Tokonaki 15 Okatopa, 2016

Nom 18:20-24; 1:51; Lev 27:30-33; Teut 10:9; 18:1, 2; Sios 13:33; Isik 28:44 

Nomipa 18:20-24

"(20) Pea folofola ‘a Sihova kia ‘Ēlone, Ko e me‘a ki honau fonua, ‘e ‘ikai hao tofi‘a ai, pe hao vahe ‘i honau lotolotonga: ko au pē ko ho vahe mo tofi‘a ‘i he lotolotonga ‘o ha‘a ‘Isileli. (21) Pea ko e me‘a ki ha‘a Līvai, vakai kuo u foaki hono kotoa ‘o e tukuhau hongofulu mei ha‘a ‘Isileli moonau tofi‘a, ko e fetongi ‘o ‘enau ngāue he‘enau fai ‘a e ngāue ‘o e Tēniti Fe‘iloaki‘anga. (22) Pea ‘e ‘ikai toe taka ofi ‘a ha‘a ‘Isileli ki he Tēniti Fe‘iloaki‘anga, na‘a nau fua ha hia, ‘o pekia. (23) Ka ‘e fai ‘e Līvai ia ‘a e ngāue ‘o e Tēniti Fe‘iloaki‘anga, pea ‘e fua ‘e kinautolu ‘enau hia: ko e tu‘utu‘uni ta‘engata ia, ‘o fai ki ai ‘i he ngaahi to‘utangata ‘amui; ‘e ‘ikai ‘aupito vahe hanau tofi‘a ‘i he lotolotonga ‘o ha‘a ‘Isileli, (24) he ko e tukuhau hongofulu ‘a ha‘a ‘Isileli, ‘a ia ‘oku nau feilaulau-hapai ‘aki kia Sihova, kuo u foaki atu ia ki he kau Līvai moonau tofi‘a: ko hono ‘uhinga ia ‘o ‘eku pehē kiate kinautolu, ‘E ‘ikai te mou ma‘u tofi‘a ‘i he lotolotonga ‘o ha‘a ‘Isileli."

Nomipa 1:51

"(51) Pea ka hiki atu ‘a e Tāpanekale, ‘e veteki ia ‘e he kau Līvai; pea ka pehē ke tu‘u ‘a e Tāpanekale, ‘e fokotu‘u ia ‘e he kau Līvai; pea ko ha kehe ‘oku fakaofi mai ‘e tāmate‘i."

Levitiko 27:30-33 

"(30) Pea ko e ngaahi vahehongofulu ‘o e fua ‘o e kelekele ‘oku ‘a e ‘Eiki ia, pe ko ha me‘a ‘oku tō ngoue, pe ko ha fua‘i ‘akau; ‘oku tapu ia ki he ‘Eiki. (31) Pea kapau ‘oku mamafa ha taha ke huhu‘i ha konga ‘o hono tukuhau ko ē, te ne fakalahi ‘aki hano vahenima. (32) Pea ko e ngaahi vahehongofulu ‘o e monumanu lalahi mo e monumanu iiki, ‘ilonga ia ‘e ‘alu atu ‘i he lalo tokotoko, pea ko hono hongofulu ‘o e manu ‘oku tapu ki he ‘Eiki. (33) ‘E ‘ikai te ne vakai pe ko ha manu lelei ia pe kovi, pea ‘e ‘ikai te ne fetongi: ‘io, kapau te ne momo‘i fetongi ia, pea ko e manu mo homo fetongi ‘e fakatou tapu: ‘e ‘ikai huhu‘i ia."

Teutalonome 10:9

"(9) Ko hono ‘uhinga ia ‘oku ‘ikai ha ‘inasi pe tofi‘a ‘o ha‘a Līvai fakataha mo hono kāinga; ko Sihova pē ‘a hono tofi‘a, ‘o hangē ko e folofola ki ai ‘a Sihova ko ho ‘Otua."

