Tokonaki 13 Me, 2017

Teutalonome 18:1-8; 10:8,9; Levitiko 7:28-34; Nomipa 18:12; Nehemaia 12:44,47; 1 Kolinito 9:13,14

Teutalonome 18:1-8

"1‘E ‘ikai ma‘u ‘e he kau Līvai taula‘eiki, ‘io, ‘a e matakali Līvai kotoa, ha ‘inasi pe tofi‘a fakataha mo ha‘a ‘Isileli: te nau kai ‘a e ngaahi feilaulau tutu ‘a Sihova mo hono ‘inasi. 2Ka ‘e ‘ikai hano tofi‘a ‘i he lotolotonga ‘o hono kāinga; ko Sihova pē hono tofi‘a, ‘o hangē ko ‘ene folofola ki ai. 3Pea ko eni ‘a e ‘inasi fakakonisitūtone ‘o e taula‘eiki mei he kakai, meiate kinautolu ‘oku fai feilaulau, pe ko e pulu, pe ko e sipi, te nau ‘ange ki he taula‘eiki ha alanga mu‘a, mo e ongo kou‘ahe, mo e kete. 4Ko e polopolo ‘o ho‘o uite, ‘o ho‘o uaine, pea mo ho‘o lolo, mo e polopolo ‘o ho‘o fulufulu‘i sipi te ke ‘ange kiate ia. 5He kuo fili ia mei ho ngaahi matakali ‘e Sihova ko ho ‘Otua, ke tu‘u ke fai ngāue ‘i he huafa ‘o Sihova, ‘a ia mo hono hako ‘o lauikuonga. 6Pea ka ha‘u ho Līvai mei he kolo ‘oku ne ‘āunofo ai, ha taha pē ‘o ho ngaahi kolo ‘Isileli kātoa, ‘o ne ha‘u mo e feinga kotoa ‘o hono loto ki he potu ‘e fili ‘e Sihova ki ai; 7pea te ne fai ngāue ‘i he huafa ‘o Sihova ko hono ‘Otua, ‘o hangē ko e fai ‘a hono kāinga Līvai kotoa ‘oku fakafe‘ao ai kia Sihova. 8Te nau ‘inasi tatau pē ‘enau kai, tukukehe ‘a e pa‘anga mei he fakatau ‘o ‘ene me‘a ‘i hono ‘api tukufakaholo"

Teutalonome 10:8,9

"8‘I he taimi ko ia na‘e vahe‘i ‘e Sihova ‘a e matakali ‘o Līvai ke fua ‘a e ‘a‘ake ‘o e kovinānite ‘o Sihova, ke fakafe‘ao kia Sihova, ke tauhi ia, pea ke fai tāpuaki ‘i hono huafa, pea talu ai pē. 9Ko hono ‘uhinga ia ‘oku ‘ikai ha ‘inasi pe tofi‘a ‘o ha‘a Līvai fakataha mo hono kāinga; ko Sihova pē ‘a hono tofi‘a, ‘o hangē ko e folofola ki ai ‘a Sihova ko ho ‘Otua."

Levitiko 7:28-34

"28Pea folofola ‘a e ‘Eiki kia Mōsese, ‘o pehē, 29Tala ki ha‘a ‘Isileli, ‘o pehē, Ko ia ‘oku ne ‘atu ‘ene feilaulau-‘ofa kia Sihova, te ne ‘omi ‘ene kōpano ki he ‘Eiki mei he‘ene feilaulau-‘ofa: 30‘e ‘omi ‘e hono nima pē ‘o‘ona ‘a e feilaulau tutu ‘a Sihova; te ne ‘omi ‘a e ngako mo e fatafata, ke tākalo ‘aki ‘a e fatafata ko e feilaulau-tākalo ‘i he ‘ao ‘o Sihova. 31Pea ‘e tutu ‘e he taula‘eiki ‘a e ngako ‘i he ‘ōlita: ka ko e fatafata ko e ‘inasi ia ‘o ‘Ēlone mo hono ngaahi foha. 32Pea te mou ‘atu ‘a e tefito alanga to‘omata‘u mei ho‘omou ngaahi feilaulau-‘ofa ko e feilaulau-hapai, ko e ‘inasi ‘o e taula‘eiki. 33Pea ko e toko taha ‘o e ngaahi foha ‘o ‘Ēlone ‘oku ne ‘atu ‘a e toto ‘i he feilaulau-‘ofa mo e ngako, te ne ma‘u ‘a e tefito alanga to‘omata‘u mōno ‘inasi. 34He ko e fatafata tākalo, mo e tefito alanga hapai, kuo u vahe‘i ia mei ha‘a ‘Isileli, mei he‘enau ngaahi feilaulau-‘ofa, pea kuo u ‘atu ia kia ‘Ēlone ko e taula‘eiki, pea ki hono ngaahi foha, ko e ‘inasi ta‘engata mei ha‘a ‘Isileli."

Nomipa 18:12

"12Ko e lelei ‘o e lolo mo e lelei ‘o e uaine mo e uite, ‘a e ngaahi polopolo ‘oku nau ‘omi mei ai kia Sihova, kuo u ‘atu ia kiate koe."

