Tu'apulelulu 13 Okatopa, 2016

Nom 18:8-13, 10:28, Eki 23:19; 29:26; Lev 6:16, 25:7; 6:31-34,36 

Nomipa 18:8-13

"(8) Pea folofola ‘a Sihova kia ‘Ēlone ‘o pehē, pea ko au eni kuo u ‘atu kiate koe ‘a e tauhi ‘o ‘eku ngaahi feilaulau-hapai, ‘io, ‘a e ngaahi me‘a kotoa pē kuo fakatapu ‘e ha‘a ‘Isileli, kuo u foaki kiate koe mo‘o ‘inasi, pea ki ho ngaahi foha foki ko e fatongia ta‘engata. (9) Ko ‘eni ‘i he ngaahi me‘a toputapu ‘e ‘a‘au, ‘o ‘ikai tutu; ko ‘enau ngaahi kōpano, ‘io, ‘ilonga ha kinaki, pea ‘ilonga ha feilaulau-angahala, pea ‘ilonga ha feilaulau-halaia, ‘a ia te nau ‘omi kiate au, ‘e toputapu ia kiate koe mo ho ngaahi foha. (10) ‘Io, ‘e tatau ho‘o kai ia mo e ngaahi me‘a toputapu: ‘ilonga hao tangata te ne kai ai: ‘e toputapu ia kiate koe. (11) Ko eni foki ‘oku ‘a‘au; ko ‘enau ngaahi me‘a‘ofa ‘oku hapai, ‘io, ‘a e ngaahi me‘a ‘oku tākalo ‘e ha‘a ‘Isileli; kuo u foaki ia kiate koe pea ki ho ngaahi foha, pea ki ho ngaahi ‘ōfefine, ko e fatongia ta‘engata; ko ia kotoa pē ‘i ho fale ‘oku ma‘a te ne kai ai. (12) Ko e lelei ‘o e lolo mo e lelei ‘o e uaine mo e uite, ‘a e ngaahi polopolo ‘oku nau ‘omi mei ai kia Sihova, kuo u ‘atu ia kiate koe. (13) Ko e ngaahi fua tapu ‘o e me‘a kehekehe ‘oku ‘i honau fonua, ‘a ia te nau ‘omi ki he ‘Eiki, ‘e ‘a‘au ia; ko ia kotoa pē ‘i ho fale ‘oku ma‘a te nau kai ia."

Nomipa 10:28
"(28) Ko eni ‘a e ngaahi tuku fononga atu ‘a ha‘a ‘Isileli mo honau ngaahi kongakau: pea nau hiki atu."

'Ekisoto 23:19
"(9) Ko e polopolo ‘o e ‘uluaki fua ‘o ho kelekele te ke ‘omi ki he fale ‘o Sihova ko ho ‘Otua. ‘E ‘ikai te ke haka ha ki‘i kosi ‘i he huhu‘a ‘o ‘ene fa‘ē."

'Ekisoto 29:26
"(26) Pea te ke to‘o ‘a e fatafata ‘o e sipi tangata fakanofo ‘o ‘Ēlone, pea te ke tākalo ‘aki ia ko e feilaulau-tākalo ‘i he ‘ao ‘o Sihova; pea ‘e hoko ia ko ho ‘inasi."

Levitiko 6:16
"(6) Pea ko hono toe ‘e kai ‘e ‘Ēlone mo hono ngaahi foha: ‘e kai ta‘elēvani pē ‘i ha potu ‘oku tapu: te nau kai ia ‘i he loto‘ā ‘o e Tēniti Fe‘iloaki‘anga"

Levitiko 25:7
"(7) pea ma‘a ho‘o monumanu, mo e fanga manu ‘oku ‘i ho fonua: ‘io, ‘ilonga ha me‘a ‘oku tupu ‘e kai noa pē."

Ko e ʻinasi ʻo e kau taulaʻeikí. Ko e ngāue fakataulaʻeikí ʻoku ui ko e tau, pea ko ia ʻoku ʻalu ʻi he taú, ʻoku fai hono ʻohofi ia ʻoʻona. ʻOku ʻikai ha taha ʻe tauhi ki he ʻOtuá ko e meʻa noa, ko e kotoa ʻo e kau tuí, ko e kau taulaʻeiki fakalaumalie, he kuo palomesi ʻa e ʻOtua, ke tokangaʻi kinautolu te nau nofo ʻi he fonua, te nau kai, ʻe ʻikai fiemaʻu ha meʻa lelei. Ko e lotu moʻoní, ʻoku nau maʻu ʻa e palomesi ʻo e moʻuí, he taimí ni, mei he tokonaki lahi maʻae kau taulaʻeikí. Ko ia ʻoku lave ki ai ʻa e ʻapositoló, ko e fatongia ia ʻo e ngaahi siasi fakakalisitiané, ko hono tauhi ʻenau kau faifekaú. Ko e kau taulaʻeiki ʻoku nau ngāue ʻi he ʻolitá, pea nau nofo ʻi he ʻolitá, ko e kau faifekaú ʻoku nau malangaʻi ʻa e kosipelí, pea ʻoku totonu ke nau nofo ʻi he kosipelí mo e fiemalié (1 Kol 9: 13, 14). Ko e tauhi ʻoku fakamā te ne fakamaaʻi ʻa e kau faifekaú. Ko e lahi ʻo e tokonaki maʻae kau taulaʻeikí, naʻe maʻu ia mei he ngaahi feilaulau ʻoku nau ngāue ki aí. ʻOku nau maʻu ʻa e ngaahi kili ʻo e monumanú, pea mo e meimei kotoa ʻo e feilaulaú. ʻOku nau ʻinasi ʻi he feilaulau ʻofa, feilaulau angahala, mo e ngaahi feilaulau kehe. Ko e ngāue ʻa e ʻOtuá, ko ʻene vahe ia ʻaʻana, pea ʻi heʻene fuesia ʻa e ngāué, ko e pale ia mei ai. ʻI he tauhi ʻa e ngaahi fekau ʻa e ʻOtuá ko e pale lahi mei ai. Ko e ngaahi fiefia lolotonga ko ē ʻo e lotú, ko e konga ia hono totongí. Kaekehe, ko e kau taulaʻeikí ko Sihova honau ʻinasí. Naʻe ʻikai ke ʻi ai ha tofiʻa ʻo e kau taulaʻeikí ʻi he fonuá, ka naʻa nau nofo pe ʻo maʻu moʻui, mei he fua ʻo e fonuá, kuo tokonaki ʻe he ʻOtuá maʻa nautolu ʻo fai mai ʻi he ngaahi meʻaʻofa ʻa hono kakaí. Ko e kau taulaʻeikí naʻa nau fetuʻutaki makehe mo e ʻOtuá he ko ia honau tofiʻa mo honau ʻinasi. Pea hangē ko e kau taulaʻeikí, ko e kau tui he ʻaho ní, ʻoku ʻikai ha palomesi ha nau tofiʻa ʻi he māmani ko ení, ka neongo ia, ʻoku ʻi ai haʻa nau palomesi ʻa honau tofiʻá ʻi he puleʻanga ʻi he kahaʻú (Lo 8: 17). Kainga Moʻui foʻou, ʻi heʻetau ʻia Kalaisí ʻoku tau hoko ai ko e fānau ʻa e ʻOtuá, pea tau hoko ai ko e ʻea ki he puleʻanga ʻo e ʻOtuá, kaungameʻa mo hotau ʻEiki ko Sisū Kalaisí he ʻahó ni ʻo taʻengata.