi he taimi kotoa pe, pea ko e ʻuhinga ia ʻoku totonu ai ke tau moʻui Maʻana, naʻa ne pekia maʻa kitautolu pea ne toetuʻu. ʻOku ʻikai totonu ki ha tokotaha tui, ke ngalo ʻiate ia, ʻa hono kamataʻanga maʻulalo ʻa hono tofiʻa, ko e halaia, mo e loto mamahi, pea mo hono fakahaofi anga’ofa, pea mo hono totongi ia ʻe he huhuʻi ʻa Kalaisi. Ko e houngaʻia mo e fiefia ʻi he ʻEikí, koeʻuhi ko e ngaahi ʻaho kotoa ʻo e fefiohi, mo e mamahi ʻo e angahala, pea mo e kataki ʻi he loto maʻulalo ʻi he fakamalumalu ʻo e ngaahi faingataʻa ʻi he hala fononga ki he puleʻanga ʻo Hevaní. ʻIo, kuo fai hono tofa, pea mo hono fakamaʻalaʻala kakato ʻe he ʻOtuá ʻo fakafou mai ʻi hono ʻAlo ʻofaʻanga ko Sīsū Kalaisi, ko ʻetau Pasová ia, ke tau hoko ai ʻiate ia, ko e tokaʻanga kuo ngaohi, kuo ʻikai toe ʻiloa ai ha meʻi levani, ka ko e maʻa pe, mo e maʻoniʻoni, ke tuha pea mo hotau kolo taʻengata. Ko hotau Pasova ē kuo fai, ʻoua naʻa ke tō ai.