Nomipa 16:36 - 40
"(36) Pea folofola ‘a Sihova kia Mōsese, ‘o pehē, (37) tala kia ‘Eliesa ko e foha ‘o ‘Ēlone ko e taula‘eiki, ke ne hiko ‘a e ‘ainga malala mei he loto vela, pea ke lingi ‘e koe ‘a e afi ki hē, he ‘oku nau tapu ‘a e ngaahi ‘ainga ‘a e kau mala-fai-e-tangata na: (38) pea ke nau tuki ia ‘o ngaohi ‘aki ‘a e ngaahi lau‘i ukamea, ‘o ‘ufi‘ufi ‘aki ‘a e ‘ōlita, he na‘a nau ‘atu ia ‘i he ‘ao ‘o e ‘Eiki, ko ia ‘oku nau tapu ai; pea te nau tu‘u ko e faka‘ilonga ki ha‘a ‘Isileli, (39) pea to‘o ‘e he taula‘eiki ko ‘Eliesa ‘a e ngaahi ‘ainga kapa, ‘a ia na‘e ‘atu ‘e he kakai na‘e mōfia; pea nau tuki ke lafalafa ke ‘ufi‘ufi ‘aki ‘a e ‘ōlita: (40) ko e me‘a fakamanatu ki ha‘a ‘Isileli, koe‘uhi ke ‘oua na‘a ofi mai ha kehe, ha taha ‘oku ‘ikai ‘i he hako ‘o ‘Ēlone, ke tutu ‘inisēnisi ‘i he ‘ao ‘o Sihova; na‘a ne hangē ko Kola mo ‘ene kau: ‘o tatau mo e folofola ‘a Sihova kiate ia na‘e fakafai ‘ia Mōsese."
Nomipa 3:10
"(10)Ka ko ‘Ēlone mo ‘ene fānau te ke vahe‘i kinautolu, pea te nau tauhi ‘enau lakanga taula‘eiki: pea ka ai ha kehe ‘e fakaofiofi ki ai, ‘e mate tāmate‘i ia."
Nomipa 17:10
"(10) Pea folofola ‘a Sihova kia Mōsese, Fakafoki ‘a e tototoko ‘o ‘Ēlone ki he ‘ao ‘o e Fakamo‘oni‘anga ke tauhi ai, ko e faka‘ilonga ki he kau angatu‘u: ka ke faka‘osi he kau angatu‘u: ka ke faka‘osi meiate au ‘enau lāunga, ‘o ‘oua te nau mate."
Levitiko 27:18
"(18) Ka ‘o kapau na‘a ne tapui hono konga vao kuo mahili ‘a e Siupeli, pea ‘e toki fai fika ‘a e taula‘eiki ki he pa‘anga, ‘o fai ki he ngaahi ta‘u ‘oku toe ki he ta‘u Siupeli ‘e taha, pea ‘e fakasi‘isi‘i ki he mahu‘inga ko ē."
Hapakuki 2:10
"(10) Kuo ke fakakaukau‘i ha mā ki ho fāmili, ho‘o tu‘usi ha ngaahi kakai lahi."
Keina ʻe he afí ʻa e kau muimui ʻo Kolá ʻi he taimi naʻe fakamafaʻa hake ai ʻa e kelekelé ʻo ne folo ʻa Tetani mo ʻApilamí. Naʻe haʻu ha afi meia Sihova ʻo ne keina ʻa e kau tangata ʻe toko uangeau nimangofulu naʻa nau muimui ʻia Kolá. Lolotonga iá, ko ʻElone naʻe tuʻu pe mo kinautolu, kae moʻui pe ia. Ko e tautea ko ení, naʻe ʻikai foʻou kia kinautolu, he kimuʻa atú, ko ʻApui mo Netapi naʻe keina kinaua ʻe he afí. ʻOku fakamanatu mai ʻe he folofolá ni, ko e ikuʻanga ʻo māmaní ko e anoafi (Fakaha 20:14-15). Pea ko kinautolu kotoa pē, heʻikai tuʻu honau hingoa ʻi he tohi ʻo e moʻuí, ʻe lī kinautolu ki he anoafí, fakataha moe fiekalaisí mo e palofita loí, pea mo setane, ko ena ʻa e mateʻangauá. Ko e ngaahi hingoa ʻoku ʻi he tohi ʻo e moʻuí, ko kinautolu pe naʻa nau tui pikitai ki he ʻEiki ko Sisū Kalaisi, ko honau fakamoʻui. Fai leva ia he vave tahá, naʻa tapuni ʻa e matapā, heʻe ngutuhua ʻa e tautea ko eni, ʻi hano fakaʻikaiʻi ʻa e feilaulau ʻa Kalaisi ʻe he māmani, ko ʻenau fakaʻikaiʻi ai pe ia, ʻa e meʻaʻofa mahuʻinga lahitaha ʻa e ʻOtuá, kaeʻumaʻa ʻenau tukunoaʻi ʻa e ngāue tataki ʻa e Laumalie Maʻoniʻoní (Hep 10:26-29). ʻOua ʻe fai taʻengali ʻa e moʻui foʻoú. Naʻe folofola ʻa e ʻOtuá kia Mosese, ke tala kia ʻEliesa ko e foha ʻo ʻElone, ko ia ʻa e taulaʻeiki, ke ne hiki ʻa e ngaahi ʻainga malala tutu ʻinisenisi ʻa e kakaí naʻe keina ʻe he afí, pea lingi ʻa e afi ai kituʻa ʻapitanga, he ko e mala fai fakaetangata ʻa e angatuʻú naʻe fai. ʻOku mahuʻinga eni, ke ʻoua naʻa tau fai ha meʻa fakaetangata, ʻi he moʻui foʻou kuo tau kamatá. Pea tuki ā ʻa e ngaahi ʻainga malalá ʻo ʻufiʻufi ʻaki ʻa e ʻolita feilaulaú ko e fakamanatu ia maʻae fānau ʻa ʻIsilelí, ʻa e fuʻu meʻa fakaʻulia naʻe hoko ʻi heʻenau toʻutangatá. Pea ke fakatolonga e ʻainga malala, ko ia ʻe sio, pea fanongo ki he meʻa naʻe hokó ke ne tokanga ʻe ia mo manavahē. Kuo teuteu eni ʻe he ʻOtuá ki heʻene ngāue fakaofo, he ʻoku ne ʻai ʻene meesí pea mo ʻene fakamaaú. He ko kinautolu ʻa e kau angahalá, ʻoku nau fakafepakiʻi pe hoʻonautolu ngaahi laumalie. ʻOku nau ʻomi pe ʻa e ʻuha fakatouʻosi ki honau sinó mo honau laumalié. Ko kinautolu kotoa pe ʻoku maumau lao mo fakaʻikai ki he kosipeli, ʻoku nau fili mo ʻofa he maté.
No comments:
Post a Comment