Teutalonome 18:1, 2

"(1) ‘E ‘ikai ma‘u ‘e he kau Līvai taula‘eiki, ‘io, ‘a e matakali Līvai kotoa, ha ‘inasi pe tofi‘a fakataha mo ha‘a ‘Isileli: te nau kai ‘a e ngaahi feilaulau tutu ‘a Sihova mo hono ‘inasi. (2) Ka ‘e ‘ikai hano tofi‘a ‘i he lotolotonga ‘o hono kāinga; ko Sihova pē hono tofi‘a, ‘o hangē ko ‘ene folofola ki ai."

Siosiua 13:33

"(33) Ka ki he matakali ‘o Līvai na‘e ‘ikai ‘ange ‘e Mōsese ha tofi‘a: ko Sihova ko e ‘Otua ‘o ‘Isileli ko honau tofi‘a pē ia; ‘o hangē ko ‘ene folofola na‘e fai kiate kinautolu."

“Ko au pe ho vahe mo tofiʻa ʻi he lotolotonga ʻo haʻa ʻIsileli. ʻOku tau toe hoko atu pe ki he fakamatala kuo fai ʻe he ʻOtuá, maʻa ʻEne kakai kuo ne fili Maʻana ke nau fai ʻa ʻEne ngāué maʻa ʻIsileli, mo māmani foki. ʻA ia ko ʻenau vahé mo honau tofiʻá ko e ʻOtuá. ʻIkai kuo fehanuaki ʻa māmani, ʻi he meʻa ko ia ko e kelekele, mo e vahenga ʻo ʻenau ngaahi ngāue ʻoku fai ʻi he fonuá, moe puleʻangá. Kaekehe, ko e tokonaki eni kuo ngaohi maʻae kau Livaí mo e kau taulaʻeikí. Naʻe hangē ʻa ʻIsileli ha kakai makehé, he naʻe ʻikai ke lau ia ʻe he ngaahi kakaí, pea ko e kau Livaí, ko e matakali makehe, ʻo ʻikai ke nau nofo pe ʻo hangē ko e toenga ʻo e ngaahi matakalí. Pea ʻi he ʻuhinga lelei naʻe ʻoange, heʻikai ke ʻi ai haʻanau tofiʻa ʻi he fonuá. He naʻe folofola ki ai ʻa e ʻOtuá ʻo pehe “Ko au pē ko ho vahé mo tofiʻá”. Ko kinautolu kuo nau maʻu ʻa e ʻOtuá, ko honau tofiʻa, mo honau ʻinasi taʻengata, ʻoku nau ʻilo ʻa e fakaʻofa ʻa e tofiʻá ʻi māmani mo taʻemanumanu ki ai. “Ko hoku ʻinasi ʻa Sihová, ko e lau ia ʻa hoku laumalié, ko ia ai te u ʻamanaki kiate ia” (Tani 3:24) Pea heʻikai fakatefito ʻi ha meʻa ʻoku maʻu ʻi he māmaní, ka ko ia tokotaha pē. Ko e kau Livaí naʻe ʻikai haʻanau tofiʻa, ka te nau nofo fiemalie mo mahu tafea – ko e ako ia kia kitautolu, ko e tokonakí ʻoku haʻu ʻi he founga kehekehe, ke tokoniʻi kinautolu ʻoku fakamakatuʻunga ʻiate Iá. Ko e kau taulaʻeikí, naʻa nau maʻu ʻa e vahe hongofulu ʻa e kau livaí, ko e tuʻutuʻuni naʻe fai ʻe Mosese ki he kau Livaí, ko e ʻOtuá te ne totongi ia, 14 pea mo e fiefia ange ʻi he kau taulaʻeikí, heʻenau fiemaʻu ki honau mafaí. Ko e talanoa tatau maʻa kitautolu kainga Moʻui foʻou ʻoku tau ʻia Kalaisi, pea ko Kalaisi ʻoku ʻia kitautolu ʻi hono Laumalie Maʻoniʻoní, pea ʻoku ʻAʻana ʻetau meʻa kotoa pē. Ko ʻetau moʻuí, ko e haʻu meia Kalaisi, pea ko ʻetau meʻa foakí, ko e haʻu pe mo Ia meia Kalaisi, pea ko e moʻui ko ʻení, ko Kalaisi pē, pea ko e moʻui kahaʻú, mo e maama kahaʻú ko Kalaisi pē. Tuku koe kia Kalaisi, ke Ne fakakoloa koe.