Nomipa 26:26, 27; Senesi 46:14
Nomipa 26:26, 27
"(26) Ko e hako ‘o Sepulone faka-e-honau-ngaahi-fāmili: meia Sēleti, ‘a e fāmili ‘o ha‘a Sēleti: meia ‘Ēlone, ‘a e fāmili ‘o ha‘a ‘Ēlone: meia ‘Iakaleli, ‘a e fāmili ‘o ha‘a ‘Iakaleli. (27) Ko e ngaahi fāmili ia ‘o ha‘a Sepulone na‘e lau, ko e toko ono mano mā nimangeau."
Senesi 46:14
"(14) Pea ko e ngaahi foha ‘o Sepulone; ko Sēleti, mo ‘Ēlone, mo ‘Iakaleli."
Ko e hako eni ʻo Sepuloné ʻo fakafāmili. Ko Seleti mo hono famili, ko ʻEloni mo hono fāmili, pea mo Iakaleli mo hoʻona ia fāmili. Pea ko hono lau fakakātoa ʻa e hako ʻo Sepuloné naʻa nau toko 60,500. Ko honau ʻuluaki laú, ʻi he taʻu hono uá pē, ʻenau mavahe mei ʻIsipité, naʻa nau toko 57,400. ʻA ia ʻoku nau tupuʻaki ʻa e toko 3,100. Ko e tuʻutuʻuni ʻa e ʻOtuá kia Mosese, mo ʻEliesa ko e taulaʻeikí, ke lau ʻa e kakai tagata ʻo ʻIsilelí ʻo fakaʻulumotuʻa, ke ʻi ai ʻa e tamai, ʻoku ne tokangaʻi ʻa e fāmilí. ʻOku mahuʻinga ʻaupito ʻa e tuʻunga fakatamaí ʻi he ngaahi fāmilí ʻia Senesi 18:19, “He kuou fili ia (ʻEpalahame) koeʻuhiā ke ne fekau ʻene fānau, mo hono ʻapí ʻamui, ke nau tauhi ʻa e ʻalunga ʻo Sihová, mo nau faitotonu mo tauhi tuʻutuʻuni”. ʻOku ʻikai ke kau ʻa e kakai fefiné, ʻi hono taki ʻo e ngaahi fāmili ʻo e kau ʻIsilelí. Kuo tuku ʻe he ʻOtuá ki he ngaahi tamaí, ʻa e fatongia mahuʻinga, ko hono tataki ʻa e fānaú, ke nau ʻilo ʻa e ʻOtuá, mo fakatupulekina ʻenau moʻuí. Ko e fakatokanga ʻa e ʻapositoló, ki he ngaahi tamaí “Pea ko kimoutolu ʻa e ngaahi tamaí ʻoua te mou fakaʻitaʻi hoʻomou fānaú, kae akonekina ʻaki ʻa e tautea mo e valoki ʻa e ʻEikí (ʻEfeso 6:4). Ko e kaveinga ia ʻa e ngaahi tamaí ko hono tokoniʻi ʻa e fānaú ke nau tupu, ʻoua fakaʻitaʻi mo valokiʻi kinautolu ke nau ʻita mo lotosiʻi (Kol 3:21) Ko e tuʻunga ko ení ʻoku ʻikai faingofua, ka ke lahi pē ʻa e kātakí, ke hiki hake ʻa e fānaú ʻi he ʻofa, ʻo hangē pē ko e tauhi ʻe Kalaisi, ʻa e kakaí ʻi he ʻofa. Ko e finangalo ʻo e ʻOtuá ki he ngaahi tamaí, ke ʻanautolu hono lehilehiʻi ʻa e fānaú, mo e fāmilí maʻae ʻEikí.
No comments:
Post a Comment