Nehemaia 12:44,47

"4Pea ‘i he ‘aho ko ia na‘e fokotu‘u ‘a e tu‘unga me‘a ke pule ki he ngaahi loki na‘e fa‘o ai ‘a e koloa: ki he ngaahi me‘a na‘e hapai ki he polopolo ta‘u, pea ki he tukuhau-hongofulu, ke tānaki ki ai, ‘o fakatatau ki he ngaahi vao ‘o e ngaahi kolo, ‘a e ngaahi ‘inasi kuo tu‘utu‘uni ‘e he lao ma‘a e kau taula‘eiki mo Līvai. He na‘e māfana ‘a e loto ‘o Siuta ‘i he kau taula‘eiki, mo e kau Līvai–si‘enau tu‘u na! 47Pea ‘i he kuonga ‘o Seluipepeli mo e kuonga ‘o Nehemaia na‘e ‘ange ‘inasi ‘e ‘Isileli kotoa ki he kau hiva mo e kau le‘o matapā, ‘a e me‘a ‘o e ‘aho ki hono ‘aho; ‘o nau vahe ‘inasi ai pē ki he kau Līvai, pea vahe ‘inasi ‘e he kau Līvai ma‘a ha‘a ‘Ēlone."

1 Kolinito 9:13,14

"13‘Oku ‘ikai te mou ‘ilo koā, ko kinautolu ‘oku ngāue ‘i he me‘a ‘o e Temipale ‘oku nau kai mei he Temipale? pea ko kinautolu ‘oku tauhi ki he ‘ōlita ‘oku nau ‘inasi taha mo e ‘ōlita? 14Pehē foki, na‘e fekau ‘e he ‘Eiki kiate kinautolu ‘oku malanga‘aki ‘a e Kōsipeli, ke nau ma‘u honau tauhi mei he Kōsipeli."

KO E NGAAHI FEILAULAU MAʻAE KAU TAULAʻEIKÍ MO E KAU LIVAÍ. Ko e kau taulaʻeikí mo e kau Livaí naʻa nau tauhi ʻa e fatongia tatau, ʻo hangē ko e kau faifekaú ʻi he ʻahó ni. Pea ko honau fatongiá. 1. Ko hono akoʻi ʻo e kakaí ʻo fekauʻaki mo e ʻOtuá. 2. Hoko ko e faʻifaʻitakiʻanga ʻo e moʻui fakaʻOtuá. 3. Ko hono tokangaʻi ʻo e potu toputapú mo e kau ngāué. 4. Ke nau tokoniʻi ʻa e kau fai felaulaú. Heʻikai ke nau maʻu ha konga pe tofiʻa fakataha mo e kau ʻIsilelí, pea naʻe ʻikai ke nau kau he maʻu ʻinasi ʻi he ngaahi vete, pe koloa ʻoku maʻu he taú, pea naʻe ʻikai hanau tofiʻa ʻi he fonua ko Kenaní. Naʻe ʻikai ke nau fiemaʻu ʻa e fiemalie mo e fiefia ʻo e moʻui ko ení.

Ko e kakaí kuopau ke nau maʻa kinautolu. Pea koeʻuhi ko e kau taulaʻeikí mo e kau Livaí naʻe ʻikai lava ke ʻi ai haʻanau koloa ʻanautolu, ke nau muimui holo ai, ko ʻenau pisinisi manakoa. Naʻe hanga ʻe he ʻOtuá ʻo fokotuʻutuʻu makehe, koeʻuhí ke ʻoua ʻe toʻo ‘a e faingamalie ʻo e kakaí kia kinautolu. ʻOku toutou toʻo faingamalie ʻe he ngaahi siasi, ʻi he kau tangata, mo e kau fefine, kuo ʻomi ʻe he ʻOtuá ke tataki kinautolú. Ko e sīpingá, ko e kau faifekaú, ʻoku ʻikai totongi kinautolu ʻo fakatatau ki honau potó, pe ko honau taimi ngāué. Ko e kau taulaʻeikí, ko honau fatongiá ko e tauhi ki he ʻolitá, pea ʻoku nau ʻinasi ai, ʻi he ngaahi feilaulau, ʻa ē ʻoku ui ko e feilaulau-ʻofa. He ko Sihova pe honau tofiʻá, neongo ʻa e ʻi ai honau ngaahi ʻinasi pau, ʻi he ngaahi feilaulaú, pea pehē ki he ngaahi polopolo, pea ko ʻenau aí koeʻuhi ko e ʻOtuá ʻoku nau fakafofongaʻí. Pea hono ʻikai ke tuha e ia mo kitautolu, ʻa e haʻa kalisitiane. Ko Kalaisi pe ʻa ʻetau mataʻikoloá pea hangē ko e folofola ʻa kimoutolu ko e ʻataʻi kakai ʻi muʻa, ka ko ʻeni ko e kakai ʻa e ʻOtuá ko e kakai naʻe ʻikai fai ha meesi ki ai, ka ko eni kuo mou maʻu meesi. (1 Pita 2:10). He ko ʻetau fetuʻutaki mo Kalaisí, ʻoku mamaʻo atu hono mahuʻingá ʻi ha toe meʻa, ʻa e koloa, ʻa e poto, ʻa e siliva mo e koula. ʻIo, ko Kalaisi pe ʻetau mataʻikoloa ʻoku hulu atu ʻi māmani kotoa.