Nomipa 16: 23-27
"(23) Pea folofola ‘a Sihova kia Mōsese. (24) Lea ki he fakataha, ‘o pehē, Mou hiki mei he feitu‘u takatakai ki he nofo‘anga ‘o Kola, Tētani, mo ‘Apilami. (25) Pea tu‘u ‘a Mōsese, ‘o ne ‘alu kia Tētani mo ‘Apilami, pea muimui kiate ia ‘a e mātu‘a ‘o ‘Isileli. (26) Pea ne me‘a ki he fakataha ‘o pehē, Mou faka‘atā mu‘a mei he ngaahi tēniti ‘o e kau tangata pau‘u ni, ‘oua ‘e lave ki ha‘anau me‘a, na‘a mou ‘auha ‘i he‘enau ngaahi angahala. (27) Ko ia, na‘a nau hiki atu mei he nofo‘anga ‘o Kola mo Tētani mo ‘Apilami mei he potu kotoa pē: pea hū ki tu‘a ‘a Tētani mo ‘Apilami, ‘o nau tutu‘u ‘i hona ngaahi mata tēniti, fakataha mo hona ngaahi uaifi mo hona ngaahi foha mo ‘ena tamaiki."
Nomipa 26:11
"(11) ‘o keina ‘e he afi ‘a e uangeau mā nimangofulu‘i tangata, ‘o nau hoko ko e faka‘ilonga. Ka ko e ngaahi foha ‘o Kola na‘e ‘ikai ke pekia."
Saame 19:12,14
"(12) Ko e me‘a ki ha‘ate ngaahi hē–ko hai te ne fa‘a ‘ilo? Ke ke lau au ‘oku ou ‘atā ‘i he ngaahi me‘a lilo.
(14) ‘E Sihova, ke hoko lelei ki ho ‘ao ‘a e ngaahi lea ‘a hoku ngutu ni, Mo e fakakaukau ‘a hoku loto, ‘A e ‘Afiona ko hoku Mo‘unga mo hoku Koeli!"
2 Kolinito 6:17
"17Ko ia, mou hiki mei honau lotolotonga, pea mavahe kimoutolu, pea ‘oua te mou ala ki he me‘a ta‘ema‘a; ko e folofola e 'a e 'Eiki"
Mavahe mei he kau angatuʻú. Naʻe fiemaʻu ʻe he ʻOtuá ʻa e kakaí, ke nau mavahe mei he tēniti ʻo e kau tangata angatuʻú, naʻe mavahe leva ʻa e kakaí. Ko Kola, Tetani mo ʻApilami naʻa nau mavahe pē ki honau ngaahi teniti, pea mo honau ngaahi famili. Naʻe vaheʻi pe ʻe Kola ia ʻa e toko uangeau nimangofulu, ko e kau angatuʻu kehe pe ia. Pea ne tuʻu pe ia ʻi he tafaʻaki ʻo Tetani mo ʻApilamí. Pea ko e tali eni ʻe he ʻOtua ʻa e lotu ʻa Mosesé, he naʻá ne kole ki he ʻOtuá, ke ʻoua muʻa naʻa fakaʻauha ʻa e fakatahá kotoa. ʻOku ʻikai ke tau ʻamanaki ki he ngaahi lotu hotau ngaahi kaumeʻá maʻa ʻetau lelei. He neongo ko e angatuʻú naʻe taumuʻa kia Mosese mo ʻElone, ka naʻa na fai pe hona leleitahá ʻi heʻena ʻofa ʻi he kakaí.
ʻOku ʻi ai ʻa e ikuna maʻa tautolu. ʻE tokoniʻi ʻe Sisū Kalaisi ʻa e kalisitiané, ke ne fakafepakiʻi ʻa e ʻahiʻahí mo e angahalá. ʻOku fakamanatu mai ʻi he angatuʻu ʻa Kola mo hono kau muimuí, ʻa e ngaahi meʻa pau ʻo fekauʻaki mo Sisū Kalaisi, ʻoku tau maʻu mei he Tohitapú. Naʻe ʻahiʻahiʻi ʻi he meʻa kotoa pē, hangē ko kitautolu kae ʻikai haʻane angahala (Hep 4:15). Ko Sisū naʻe ʻahiʻahiʻi ʻi he founga ʻe tolu ʻoku tala ʻe he Tohitapú. “ʻA e holi ʻo e kakano, moe holi ʻo e mata, moe ʻafungi ʻo e moʻui” (1 Sn 2:16). ʻOku talamai ʻe he Tohitapú. Ko Setane ʻa e tevolo, naʻe haʻu kia Sisū ʻo ʻahiʻahiʻi ia tuʻo tolu, mo feingaʻi ia ke angahala. (1) Naʻe ʻahiʻahiʻi ʻe Setane ʻa Sisū ke fakafiemalieʻi ʻene halofiá (Mt 4:5) ʻo fakataumuʻa eni, ki Hono kakanó. Ka naʻá ne tali ʻikai. (2) Naʻe fakaʻaliʻali ʻe Setane kia Sisū ʻa e ngaahi puleʻanga ʻo māmaní, ko e ʻahiʻahi ʻo Sisū ke holi ki ai. Naʻe fakataumuʻa ʻa e ʻahiʻahí ni ki he fofonga ʻo e ʻEikí. Ka naʻá ne tali ʻikai (Mt 4:18).(3) Naʻe ʻahiʻahiʻi ia ʻe Setane ke ʻafungi, ke ne fai ha mana ke fakahaaʻiʻaki ko e ʻAlo ia ʻo e ʻOtuá (Mt 4:5). Naʻe taumuʻa ʻa e ʻahiʻahí ni ki heʻene ongoʻí, ko ʻene tali ki ai ʻIkai. Ko e meʻa tatau ʻoku fai ʻe he tevoló kiate kitautolu. Ko e taimi ʻoku tau angahalá, ʻi he fiemaʻu ʻe hotau kakano ʻa e meʻa ʻoku taʻetotonu. Ko e taimi niʻihi ʻoku tau angahala ʻi he sio hotau matá ki ha meʻa hala, kae sio maʻu pe ia ki ai. Ko e taimi niʻihi ʻoku tau angahala he taimi ʻoku tau ongoʻi, ʻafungi mo tauʻatāina mo ʻetau taʻefiemaʻu ʻa e ʻEikí ke tokoniʻi kitautolu. Nofo ofi kia Kalaisi, pea te ke hangē ha fetuʻú, ha fetuʻu naʻá ne taki ʻa e kakai kehe ki he Fakamoʻuí, pea te ke ikuna.
No comments:
Post a Comment