Nomipa 16:31 - 35
"(31) Pea ‘i he ‘osi leva ‘ene ngaahi lea ko ia, ‘iloange na‘e mafahi ‘a e kelekele na‘a nau tu‘u ai; (32) ‘io, na‘e mafa‘a ‘e he fonua hono ngutu, ‘o ne folo fua kinautolu mo honau fale mo e kau tangata ‘a Kola, mo ‘enau nga‘oto‘ota kotoa. (33) ‘Io, ko kinautolu mo ia kotoa pē na‘e kau kiate kinautolu na‘a nau ‘alu hifo mo‘ui ki lolofonua, pea na‘e mapuni ‘a e fonua kiate kinautolu, pea nau mole mei he lotolotonga ‘o e fakataha."
Nomipa 26:10, 11
"(10) Pea na‘e mafa‘a ‘e he fonua hono ngutu, ‘o folo fua kinautolu fakataha mo Kola, ‘i he taimi na‘e pekia ai ‘a e kautaha ko ia; (11) ‘o keina ‘e he afi ‘a e uangeau mā nimangofulu‘i tangata, ‘o nau hoko ko e faka‘ilonga. Ka ko e ngaahi foha ‘o Kola na‘e ‘ikai ke pekia."
Nomipa 11:1 - 3
"(1) Pea ko e tō‘onga ‘a e kakai na‘e hangē kuo hoko ha mala, he‘enau fakapū atu ‘enau lāunga kia Sihova: pea ‘i he fanongo ki ai ‘a Sihova, na‘a ne tuputāmaki, pea na‘e pā ‘a e afi ‘a e ‘Eiki kiate kinautolu, ‘o keikeina mei he taupotu ‘o e ‘apitanga. (2) Pea tangi ‘a e kakai kia Mōsese; pea ne hufekina kinautolu ki he ‘Eiki, pea ngata ‘a e afi. (3) Ko ia na‘e fakahingoa ‘a e potu ko ia ko Tāpela (ko Vela)koe‘uhi ko e pā kiate kinautolu ‘a e afi ‘a Sihova."
Folofua ʻe he kelekelé mo e keina ʻe he afí. Ko e hili pe ʻa e lea ʻa Mosesé, kuo fakapipiki ʻe he ʻOtuá ʻa e kelekelé ʻo ne fakamavaeua, ʻo ne fakamafaʻa, ʻo folofua kotoa kinautolu mo kinautolu, naʻe ʻanautolú. Ka ko e ngaahi foha pe ʻo Kolá, naʻe ʻikai kau ia ʻi he mate ko ʻení (26:11) pea mapuni leva ʻa e kelekele iá. Ko e fakmaau ko ʻení, naʻe ʻikai ke tatau mo Tetani mo ʻApilemi, naʻa na mamaʻo kinaua mei he Sikainá ʻa ē ʻoku ʻi ai ʻa e afi ʻa e ʻOtuá. Ka ko e ʻOtuá naʻá ne ngaohi kinautolu, ke nau ʻilo ʻoku ʻikai fakangatangata ʻa ʻene tauteá, ki ha founga pē ʻe taha. Ko māmani, ʻoka hoifua ki ai, ʻe tuʻumaʻu pē ʻa e fakamaaú ki he afi. ʻOku fakalilifu ki he kau angahalá, ke nau ʻalu hifo moʻui ki honau faʻitoká, ke nau mate mo tanu ai, lolotonga ʻoku nau malohi kakato pē. Ko ʻenau fanaú naʻa nau ʻauha, ko e konga pe ia ʻo ʻenau matuʻá. Ka ʻoku mahino pē mei he talanoá, ʻa e ʻikai ke fai ʻe he matuʻá, ʻa honau ngafa tauhi, ʻo ʻenau fānaú ki he ʻEikí. Pea ko e fatongia mahuʻingá ni, ʻo e ongo matuʻá, ke na ʻoange ʻa Sisū Kalaisi, ke ʻinasi ai ʻa e fānaú ʻi he moʻuí, ʻo ʻikai ko e ʻauha. Hili hono folofua ʻe he kelekelé ʻa e kau taki angatuʻú, naʻe pā mai ʻa e afi ʻa Sihová, ʻo ne keina ʻa e kau tangata ʻe toko 250, naʻa nau fakakaukau ki he taulaʻeikí. ʻOku ʻikai ke finangalo ʻa e ʻOtuá, ke faiʻaki hotau loto kakanó ʻa ʻEne ngāué, pea ke fakaongoongo ange kiate Ia, he ʻoku ʻi ai ʻa ʻene kaveinga, ki he tokotaha fakafoʻituitui kotoa pē, pea mo ʻene meʻa te ne faiange maʻaná. Ko e moʻui motuʻá, ko ʻetau filifili pe meʻa ʻoku tau saiʻia aí, ʻo fai ia pea tau faʻiteliha pe hono fai. Ko e moʻui foʻou ʻa Kalaisí, ʻoku tau fakaongoongo kiate Ia, mo ʻEne tatakí, he ʻoku ʻikai ko ʻetau ngāue, ka ko ʻEne ngāue kuo ne ʻomai ke tau fai. ʻIo, ʻo fai ʻaki Hono potó, pea mo Hono iví, koeʻuhi ke Ne langilangiʻia ʻi he meʻa ʻoku tau faí. Fēfē hoʻo ngaueʻi ʻa e meʻa kuo ʻoatu ʻe he ʻOtuá? Ngāue ʻi hono mafaí.
Kataki ikai ke kakato e ngaahi veesi oe aho koeni malo
ReplyDelete